Գլխապտույտ զարգացումներ Արցախում
ՎԵՐԼՈՒԾՈՒԹՅՈՒՆՆԵՐ
Ինչպես տեղեկացնում են տարբեր լրատվամիջոցներ, Ստեփանակերտի օդանավակայանը պատրաստ կլինի աշխատանքի դեկտեմբերի 25-ին։ Հայտնի է դարձել, որ Արցախից արգելվում է 18-55 տարեկան տղամարդկանց ելքը, իսկ մյուս քաղաքացիներին թույլատրվում է ելքի վիզա ստանալ։ Հարց է առաջանում՝ ի՞նչ են պատրաստվում անել Ղարաբաղի ու ղարաբաղցիների հետ։ Քայլերի տրամաբանությունը վկայում է, որ կոնկրետ նպատակներ են հետապնդվում՝ Արցախն ամբողջությամբ պոկում են Հայաստանից՝ բացելով տարածաշրջանի լոգիստիկան։ Մասնավորապես, կբացեն օդանավակայանը, կլինեն չվերթներ դեպի Ռուսաստան։ Ըստ էության՝ Ղարաբաղյան պատերազմը նաև տարածաշրջանային լոգիստիկայի փոփոխության պատմություն է։
Անկարան ու Մոսկվան սկսում են «բացել» տարածաշրջանը, ի վնաս Իրանի ու Հայաստանի։ Փաստացի, Թուրքիան ու Ռուսաստանը չեն թաքցնում Հայաստանն Իրանից բաժանելու, Հայաստանի տարածքով Նախիջևանից ճանապարհի անցկացման մտադրությունը, և հենց դրանով է պայմանավորված Սյունիքում «դեմարկացիան»։ Արդեն խոսում են, որ Բաքուն դեմարկացիայի ժամանակ կստանա նաև «Մեղրիի միջանցքը»։ Չմոռանանք նաև, որ բացի այդ, Բաքուն արդեն մի քանի ճանապարհ է կառուցում Ղարաբաղի տարածքում՝ Հորադիզից Հադրութով դեպի Շուշի։ Ալիևը խոստանում է երկաթուղի կառուցել մինչև Ստեփանակերտ։ Բաքուն դեմ չէ նաև Ստեփանակերտի օդանավակայանի գործարկմանը։
Այս ամենի արդյունքում Հայաստանը կհայտնվի լիակատար մեկուսացման մեջ՝ սահման ունենալով միայն Թուրքիայի և Ադրբեջանի հետ, իսկ Արցախը կդառնա մեծ «կայարան» Մետաքսի ճանապարհի թուրքական հատվածի վրա։ Բայց դրա համար Արցախում պետք է լինի որոշակի թվով հայ բնակչություն, և դա կապահովի Ռուսաստանը, որը կբացի նրա համար «օդային փականը»։ Նոյեմբերի 9-ի հրադադարի հաստատումից հետո Հայաստանի ու Արցախի իշխանություններն սկսեցին կոչ անել արցախցիներին վերադառնալ տուն։ Հենց «կրիտիկական մեծամասնությունը» վերադարձավ, իշխանությունները որոշեցին սահմանափակել տղամարդկանց ելքը երկրից։ Արցախիցները դեռ դուրս չեն եկել շոկից և ընդունում են բոլոր անմիտ որոշումները, որոնք կայացվում են Բաքվում, Անկարայում, Մոսկվայում, Աղդամում և լուռ «ստորագրվում» Երևանում։ Ստեփանակերտում դժվար է որոշել, թե ով է իշխանությունը։
Անդրանիկ Կիրակոսյան
