Մենք պետք է գնանք միջազգային քրեական տրիբունալների պահանջի ճանապարհով. Նազելի Վարդանյան
ՀԱՍԱՐԱԿՈՒԹՅՈՒՆ
Արցախի դեմ սանձազերծված ադրբեջանա-թուրքական ահաբեկչական պատերազմի ժամանակ հակառակորդի կողմից իրականացված գործողությունները միջազգային օրենքի խախտում են: Մասնավորապես՝ բնակելի թաղամասերի արգելված զինատեսակներից հրետակոծումը, հիվանդանոցների, բուժկետերի, շտապ օգնության մեքենաների գնդակոծումը, գերիների հանդեպ իրականացվող անմարդկային գործողությունները, ֆոսֆորային զենքի օգտագործումը: Ուստի այս ամենը միջազգային կառույցներին ներկայացնելուց զատ հարկավոր է քրեական գործեր հարուցել միջազգային մակարդակով և պատասխանատվության ենթարկել ագրեսոր երկրին:
Փաստաբան Նազելի Վարդանյանը 1or.am-ի հետ զրույցում նշեց, որ ագրեսիան ՄԱԿ-ի կանոնադրությամբ և բանաձևերով նույնպես համարվում է ռազմական հանցագործություն, որը պետք է համապատասխան գնահատականի արժանանա:
«Փաստացի ՄԱԿ-ի կանոնադրության խախտում էր նման արգելված զենքի օգտագործումը խաղաղ բնակչության դեմ: Նման դեպքերի համար հատուկ դատարանների ստեղծման փորձ կա: Նման դատարան ստեղծվեց Հարավսլավիայի դեպքում, Լիբանանի դեպքում, Արևելյան Թիմորի դեպքում: Ես կարծում եմ, որ մենք այդ ճանապարհով պետք է գնանք, այսինքն՝ միջազգային քրեական տրիբունալների պահանջով, որը էլի ՄԱԿ-ի շրջանակներում է արվում: Ես դրա վրա հիմա աշխատում եմ, Ռուանդայի դեպքով ևս նման փորձ եղել է: Մենք համարում ենք, որ հանցագործություն է կատարվել մեր երկրի, մեր բնակչության, մեր ազգի դեմ: Այո, մեր դատախազությունը պետք է այդ քրեական գործերը հարուցի, և եթե դրանք կոնկրետ անձանց դեմ են, դիմի «Ինտերպոլին», քրեական հետապնդում սկսի: Դրանք ընդհանուր գործընթացներ են ազգային օրենսդրությամբ: Այսինքն՝ մեր դատախազությունը կարող է քրեական գործեր հարուցել մեր Քրեական օրենսգրքով և մեր կողմից վավերացված միջազգային իրավական նորմերով: Դրանից դուրս ոչ մի բան չի կարող դատախազությունն անել: Դրան զուգահեռ մենք այլ գործընթացներ ունենք, որոնք ավելի կարևոր են: Խոսքը միջազգային քրեական հարթակ ստեղծելու մասին է»,- ասաց Ն. Վարդանյանը:
Հասմիկ Հայկազյան
