Փրկիչ, տուր մեզ մեր պարգևավճարը
ՎԵՐԼՈՒԾՈՒԹՅՈՒՆՆԵՐ
Երբ ներկայիս իշխանությունները նախկին իշխանությանը մեղադրում են կոռուպցիայի ու թալանի մեջ, մի դրվագ գրեթե բոլորի աչքի առջևով անցնում է` պարգևավճարները: Իրականում ոչ ոք չի վիճարկում այն գաղափարը, որ պետական պաշտոնյաները պետք է բարձր վարձատրություն ստանան: Բայց կա մի մեծ բայց: Մինչ իշխանության գալը, դիցուք, Նիկոլ Փաշինյանը համարում էր, որ Հայաստանը աղքատ երկիր է, ժողովուրդն աղքատ է, հետևաբար պաշտոնյան չի կարող լավ ապրել աղքատ երկրում: Մեծ հաշվով ճիշտ էր ասում Նիկոլ Փաշինյանը: Օրինակ նա ասում էր, որ Հայաստանը պադավատապետություն է, որ անընդունելի է նման քանակի ծառայողական մեքենաների գոյությունը, նույնիսկ քննադատում էր տոն օրերի համար պետական ծառայողներին հավելավճարների տրամադրելը` նշելով, որ զուգահեռ իրականությունում մարդիկ կան հացին կակա են ասում:
Առհասարակ Նիկոլը շատ երևույթների էր դեմ` արագաչափեր, կարմիր գծեր, Կուտակային կենսաթոշակային համակարգ, ՀԱՊԿ, ԵԱՏՄ… Բայց ինչպես ասում են իշխանությունը քաղցր բան է ու մոռացնել է տալիս նախկինում ասածն ու արածը: Իշխանության գալով` Նիկոլ Փաշինյանը ոչ մի բան չի արել, բացարձակ ոչ մի բան: Երկրում ֆունդամենտալ որևէ բարեփոխում տեղի չի ունեցել: Եթե այն ժամանակ որևէ նախարարի բարեկամն էր տենդեռ շահում, հիմա էլ է նույնը, եթե էն ժամանակ արագաչափերը Սաշիկինն էին, ու նա թալանում էր ժողովրդին, հիմա էլ պարզվեց Սաշիկինը չի, բայց արագաչափերը շարունակում են թալանել ժողովրդին: Երկար ցանկ կարող ենք թվարկել, սակայն վերադառնանք այդքան սիրված պարգևատրումների թեմային: Ի՞նչ է պարզվում` Ազգային ժողովի պատգամավորներն ու աշխատակազմը 2020 թ. սեպտեմբերին ևս ստացել են պարգևատրում՝ ամսական պաշտոնային դրույքի 75 տոկոսի չափով: Փաստորեն, կապ չունի երկիրը COVID-19 համավարակի շարունակվող հետևանքներից հյուծված է, երկրում տնտեսական անկում և խորացող սոցիալական ճգնաժամ է, կարևորը պաշտոնյաները պարգևատրումները պետք է անխափան ստանան:
Պատերազմական առաջին օրերին ԱԺ 131 պատգամավորները նախորդ տարվա սեպտեմբերին ստացել են շուրջ 65 միլիոն դրամ պարգևատրում, 87 միլիոն դրամ աշխատավարձ,միասին՝ 152 միլիոն դրամի չափով վարձատրություն: Մեկ պատգամավորի հաշվով վարձատրությունը սեպտեմբերին կազմել է 1 միլիոն 160 հազար դրամ, որը շուրջ 37 անգամ գերազանցում է անապահով մեկ ընտանիքին տրամադրվող ամսական նպաստի միջին չափը: Այսպիսով՝ 2020 թ. սեպտեմբերին ԱԺ պատգամավորներն ու աշխատակազմը ստացել են 192 միլիոն դրամի չափով (շուրջ 400.000 դոլար) պարգևատրում:
Նիկոլ Փաշինյանի կողմնակիցները, համախոհները հաճախ վարչապետին բնորոշում են որպես փրկիչ, ով եկավ և իրենց փրկեց ստրկությունից: Իհարկե, այս հիվանդագին մոտեցումն ու կարծիքը իրականության հետ որևէ աղերս չունի, բայց նման թեզի գոյության օրինաչափությունը բացատրվում է նրանով, որ բազմաթիվ անդեմ պաշտոնյաների համար Նիկոլ Փաշինյանն իսկապես փրկիչ է: Բայց ժամանակի ընթացքում Փաշինյանի պետական կառավարման բուրգը սկսեց հարմար տեղավորվել տաք բազկաթոռներում ու սկսեց կարծել, որ ամեն ինչ արդար է և ինքը իրավունք ունի ամեն ամիս` անկախ պատերազմից, սովից, համաճարակից, պարգևավճար ստանալիս, քանի որ իրենք Հյաստանի պատմության մեջ ամենալեգիտիմ կառավարությունն են: Հիմա Նիկոլ Փաշինյանն արդեն չի կարող չտալ պարգևատրումները, պարզապես չի կարող, քանի որ այդ նույն իր ստեղծած համակարգը կսկսի խժռել իրեն:
Անի Առաքելյան
