Նիկոլյան «տուպիկ»
ՎԵՐԼՈՒԾՈՒԹՅՈՒՆՆԵՐ
Այսօր ունենք մի իրավիճակ, որ Նիկոլը չի տիրապետում իրավիճակին ոչ միայն վարչապետի մակարդակով, այլև լրագրողի հայացքով: Լրագրող Նիկոլն անհամեմատ ավելի խելամիտ լուծումներ կառաջարկեր երկրում ստեղծված իրավիճակից դուրս գալու համար որպես ելք, քան կարող է տեսնել ու իրագործել դրանք վարչապետ Նիկոլը: Չի տիրապետում ինքն իրեն` միայն մեկ բացառության, որ բոլոր ճիգ ու ջանքերն ուղղել է վարչապետի իր տեղը` այս դեպքում աթոռը պահպանելուն, առանց սույն պաշտոնի դիրքն ու նշանակությունը կարևորելու: Իրատեսորեն գիտակցում է, որ աթոռ կորցնելը չի նշանակում սոսկ պաշտոնանկ լինել: Ըստ էության՝ Նիկոլը միայն այս պատերազմում չէ, որ պարտվել է` անկախ դրդապատճառներից, բուն պատերազմական գործողությունների հրահանգավորումից և հանգուցալուծումից: Նիկոլը նախ պարտվել է այն քաղաքական, պետական ու զինվորական գործիչներին, որոնց հետ դատաստան էր տեսնում, այն քաղաքականությանը, որ իրականացնում էր երկրի ներսում և այն քաղաքականությանը, որ վարում էր երկրից դուրս:
Նիկոլը դատում էր 2016-ի պատերազմի համար, Նիկոլին դատելու են 2020-ի պատերազմի համար: Նիկոլը հիմա հեռակա կերպով իրեն զգում է դատարանում և ինքնապաշտպանվում է, և իր դատապաշտպանը հենց ինքն է: Մեղադրում է բոլորին և ամեն ինչ, շնչավոր ու անշունչ, լինեն վերևում, թե ներքևում, անկախ նրանից` հասարակությո՞ւն են, թե՞ հասարակական դիրք վայելող: Միակ արդարն ինքն է և միայն ինքն ունի քարեր շպրտելու իրավունք բոլորի վրա, բայց իր վրա` ոչ ոք: Այդ ճանապարհին նա պատրաստ է ցանկացածին զոհ տալ հանուն իր փրկության: Սա թող նկատի ունենան իր թիմակից մերձավորները:
Փաստացի Նիկոլն այդպես մեղադրում էր նաև լրագրող ու խմբագիր ժամանակ, բայց դա ընկալվում էր որպես երկրի պաշտպանություն, ոչ թե ինքնապաշտպանություն: Դատում էր իշխանության գալու հենց սկզբից, բայց այն ժամանակ ինքը դատարանում դատավոր էր, իսկ հիմա մեղադրյալ: Դատավոր էր, քանի որ ուներ հանրային մեծ աջակցություն, հիմա մեղադրյալ է, որովհետև մենակ է: Եթե ժողովուրդը դուրս չի գալիս փողոց, չի փակում ճանապարհներ և կաթվածահար չի անում երկիրը, դեռ չի նշանակում, որ հաճելի է Նիկոլի ներկայությունը որպես վարչապետ: Մարդիկ շոկի մեջ են, սգի մեջ են և չեն կողմնորոշվում` ինչ անեն, որ մասը կորցրած հայրենիքը հանկարծ ամբողջովին չկորցնեն: Այս անորոշությունը, ընկճվածությունը չպետք է գրանցել հոգուտ Նիկոլի հաշվին: Լրագրող Նիկոլն ավելի կշիռ ուներ, քան վարչապետ Նիկոլը և հիմա երկրորդն է երանի տալիս առաջինին: Ես պարտք չեմ համարում ասել` հեռացիր, հեռանալն իր պարտքն է:
Անդրանիկ Կիրակոսյան
