Ես ամեն, ամեն ինչ գիտեմ
ՎԵՐԼՈՒԾՈՒԹՅՈՒՆՆԵՐ
Սուրբ աթոռում Հայաստանի նախկին դեսպան Միքայել Մինասյանն այն քիչ մարդկանցից է, ով շատ լավ է ճանաչում ոչ միայն Նիկոլ Փաշինյանին, այլև Հայաստանի քաղաքական դաշտի գրեթե բոլոր դերակատարներին: Մինասյանի հասցեին հնչող քննադատություններին կամ նրա անվան շուրջ առկա խոսակցություններին չենք անդրադառնալու, քանի որ, կարծում եմ, այլ հոդվածի շրջանակներում դեռ առիթ կունենանք դա անելու, և նաև այն պատճառով, որ ստորև քննարկվելիք երևույթն ավելի հետաքրքիր է իր բացառիկությամբ: Այսպիսով. Մինասյանի ֆեյսբուքյան հաղորդումներից և գրառումներից պարզ է դառնում, որ նրան հասանելի են Հայաստանում թե նախկինում, թե հիմա տեղի ունեցող տեղեկություններ և գործընթացներ, որոնք այդպես էլ գաղտնի կմնային, եթե Միքայել Մինասյանը դրանց մասին չբարձրաձայներ: Հիշում ենք՝ մաքսանենգ սիգարետների հետ կապված սկանդալային բացահայտումը, զենքի առևտրի հետ կապված բացահայտումը, որի մասով ի դեպ ԱԱԾ-ում քրեական գործ կա հարուցված, որով անցնում է նաև մեզ արդեն հայտնի պատրոն Դավիթը, վարչապետի կողմից երկաթի բիզնեսում ներգրավված լինելը, իսկ վերջերս նաև ԱԺ նախագահի՝ կրկնակի գործակալ լինելու մասին բացահայտումը: Բոլորը չթվենք:
Միքայել Մինասյանի կողմից այս ընթացքում բազմաթիվ բացահայտումներ են եղել, բազմաթիվ գաղտնի փաստաթղթեր են հրապարակվել այս կամ այն պաշտոնյայի կամ գործարքի վերաբերյալ ու հետաքրքիր փաստն ու օրինաչափությունն այն է, որ Մինասյանի բոլոր կանխազգուշացումները, բացահայտումներն ու գաղտնազերծումները վերջում ճիշտ են դուրս գալիս, կամ չեն հերքվում, կամ հեքումներն այնքան հիմնազուրկ ու թույլ են լինում, որ այլ բան, քան դրանց հավատալն է, չի մնում: Ինչպես ժողովուրդն է ասում՝ նա մի ոտ շուտ է իմանում ամենի մասին: Հիշում եք նաև նոյեմբերի 9-ի տխրահռչակ փաստաթղթի ստորագրումը Նիկոլի կողմից: Ազգը դեռ Արծրունի հետ <<դուխով ու հպարտ հաղթում էր>>, երբ Մինասյանը ազդարարեց բոթը: Անկեղծ լինենք, զարմանում ենք՝ որտեղի՞ց իմացավ, ո՞նց: Հիմա նույնիսկ մարդիկ Ֆեյսբուքում կեսկատակ, իսկ բազմաթիվ դեպքերում լուրջ գրում են, թե ի՞նչ կարող է ասել Մինասյանն այս կամ այն հարցի, պաշտոնական տեղեկատվության հետ կապված, եթե որոշակի կասկած կա, որ այն մոլորեցնում է հասարակությանը, կամ սուտ է:
Խոստովանենք՝ ոչ ստանդարտ իրավիճակ է, երբ Հայաստանից դուրս ապրող մարդն ավելի շատ տեղեկատվության է տիրապետում, քան մեզանից յուրաքանչյուրը, հաճախ ավելին գիտի, քան իրավապահ մարմինները, հաճախ Հայաստանից դուրս Հայաստանի շուրջ ծավալվող գործընթացներից ավելի տեղյակ է, քան մեր Արտաքին գործերի նախարարությունը: Սա փաստ է: Ու հաճախ մտածում եմ՝ սա լա՞վ է, թե՞ վատ: Կարծում եմ ավելի շատ լավ է: Այն պարզ պատճառով, որ կա իսկապես այլընտրանքային տեղեկատվություն ստանալու հնարավորություն, որը գերազանցապես ճշմարիտ է, քան պաշտոնականը:
Վատ է այն պարզ պատճառով, որ գիտակցում ես, որ դու չունես պետություն, իշխանություն, պետական կառավարման մարմիններ, իրավապահ համակարգ, հակառակ դեպքում Միքայել Մինասյանը երբեք եթեր դուրս չէր գա ու ասեր, որ մաքսանենգ ճանապարհով ծխախոտ է արտահանվել ՌԴ: Մենք դրա մասին առնվազն պիտի իմանայինք 02 հաղորդաշարից: Ինչևէ: Ամփոփենք: Միքայել Մինասյանը Հայաստանում երբեք հրապարակային քաղաքականությամբ չի զբաղվել, բայց չեմ կարծում, որ նման մտադրություն չունի: Առաջիկայում քաղաքական գործընթացները խոստանում են լինել շատ հետաքրքիր՝ հագեցած քաղաքական տարաբովանդակ օրակարգերով, ծանր քաշային խաղացողներով: Թեժ է լինելու:
Անի Առաքելյան
