Կանխատեսելի ներքաղաքական զարգացումներ․ Փաշինյանի տեսլականը

Համաձայնեք, որ Նիկոլ Փաշինյանն այսօր թերևս իշխանության մեջ ամենաշատն է ցանկանում արտահերթ ընտրությունների գնալ։ Նա հասկանում է, որ գնալով ավելի են սրվելու հետպատերազմյան իրավիճակի հետևանքով առաջացած խնդիրները՝ անվտանգային, սոցիալական, տնտեսական և այլն, ու իշխանության խարխլված վարկանիշը մոտենալու է զրոյին, ուստի իր հավատարիմներին լծել է արտահերթ ընտրություններն ամեն գնով և հնարավորինս շուտ անցկացնելուն ուղղված աշխատանքները գլուխ բերելու գործին։ Մամուլի հրապարակումներին հետևելով՝ կարող ենք ընդգծել, որ Փաշինյանի թիմի առանցքային դերակատարներն այս հարցում միակարծիք չեն։ Տեղեկություններ կան, որ թիմային հավաքների ժամանակ Տիգրան Ավինյանն ու Արարատ Միրզոյանը բացահայտ ընդվզել են՝ Նիկոլ Փաշինյանին հասկացնելով, որ ինքը պետք է հեռանա՝ թիմին ռեսթարթի հնարավորություն տալով։

 

Աներկբա է, որ նրանք հստակ գիտակցում են, որ Փաշինյանի վարչապետության պայմաններում անցկացվելիք արտահերթ ընտրությունների արդյունքում այլևս չեն կարողանա այսօրվա ստատուս քվոն պահպանել՝ ունենալ բացարձակ մեծամասնություն։ Ուստի արտահերթ ընտրություններն անցանկալի են նրանց համար, և ակնարկել են, որ պատգամավորներից ոչ բոլորը կողմ կքվեարկեն խորհրդարանը լուծարելու նախագծին, որով գնալու են արտահերթ ընտրությունների՝ առանց Փաշինյանի հրաժարականի։ Նիկոլ Փաշինյանն էլ իրավիճակից փորձում է միայնակ կամ երդվյալ զինակիցների հետ ելքեր գտնել։ Նա յուրային իրավաբաններին է հանձնարարել ձևակերպել, թե ինչպես հնարավոր կլինի շրջանցել սահմանադրական այն դրույթը, համաձայն որի՝ Սահմանադրության մեջ պատգամավորները փոփոխություն կարող են անել միայն 3/5-ով, այսինքն՝ 88 պատգամավորի քվեարկությամբ։

 

Դրանից բացի նա կուսակիցներին հանձնարարել է մարզային այցելություններ իրականացնել և երկու շաբաթ անց իրեն զեկուցել օբյեկտիվ իրականությունը՝ մարդկանց տրամադրվածությունը, վերաբերմունքն իշխանության հանդեպ, որ հասկանա՝ այս ռեսուրսով իմաստ ունի՞ գնալ արտահերթ ընտրությունների, թե՞ ոչ։ Գործող Սահմանադրությամբ և կարգավորումներով՝ ԱԺ-ի լուծարման ճանապարհները հետևյալն են․ վարչապետը պետք է հրաժարական ներկայացնի, ապա երկու շաբաթվա ընթացքում նոր վարչապետ չընտրվի, որից հետո իրավունքի ուժով ԱԺ-ն լուծարվի։

 

Երկրորդ ճանապարհն այն է, երբ կառավարության կազմավորումից հետո՝ 20-օրյա ժամկետում, վարչապետն ԱԺ է ներկայացնում կառավարության ծրագիրը, և այն չի ընդունվում, ինչը հնարավոր չէ։ Եթե Նիկոլ Փաշինյանը, սովորության համաձայն, հերթական անգամ ոտնահարի Սահմանադրությունը և սահմանադրական փոփոխությունն անցկացնի ավելի պակաս թվով ձայներով, ապա նախագիծը կհամարվի հակասահմանադրական, և գնդակը կհայտնվի Արմեն Սարգսյանի ու ընդդիմության դաշտում։ Նախագահը կարող է չստորագրել հակասահմանադրական օրենքը, իսկ եթե ստորագրի, ընդդիմությունը կարող է այն վիճարկել Սահմանադրական դատարանում։