Նիկոլիզմից ազատվելու այլընտրանքային տարբերակը
ՎԵՐԼՈՒԾՈՒԹՅՈՒՆՆԵՐ
Այս օրերին ՀՀ իշխանություններն, ակտիվացել են «Ընտրական օրենսգրքի» փոփոխությունների առումով աշխատանքները: Ըստ էության, Նիկոլ Փաշինյանը փորձելու է արտահերթ խորհրդարանական ընտրությունների միջոցով կայունացնել իրավիճակը երկրում՝ այնպես, ինչպես ինքն է դա ընկալում: Դա, բնականաբար, չպետք է թույլատրել, որովհետև փաշինյանական կայունությունը պետականության դանդաղ կորստի կայունությունն է: Դա առավել ակնհայտ երևում է Սյունիքի առանձին բնակավայրերի տարածքների հանձնման գործընթացներում, ինչն, ըստ փորձագետների, շարունակվելու է՝ շարժվելով դեպի հյուսիս: Չթույլատրելու տարբերակներից մեկը ընտրությունների համազգային բոյկոտն է, ինչը կիրառվել է նախկինների օրոք, թեև հաջողություն չի ունեցել: Բայց հաշվի առնելով, որ մենք այժմ ապրում ենք այլ իրողությունում, ապա իշխանություններն ուզեն թե չուզեն՝ պետք է հաշվի նստեն ՀՀ ընտրողների դիրքորոշման հետ:
Սակայն նախքան արտահերթ ընտրությունները Փաշինյանի հեռացումը պահանջող հանրությունը պետք է տոնական օրերից հետո ակտիվացնի «Նիկոլին մերժելու» փողոցային գործընթացը: Այստեղ, սակայն, շատ կարևոր է փողոցային ակտիվությունը զուգակցել անգլիական պարլամենտարիզմի մի հետաքրքիր գործընթացով՝ «ստվերային» կառավարության ձևավորմամբ: Ի դեպ, դրա մասին խոսել է նաև Հայրենիքի փրկության շարժման կողմից վարչապետի միասնական թեկնածու առաջադրված Վազգեն Մանուկյանը: Սակայն լրագրողի հարցին ի պատասխան Մանուկյանի խոսքից երևաց, որ ինքն այդքան էլ չկարևորեց այդ գործընթացը հենց շարժման համատեքստում, ընդհակառակը, նշեց, որ այդ կառավարության անդամները կբախվեն ինչ-ինչ խնդիրների:
Ըստ էության, այնուամենայնիվ, արժե քննարկել այդ հարցը շարժման անդամ կուսակցությունների ղեկավարների հետ: Եվ համաձայնության դեպքում Մանուկյանը պետք է փորձի նախագծել «ստվերային» ժամանակավոր կառավարության կազմը, ու այն հանրահավաքային օրերից մեկում ներկայացնել հանրությանը: Հասկանալի է, որ դրանից հետո այդ կառավարության անդամները կենթարկվեն հարձակումների իշխանության և նիկոլապաշտ հանրության ու ֆեյքային բանակի կողմից, սակայն հանուն հայրենիքը Փաշինյանից ազատելու հրամայականի կարելի է նաև ենթարկվել նման փորձության: «Ստվերային» ժամանակավոր կառավարության կազմում պրոֆեսիոնալ հայրենասերների լավագույն ընտրության դեպքում դա կբերի սոցիոլոգիայում հանրահայտ գահավիժող ձնագնդի էֆեկտի: Ի դեպ՝ այս գործընթացը չպետք է սահմանափակվի զուտ նախարարներ նշանակելով: «Ստվերային» այդ կառույցը պետք է նախագծի Հայաստանը բարդագույն իրավիճակից դուրս բերելու ծրագրեր, նախարարներից յուրաքանչյուրն իր կողմից պետք է ներկայացնի ոլորտային փոփոխությունների մեկամյա ծրագիր, կազմակերպվեն դրանց քննարկումները տարբեր հարթակներում:
Անհրաժեշտության դեպքում «ստվերային» նախարարը կարող է հրապարակային բանավեճի մեջ մտնել փաշինյանական կառավարության համապատասխան նախարարի հետ՝ քննադատելով նրա որոշումներն ու առաջարկելով այլընտրանքային տարբերակը: Ներկայացված առաջարկի իրագործման դեպքում Հայաստանը մոտակա ամիսներին կունենա իրական և վիրտուալ իշխանություններ, ինչը կվերափոխվի իրական երկիշխանության, իսկ հետո Փաշինյանի իշխանությունը կհեռանա: Այս ամենը բնավ չի նշանակում, թե փողոցային ակտիվությունը պետք է նվազեցվի, ընդհակառակը, այն անընդհատ պետք է թեժացվի, իսկ առաջարկվող գործընթացը կունենա իր ազդեցություն այդ թեժացման վրա: Արդյունքում, մեկը մյուսին էներգիա մատակարարելով, կբերեն հաղթանակի ընդդեմ նիկոլիզմի:
Անդրանիկ Կիրակոսյան
