Վարչապետ կոչեցյալը մանիպուլյացիայի է ենթարկում․ պատերազմը չի ավարտվել, թիրախում Գորիս-Կապան հատվածն է. Դավիթ Ջամալյան

Ադրբեջանական կողմը անգամ փոքրիկ` 5 կմ-անոց հատվածում մեզ ուզում է ակցանի մեջ առնել , հնարավորինս մեծացնել, լայնացնել շրջափակման օղակը, հիմա իրենք միջանցքի աջ թևից փորձում են ակցանը լայնացնել: Այս մասին Tert.am-ի հետ զրույցում ասաց ռազման փորձագետ Դավիթ Ջամալյանը՝ անդրադառնալով հարցին, թե ինչ զարգացումներ են սպասվում՝ հաշվի առնելով, որ Հին Շեն համայնքը հակառակորդի կողմից շրջափակման մեջ է:

«Պատերազմը չի ավարտվել, չի ավարտվելու: Պետք է առաջիկայում պատրաստ լինել  առնվազն տեղային բնույթի մարտերի ոչ միայն Արցախի սահմանում, այլև Սյունիքի հարավարևելյան հատվածում. Գորիս-Կապան հատվածն է թիրախում: Զարգացումները շատ տագնապալից են: Մենք հնարավորություն ունենք իրավիճակը շտկելու մեր դաշնակիցների հետ համատեղ, եթե այստեղ՝ մեր երկրում, լինի պետականակենտրոն կառավարություն, որպեսզի հնարավոր լինի դաշնակիցների հետ վստահության մթնոլորտը վերականգնել, հետո էլ օպերատիվ հարցերը լուծել»,- ասաց նա:

Դավիթ Ջամալյանի խոսքով՝ սահմանների ճշգրտումը GPS-ի միջոցով պարզապես խայտառակություն է: «Սահմանների դեմարկացիա ասվածը տարիների խնդիր է, հատուկ ձևավորվող հանձնաժողովներ են աշխատում, միլիմետր առ միլիմետր չափում են։ Եթե իրականությանը համապատասխանում այն, որ դա արվում է GPS-ի միջոցով, սա պարզապես դավաճանություն է: GPS-ով իրենք ամեն ինչ կարող են ցույց տալ իբրև իրենցը: Մենք երկիր ենք կորցնում մեր աչքի առջև: Երեկ վարաչպետ կոչեցյալն ասում է՝ մեր սահմաններին ոչինչ չի սպառնում, էլի մանիպուլյացիաների է դիմում: Հարց․ այդ միջազգայնորեն ճանաչված սահմանները GPS-ով եք չափելո՞ւ, թե գեոդեզիայի սկզբունքներին համապատասխան հատուկ հանձնաժողովով»,- ասաց նա:

Դավիթ Ջամալյանը նաև ընդգծեց, որ Հին Թաղեր համայնքը հակառակորդի տիրապետության տակ անցել է, ինչ-որ նոր դավադիր պայմանավորվածության արդյունքում, որի մասին հանրությանը չեն ասում: Ըստ նրա՝  հարց է, թե խաղաղապահներին ինչ փաստաթուղթ են ցույց տվել: