Ի՞նչ ենք արել Նիկոլի ստերի դեմ
ՎԵՐԼՈՒԾՈՒԹՅՈՒՆՆԵՐ
Վերջին շրջանում, հատկապես Հայաստանն ու Արցախը աղետի մատնելուց հետո հաճախ է գործածվում ամենատարբեր մարդկանց խոսքում, թե «Նիկոլը խաբեց ժողովրդին»: Աներկբա է, որ Նիկոլ Փաշինյանը և նրա «նիկոլախումբը» խաբեցին ժողովրդին: Ի դեպ՝ մի քանի բառ «ժողովրդի» մասին: Ավելի ճիշտ՝ այն չակերտավորելու: Ժողովուրդը երկրի բոլոր բնակիչներն են, սկսած՝ անգրագետ Պողոսից, վերջացրած՝ ակադեմիկոս Բարսեղյանով, օրինակ: Բոլո՛րը՝ անկախ իրենց կրթական ցենզից, սոցիալական վիճակից ու հասարակական կարգավիճակից: Հետևաբար, սխալ է ամեն մի հարմար-անհարմար առիթով գործածել «ժողովուրդ» բառը, առավել ևս, այս կամ այն երևույթը վերագրել միանգամից ժողովրդին, այսինքն՝ բոլորին: Հիմա խաբելու մասով․ Նիկոլ Փաշինյանը բազմիցս ու շարունակաբար, ամենատարբեր հարցերի, խնդիրների ու երևույթների հետ կապված, ցինիկաբար խաբել է, անպատկառորեն ստել, արել է տրամաբանորեն միմյանց կտրուկ հակասող հայտարարություններ:
Ավելի քան երկուսուկես տարի է, ինչ Նիկոլի ստախոսությունը դարձել է համապետական պրոբլեմ: Այնպիսի խնդիր, որը հանգեցրեց մարդկային անդառնալի ու եղեռնագործական ծավալի կորուստների, հանգեցրեց ազգային ու պետական աղետի: Ու դեռ հանգեցնում է: Բայց դիտարկվող հարցի նրբերանգը մի փոքր այլ է: Փաշինյանն ու կապիտուլյանտ-հող տվողների իր «փունջը» բացահայտորեն խաբել ու ստել են ամբողջ ժողովրդի առջև՝ հերոս Աբաջյանի կեղծ «պապիկով», «տուշոնկաներով» ու անհաշիվ այլ օրինակներով: Դա արել են բազմիցս, ու բացեիբաց: Այստեղ առանցքային հարցն այն է, որ շատ-շատերը ոչ պակաս պարզորոշ հասկացել են, որ, այո, Նիկոլ Փաշինյանը ստում է, խաբում է ժողովրդին, ինչպես հիմա են այդ մասսայի բազմաթիվ ներկայացուցիչներ ծոր տալիս անմիջական զրույցներում և սոցցանցերում:
Հասկացե՛լ, բացահայտ տեսել են, որ նա, ում «թավշյա» ոգևորությամբ, առանց հարցեր տալու, բերել ու երկրի ղեկավար են կարգել, խաբում է ժողովրդին: Հասկացել ու փոքրոգությունից, գուցե՝ կեղծավորությունից ու երեսպաշտությունից մղված, գուցե՝ որևէ այլ շարժառիթով լռել են: Ծպտո՛ւն չեն հանել: Կարճ ասած` համաձայնե՛լ են, թույլ են տվել, որ իրենց խաբե՛ն: Համաձայնել են, որ իրենց ընտրյալը իրենց ֆռռացնի, իրենց կամ շատերին երկարականջ կենդանու տեղ դնի: Փաստ է այն, որ Նիկոլ Փաշինյանը ստեց, թե՝ Արցախի հարցով բանակցություններ չի վարում: Պարզվեց՝ վարում է, այն էլ ինչպես: Հետո ասաց՝ «ինչ պետք է, այն էլ բանակցում ենք»: Դա էլ կուլ տվեցին ու շարունակում են կուլ տալ: Հպարտացան, թե՝ «օդը փակել են», պարզվեց՝ «օդը բացից էլ բաց է»: Խնդիրն այն է, թե ինչ եք անում՝ հասկանալով կամ գոնե խոստովանելով, որ ձեզ խաբել են: Ինչպե՛ս եք վարվում խաբեբայի հետ, որի ստերի հանդուրժումը հազար-հազարների կյանք արժեցավ, ու դեռ շարունակվող աղետի հանգեցրեց:
Անդրանիկ Կիրակոսյան
