Դատարանի որոշմամբ դադարեցվել է ԵՊՀ ռեկտորի պաշտոնակատարի լիազորությունները
ՎԵՐԼՈՒԾՈՒԹՅՈՒՆՆԵՐ
Օրերս Երևան քաղաքի ընդհանուր իրավասության դատարանը ԵՊՀ ռեկտորի պաշտոնակատար Գեղամ Գևորգյանի լիազորությունները դադարեցնելու որոշում է կայացրել:
Հայցի հիմքում ընկած էր փաստը, որ Գեղամ Գևորգյանը իր պաշտոնի հետ անհամատեղելի՝ վճարովի աշխատանք է իրականացնում, քանի որ 2017 թվականից հանդիսանում է «Էվոկաբանկ»-ի խորհրդի անդամ, իսկ 2019 թվականի սեպտեմբերից Գևորգյանը նույն բանկի խորհրդի նախագահի տեղակալն է։ Խնդիրն այն է, որ Հիմնադրամների մասին օրենքի 27-րդ կետով սահմանվում է, որ եթե ԵՊՀ ռեկտորը կամ ռեկտորի ժամանակավոր պաշտոնակատարը զբաղեցնում է այլ՝ վճարովի պաշտոն, ապա նա պետք է տեղյակ պահի հոգաբարձուների խորհրդին, և հոգաբարձուների խորհուրդը պետք է համաձայնություն տա։ Մյուս կողմից «Էվոկաբանկ»-ի կանոնադրությունում նշված է, որ բանկի խորհրդի անդամները վճարվում են ամսական կտրվածքով, բացի աշխատավարձից, ստանում են նաև պարգևատրումներ: Այսինքն՝ ներկայացված փաստերը խոսում են այն մասին, որ Գեղամ Գևորգյանը վճարովի աշխատանք է իրականացրել «Էվոկաբանկ»-ում՝ միևնույն ժամանակ բուհի ղեկավարի պաշտոնակատարի հաստիքն է զբաղեցրել, որը, փաստորեն, օրենքով չի թույլատրվում։ Եթե մեկ ամսվա ընթացքում վճիռը չբողոքարկվի, այն կմտնի օրինական ուժի մեջ, որից հետո պետք է ԵՊՀ-ում ևս նոր ռեկտորի պաշտոնակատար ընտրվի կամ ռեկտոր ընտրվի:
Ի դեպ, կառավարության վերջին նիստի ժամանակ ԿԳՄՍ նորանշանակ նախարարի Տնտնեսագիտական համալսարանի ռեկտոր նշանակելու առաջարկը ևս դուրս մնաց օրակարգից, դատական հայց լինելու պաճառով:
Ստացվում է, որ բուհերի ղեկավարումը ևս դարձել է օրակարգային հարց, որի պատճառով կառույցների բնականոն աշխատանքը կարող է խաթարվել: Հուսանք, որ մայր բուհի շուրջ ստեղծված վեճը չի երկարի. հակառակ դեպքում ԵՊՀ-ում ևս անորոշ ժամանակով կսկսվի անկառավարելիության մթնոլորտ, որի պատճառով տուժում է ուսանողը:
Արմինե Գրիգորյան
