Կախարդական փայտիկի առեղծվածը
ՎԵՐԼՈՒԾՈՒԹՅՈՒՆՆԵՐ
Վարչապետի պաշտոնը ստանձնելուց հետո, Նիկոլ Փաշինյանը մի առիթով հայտարարեց, թե կախարդական փայտիկը կա, գտնվել է ու շուտով այն իր արարչագործությունները կսկսի անել: Իհարկե, հանրությունն այդպես էլ չտեսավ ու չզգաց փայտիկի ուժով վերածնվող ու զարգացող տնտեսության ազդեցությունն իր մաշկի վրա, սակայն էականը դա չէ: Էականն այն է, որ պետք է ասվեն սիրուն խոսքեր ժողովրդին սիրաշահելու և որոշակի ժամանակահատված ոչինչ չանելու բացը լրացնելու համար: Այլ կերպ ասած չկա ոչ մի կախարդական փայտիկ, ավելին` չկա նույնիսկ տարրական արհեստավարժություն տնտեսական ակտիվություն խթանելու համար:
Ներկա իշխանություններին օբեկտիվորեն մեղադրում են պոպուլիզմի մեջ, քանի որ շուրջ 3 տարվա մեջ հարյուրավոր ձեռքբերումներ ներկայացվեցին հանրությանը /վարչապետի 100 փաստ ներկայացումները վկա/, բայց դուրս գանք փողոց և մի փոքր հարցախույզ անցկացնենք: Օբեկտիվ պատկերը միանգամից տեսանելի կլինի:
Առհասարակ վերջին տասնամյակում, իսկ վերջին 3 տարում մասնավորապես, Հայաստանում օտարերկրյա ներդրումների ծավալներն ըստ տարիների կամ չնչին են եղել, կամ առհասարակ չեն եղել: Ավելին` Հայաստանից կապիտալի արտահոսքը մեծ ծավալներ է ընդգրկել: Կորոնավիրուսի և Արցախում պատերազմի արդյունքով պայմանավորված Հայաստանի սոցիալ-տնտեսական վիճակը օր-օրի վատթարանում է: Դրամի արժեզրկումը, առաջին անհրաժեշտության ապրանքների թանկացումները, բեզնինի, էլեկտրաէներգիայի գների բարձրացումը երկիրը աստիճանաբար ներքաշում են տնտեսական խորը ճգնաժամի մեջ: Խայտառակ իրողություն է, որ Հայաստանում Ա կետից Բ կետ տեղաշարժվելու համար, հնարավոր է մարդը խնդիրներ ունենա թշնամական պետության զինվորների հետ, ընդհուպ մինչև գերի ընկնի: Խոսքը Գորիս Կապան ավտոճանապարհի մասին է, որի 21 կմ-ը վերահսկվում է ադրբեջանական զինված ուժերի կողմից:
Սա Հայաստանում առկա խնդիրներից մեկն է, ու խելամիտ չէ կարծել, որ որևէ ներդրող կուզի նման երկրում փող ներդնել, բիզնեսով զբաղվել: Կախարդական փայտիկի առեղծվածն այդպիսին էլ կմնա, ու մենք երբեք էլ երևի չիմանանաք, թե ինչու ՀՀ վարչապետը չօգտագործեց դրա ամենակարող ուժը: Ուղղակի ափսոս էր երկիրը, որի պոտենցիալն ու առկա ռեսուրսները մսխվեցին հաշված տարիների ընթացքում ու շարունակում է մսխվել պոպուլիզմի ու հանցավոր անգործության ճիրաններում:
Անի Առաքելյան
