«Բառադի» երկիր դարձած Հայաստանս
ՎԵՐԼՈՒԾՈՒԹՅՈՒՆՆԵՐ
Օրերս մի տեսանյութ տարածվեց, և բոլորս տեսանք, թե ինչպես է իրեն ադրբեջանցի բլոգեր հռչակած մարդը հանգիստ շրջում հայ հասարակության շրջանում և սեփական նկարահանումներն իրակացնում։ Այսօր արդեն վստահաբար կարող ենք արձանագրել, որ Նիկոլ Փաշինյանը Հայաստանը թուրքի ոտքի տակ դարձրեց փալաս: Շարքային ադրբեջանցին աներկյուղ, անցնցում հատում է հայ-ադրբեջանական պետական, սույն պարագայում` թշնամական սահմանը, հայտնվում է Կապան քաղաքում և նույն աներկյուղությամբ ու առանց ցնցվելու թշնամու երկրում հեռախոսով նկարահանումներ է անում իր բլոգի համար: Փողոցներում ադրբեջաներեն լսելի ձայնով դիմում է իր ադրբեջանցի հետևորդներին, նրանց կարոտաբաղձ ցանկությամբ նկարահանում այս կամ այն շենքը, իր բլոգի միջոցով ուղարկում նրանց` համապատասխան գրառումներ կատարելով:
Փաստենք, որ այս ամենը տեղի է ունենում բոլորիս աչքի առաջ՝ օրը ցերեկով, ազատ ու անկաշտկանդ, հայերենով զրուցելով տեղացիների հետ՝ շենքերի ու փողոցների տեղերը ճշտում: Իսկ միամիտ տեղացին, որ կարծում է իր անվտանգությունն ապահովող պետություն ունի: Ենթադրենք, ինչ-որ տեղ նաև ընդունենք քաղաքի ոստիկանությունը, անվտանգության աշխատակիցները քնած են, վստահ են, որ թշնամական երկրից հավքն իր թևով, օձն իր պորտով չի կարող թափանցել իրենց սահմանամերձ քաղաք: Իսկ սահմանին նույնպե՞ս քնած են նույն հանգստությամբ: Չէ՞ որ մեզ հավատացնում են, թե Սյունիքի սահմանը հսկում են ռուս սահմանապահներն ու խաղաղապահները և մեր դիրքապահները: Եթե այդպես է, էլ ինչպե՞ս կարողացավ ադրբեջանցի բլոգերը, որը վստահաբար չի տիրապետում աճպարարական հնարքների ու շամանական թմրեցումների, այդքանի միջով թափանցել, չէ՛, ուղղակի քայլել Ադրբեջանից Հայաստան և նկարահանումներ անել: Այդպես մեզ ծաղրել ու նվաստացնել, ոտքերի կեղտը սրբել մեր պետության ու պետականության հնարավորությունների վրա ինչպես փալասի և նորից ուղղակի քայլել իր առայժմ փուչիկի պես փքվող երկիր:
Հավելենք, որ Իլհամ Ալիևն իր հերթին, բռունցքն օդում թափահարելով, խոսում է, թե հայե՛ր, «երկաթե բռունցքն իր տեղում է, ձեզ խելոք պահեք»: Սա այն առիթով, քանի որ մեր արտգործնախարարը համարձակվել է առանց ինքնահռչակ խանի թույտվության մտնել իր տարածք` Արցախի մայրաքաղաք Ստեփանակերտ: Մի կրկեսի ապուշ, որ մանեժում գոռգոռում է և իրեն թվում է, թե հանդիսատեսին հիացնող առյուծ է: Մեկը, որ Արցախի գրաված հողում հայկական տառերով գետնած ցուցանակ տեսնելով՝ աուլի լամուկի գետնաքարշությամբ վազվզում է, կանգնում վրան և նկարվում: Իսկ եթե ավելի լուրջ՝ Չաուշօղլուն ձեռի հետ շպրտում է, թե հիմա կարող են Թուրքիայի սահմանը բացել Հայաստանի հետ, քանի որ Ղարաբաղի հարցը լուծված է և այլևս խոչընդոտ չկա: Մեր արյան համը, որ դեռ տաք է թուրքի պռոշներին, ասում է, թե լավ բան է անում հայերի համար: Նպատակն է Հայաստանը ճզմել ներսից վերջնականապես. թուրքը դրսից, թուրքը ներսում: Ինչ ուզեն կանեն, իրենք են ուզողն էլ, չուզողն էլ: Էրդողանն իր մանկլավիկներով, Ալիևն իր մանկլավիկներով խմբերգ են տալիս։
Անդրանիկ Կիրակոսյան
