Չկա ընդդիմություն`չկա խնդիր
ՎԵՐԼՈՒԾՈՒԹՅՈՒՆՆԵՐ
Իսկ դուք երբևէ մտածե՞լ եք, թե որ արժանիքի համար է խորհրդարանական կառավարման երկրի պատգամավոր աշխատում Արփի Դավոյանը: Ավելին` ձեր վճարած հարկերից աշխատավարձից բացի, ամեն ամիս ստանում նաև պարգևավճար, գործուղումների գնում, մի խոսքով վայելում կյանքը: Իսկ եթե չճանաչեցիք, ու հարցնում եք, թե ո՞վ է Արփի Դավոյանը, ասեմ` իշխանական Իմ քայլը խմբակցության պատգամավոր է: Ի դեպ, վերը նշվածը վերաբերում է ցանկացածին, ով տարրական պատկերացում չունի, թե ինքն ինչու է հայտնվել խորհրդարանում: Ինչևէ, պատգամավոր Արփի Դավոյանը երեկ ելույթ ունեցավ ԱԺ ամբիոնից, ըստ էության, պատասխանելով պատգամավորներից մեկին, բառացիորեն նշեց․ «Այո ես հաստատում եմ, որ մենք ունենք լրջագույն խնդիրներ և այդ խնդիրների անունն ընդիմությունն է»։
Այո՛, ընկերներ, գուցե զարմանաք, գուցե զայրանաք, բայց իշխանական պատգամավորը հենց այդպես էլ ասել է։ Ասվածի նուրբ անկյունն այն է, որ ոչ թե ընդդիմության լավ կամ վատ, կառուցողական կամ ապակառուցողական լինելը, այլ՝ ընդդիմություն երևույթն, ըստ էության: Արփի Դավոյանը բավականին փոքր կալիբրի քաղաքական գործիչ է, որպեսզի նրա ասածն այդքան մեծ աղմուկ բարձացներ։ Խնդիրն այլ է` մարդիկ հասկանում են, որ տիկին Դավոյանի ասածը համահունչ է Նիկոլ Փաշինյանի և իր քաղաքկան թիմի մոտեցումներին։ Դրա ապացույցն էր առաջին հերթին այն, որ Քաղաքացիական Պայմանագիր կուսակցության ֆեյսբուքյան պաշտոնական էջը տեղադրեց աղմուկ բարձրացրած ելույթը: Այդ ընթացքում շատերը նաև հիշեցին, թե ինչպես էին <<Իմ քայլի>> պատգամավորները վարչապետի ներկայությամբ ծեծում ընդիմադիր խմբակցության ղեկավար Էդմոն Մարուքյանին, ով, ի դեպ, մինչ ընտրությունները իրենց ընկերը, գործընկերը և համախոհն էր։ Ավելին` 2017թ. ընտրություններին գլխավորում էր <<Ելք>> դաշինքի համամասնական ցուցակը։ Ինչո՞ւ եմ շեշտում ընկերը, որովհետև ընկերությունը բարձր արժեք է, որին աներկբայորեն պետք է ստորադասել այդրոպեական ցանկացած քաղաքական բանավեճ՝ բռնության ելքով։ Սակայն Նիկոլ Փաշինյանը այդ միջադեպից հետո ունեցավ իր հերթական գոռգոռոցներով ելույթը, որտեղ մեղադրեց ու՞մ, իհարկե, Էդմոն Մարությանին մասնավորապես, և ընդդիմությանը ընդհանրապես։
Մի հանգամանք ևս, որ այս կոնտեքստում կարևոր է` Նիկոլ Փաշինյանի իշխանությունը զանգվածային լրատվության միջոցներին ամենաշատ դատի տված, տարատեսակ եղանակներով ճնշած և ահաբեկած իշխանություն է երբևէ եղածների մեջ։ Նախկին լրագրող և խմբագիր վարչապետը շատ լավ գիտի լրատվության դերը, նշանակությունը և ազդեցությունը, հետևաբար՝ ոչ յուրայիններին նա համարում է նախ և առաջ վտանգավոր իր իշխանության համար, ապա նաև յուրատեսակ ընդդիմություն, որին կարելի է լռեցնել, իսկ հարկ եղած դեպքում` նաև ծեծել։ Ասել կուզի` իշխանության ներկայացուցիչները իրենց պատկերացումներում ամենքին ու ամեն ինչ բնազդով համարում են ընդդիմություն, հետևաբար նաև սպառնալիք իրենց իշխանության պահպանմանը և անխնա պայքարում են դրա դեմ։
Ինչև վերադառնանք Արփի Դավոյանի մտքի փայլատակումներին։ Տիկին Դավոյանի արտահայտած միտքը հակաքաղաքագիտական է, ամոթալի, հակաժողովրդավարական, հակաքաղաքագիտական…, ոնց ուզում եք մեկնաբանեք։ Այդուհանդերձ, տիկին Դավոյանը մի տեսանկյունից ճիշտ է։ Եթե դասական ընդդիմության մասին մեր պատկերացումները գոնե 50 տոկոսով համահունչ լինեին Հայաստանի ընդդիմության հետ, ապա Արփի Դավոյանը ոչ միայն երբևէ հնարավորություն չէր ունենա Ազգային Ժողովում ելույթ ունենալ, այլև նույնիսկ չէր մտածի զբաղվել քաղաքականությամբ, կամ որ ավելի ճիշտ է` զբաղվել քաղաքականության խեղմամբ, հարամմամբ։
Բուն խնդիրը. Արփի Դավոյանը, նրա թիմի գերակշիռ մասն առհասարակ, խնդիրների խնդիր ոչ թե պետք է համարեին ընդիմության գոյությունը, այլ գերիների վերադարձման հարցը, խնդիր պետք է համարեին Հայաստանի սահմանների անձեռմխելիության և անվտանգության հարցը, Արցախի կարգավիճակի հարցը, գահավիժող տնտեսությունը կոմայից դուրս բերելու հարցը, երկիրն այս աղետալի վիճակից հանելու հարցը, մարդկանց անընդմեջ բարոյահոգեբանական սթրեսի չենթարկելու հարցը։ Բայց դե ինչ կարիք կա ծանրաբեռնել սեփական միտքը, ծախսել ժամանակ նման հարցերի համար, կարելի է ընդամենը լուծել ընդիմադիրների խնդիրը և մնացած բոլոր խնդիրների մասին բարձրաձայնող այլևս չի գտնվի։ Չկա ընդդիմություն` չկա խնդիր: Արփի Դավոյանը դասական նիկոլիզմի շարքային ներկայացուցիչ է, հետևաբար օրինաչափ է, որ նա մտածում, խոսում և աշխատում է այս կերպ։ Դասական նիկոլիզմի մասին հաջորդիվ:
Կարեն Դանիելյան
