Բյուջեի նախագիծը պետք է լուրջ վերանայման ենթարկվի. Գագիկ Մակարյան
ՀԱՍԱՐԱԿՈՒԹՅՈՒՆ
«Գործատուների հանրապետական միության» նախագահ Գագիկ Մակարյանը 1or.am-ի հետ զրույցում, անդրադառնալով երկրում առկա տնտեսական խնդիրներին, նշեց, որ ներկայումս 2021-ի բյուջեն է քննարկվում, որտեղ հարկավոր է հաշվի առնել նոր իրողությունները և մարտահրավերները:
«Հիմա հարկավոր է հաջորդ տարվա բյուջեն վարպետորեն և ճիշտ կազմել, նախատեսել բոլոր այն նպատակային խնդիրները, որոնք կխթանեն տնտեսության և ձեռնարկությունների զարգացման հնարավորությունները: Բացի այդ, հաջորդ տարվա բյուջեն պետք է նպաստի բիզնես միջավայրի բարելավմանը, որպեսզի ձեռնարկատիրությունը զարգանա, չկրճատվեն աշխատատեղերը և նոր աշխատատեղեր բացվեն»,- ասաց Գ. Մակարյանը:
Նրա դիտարկմամբ՝ եկող տարվա բյուջեի արդեն իսկ ներկայացված նախագիծը բավականին պասիվ ու պահպանողական է: Ընդծված է միայն սոցիալական բաղադրիչը, մինչդեռ պետությունը միայն սոցիալական վճարներ տալով չպետք է սահմանափակվի:
«Միայն սոցիալական աջակցության ծրագրերով շատ չենք կարողանա առաջ գնալ: Հարկավոր է տնտեսական աճի, տնտեսական զարգացման որոշակի մոդելների վրա ուշադրություն դարձնել: Բացի այդ, հարկավոր է առաջնային ուշադրություն դարձնել նաև գյուղատնտեսական ոլորտի վրա, որը ևս շատ կարևոր է: Պետք չէ մոռանալ, որ Արցախի շատ բնակիչներ, որոնք բնակվում էին կորցրած տարածքներում հայտնվել են անորոշության մեջ: Չի բացառվում, որ նրանց մի մասը ժամանակավորապես բնակություն հաստատի Հայաստանում, հարկավոր է նրանց մասով ևս ծրագրեր մշակել»,- ասաց Գ. Մակարյանը:
Խոսելով փոքր ու միջին բիզնեսի մասին՝ նա նշեց, որ եկող տարվա հումվարի 1-ից Թուրքիայից ներկրումներ իրականացնողները կարող են որոշակի դժվարություններ ուենալ: Մյուս կողմից մարդկանց գնողունակությունն է ընկել, իսկ շուկայում որոշակի գնաճ է տեղի ունենում, ինչը նշանակում է, որ առևտրային կետերն ու խանութները ևս կարող են որոշակի դժվարություններ ունենալ:
«Հետևաբար պետական ծրագրերը հիմա պետք է ուղղվեն հենց այդպիսի ոլորտների փրկությանը: Կան նաև ոլորտներ, որոնք կարող են էական դերակատարություն ունենալ Հայաստանի տնտեսական զարգացման հարցում, ուստի պետք է այդ մի քանի ոլորտներին թիկունք կանգնել, օգնել դրանց զարգացմանը, որպեսզի մյուս ոլորտները ևս կարողանան դրանց զուգահեռ զարգանալ»,- ասաց Գ. Մակարյանը:
Արմինե Գրիգորյան
