Նա դասական նիկոլիզմի շարքային ներկայացուցիչ է, ուրիշ ոչինչ
ՎԵՐԼՈՒԾՈՒԹՅՈՒՆՆԵՐ
ԱԺ վերջին նիստի ընթացքում իմքայլական պատգամավոր Արփի Դավոյանը, պատասխանելով պատգամավորներից մեկին, բառացիորեն նշել էր․
«Այո ես հաստատում եմ, որ մենք ունենք լրջագույն խնդիրներ և այդ խնդիրների անունն ընդիմությունն է»։
Պատգամավորի ելույթից հետո մեծ աղմուկ բարձրացավ, մարդիկ արդարացիորեն քննադատում էին նման մտածելակերպն ու բառամթերքը: Թվում էր, թե Արփի Դավոյանը այլ առիթի դեպքում պետք է հրաժարվեր նույն կամ նման միտք արտաբերելուց, քանի որ առողջ տրամաբանությունը հուշում է, որ նրան առնվազն դիտողություն պետք է անեին կուսակցության ղեկավար կազմից, կամ հենց ինքը կկարդար ու կլսեր այն քննադատությունները, որոնք հնչում էին իր հասցեին ու գոնե զերծ կմնար այլևս այդ թեմայով նման մեկնաբանություններից: Բայց մենք շատ լավատես ենք, քանի որ հրաշքներ չեն լինում:
Արփի Դավոյանն այսօր լրագրողների հետ ճեպազրույցում նշել է, որ ինքը վերահաստատում է իր ասածը՝ որ, այո՛, ընդդիմությունն է մեր երկրի հիմնական խնդիրը: Նախորդ անգամ, երբ անդրադարձել էինք Արփի Դավոյանին, մի հարց ենք հնչեցրել, թե որ արժանիքի համար է խորհրդարանական կառավարման երկրի պատգամավոր աշխատում Արփի Դավոյանը: Ավելին` մեր վճարած հարկերից աշխատավարձից բացի, ամեն ամիս ստանում նաև պարգևավճար, գործուղումների գնում, մի խոսքով վայելում կյանքը: Հիմա պետք է, ըստ էության, ընդլայնել հարցի աշխարհագրությունը՝ ո՞ր արժանիքի համար են պետական միջոցներից աշխատավարձ ստանում Խորհրդարանական իշխող խմբակցության պատգամավորները, իմքայլական նախարարներն ու բարձրաստիճան պաշտոնյաները, եթե նրանց հավաքական համոզմունքն այն է, որ մեր երկրի հիմնական խնդիրը ոչ թե, օրինակ, գերիների վերադարձն է, այլ՝ ընդդիմությունը: Եթե այդպես չլիներ, ապա Արփի Դավոյանը այդ միտքն այսօր երկրորդ անգամ չէր կրկնի:
Կարևորի մասին. Արփի Դավոյանը բավականին փոքր կալիբրի քաղաքական գործիչ է, բայց Արփի Դավոյանը դասական նիկոլիզմի շարքային ներկայացուցիչ է, հետևաբար օրինաչափ է, որ նա մտածում, խոսում և աշխատում է այսկերպ։ Դասական նիկոլիզմը մի ընդգծված առանձնահատկություն ունի՝ այն դավանողները երբեք չեն ընդունում, որ իրենք սխալվել են, երբեք իրենց վրա չեն աշխատում, երբեք չեն մեղանչում: Սա այլ կերպ կոչվում է մարտնչող տգիտություն: Երբ իրեն քաղաքական գործիչ երևակայող ցանկացածը սկսում է աղտոտել քաղաքական դաշտն ու քաղաքական պրոցեսները, արդեն հասկանում ես, թե ինչու երկրումդ այսքան խնդիրներ են վխտում, թե ինչու բոլոր ոլորտներում զրոյական առաջընթաց ու արդյունքներ են:
Կարեն Դանիելյան
