Չինաստանը արգելափակում է ԱՀԿ-ի մասնագետների մուտքը երկիր
ՀԱՍԱՐԱԿՈՒԹՅՈՒՆ
dw.com-ն գրում է, որ Առողջապահության համաշխարհային կազմակերպության (ԱՀԿ) փորձագետների մուտքը Չինաստան, որոնք մտադիր են հետաքննել SARS-CoV-2 վիրուսի ծագումը, Պեկինը կրկին հետաձգել է: Այդ մասին լրագրողների հետ զրույցում ասել է Չինաստանի արտգործնախարարի մամուլի քարտուղարը.
«Մենք պետք է հաղթահարենք մի շարք դժվարություններ, որպեսզի ավարտենք ներքին ընթացակարգերը և լավ պայմաններ ստեղծենք Չինաստան ժամանող մասնագետների համար»,- շեշտել է նա ավելացնելով, որ Չինաստանի կառավարությունը շարունակում է խորհրդակցել ԱՀԿ-ի հետ և հարցը ոչ միայն վիզաներն են, այլ նաև որոշակի հանդիպումների նախապատրաստման աշխատանքները:
Ինչո՞ւ է Չինաստանը հրաժարվում ԱՀԿ-ի փորձագետների մուտքից: ԱՀԿ գլխավոր տնօրեն Թեդրոս Ադանոմ Գիբրեյեսուսը, ելույթ ունենալով Ժնևում, ասել է, որ Չինաստանը վերջին պահին է հրաժարվել կազմակերպության մասնագետների մուտքից: Ըստ ԱՀԿ արտակարգ իրավիճակների ծրագրերի համակարգող Մայքլ Ռայենի մուտքի մերժման պատճառը եղել է փորձագետների որոշ փաստաթղթերի բացակայությունը, որը Պեկինը նրանցից պահանջել է վերջին պահին:
ԱՀԿ մասնագետների կողմից Չինաստանում կորոնավիրուսի ծագման վերաբերյալ ուսումնասիրություն իրականացնելու շուրջ բանակցությունները Պեկինի հետ սկսվել են մի քանի ամիս առաջ: Սակայն դրանք շատ դանդաղ են առաջ գնում: Խմբի յուրաքանչյուր անդամ պետք է անհատական աշխատանքի թույլտվությունը ստանա չինական կողմից: Չինաստան գործուղման ընթացքում ԱՀԿ աշխատակիցները, ի միջի այլոց, մտադիր են այցելել Ուհան քաղաք, որտեղ առաջին անգամ հայտնաբերվել է նոր կորոնավիրուսը: Միևնույն ժամանակ, վերջերս Չինաստանի իշխանությունները ավելի ու ավելի հաճախ են տեղեկատվություն տարածում այն մասին, որ SARS-CoV-2 վիրուսը գոյություն է ունեցել այլ երկրներում, նույնիսկ մինչ դրա հայտնաբերվելը 2019 թվականի դեկտեմբերին Չինաստանում: Որպես այդ տեսության ապացույց չինացի մասնագետները նշում են սառեցված մթերքների մեջ վիրուսի հետքերի առկայությունը:
Նյութը հրապարակման պատրաստեց Կամո Խաչիկյանը
