Ներքաղաքական դաշտում բոլոր թնդանոթներն ուղղել են իրար դեմ և Ադրբեջանին մնում է միայն նստել ու նայել. Սամվել Մարտիրոսյան
ՀԱՍԱՐԱԿՈՒԹՅՈՒՆ
Թեև արդեն մի քանի օր է ռազմաճակատում հրետանին լռում է, սակայն վիրտուալ հարթակում մեդիապատերազմը դեռ շարունակվում է: Ավելին, հայկական և ադրբեջանական մեդիապատերազմը վերածվել է նյարդերի պատերազմի, որը ամենայն հավանականությամբ դեռ երկար կշարունակվի: Մեդիափորձագետ Սամվել Մարտիորսյանը 1or.am-ի հետ զրույցում անդրադառնալով մեդիա և սոցիալական հարթակներում տարվող պայքարին, նշեց, որ փոխվել է պայքարի տրամաբանությունը: Մի կողմից Ադրբեջանը փորձում է իր հաղթանակը ցույց տալ, մյուս կողմից ամեն ինչ անում է հայկական կողմի մոտ առկա դեպրեսիվ իրավիճակը խորացնելու համար:
«Գլոբալ առումով, քանի որ պայքարը շուտով կշարունակվի միջազգային տարբեր հարթակներում, հնարավոր է, որ այս ամենի տրամաբանությունն էլ փոխվել: Բացի այդ, այս պահին հայկական կողմը զբաղված է ներքաղաքական պայքարը լուսաբանելով, ինչը կրկին Ադրբեջանի շահերից է բխում: Բացի այդ, հայկական դաշտում ներքաղաքական պայքարի ժամանակ ջրի երես է դուրս բերվում ողջ կեղտը, որը քաղաքական դաշտում օգտագործում են միմյանց դեմ և, կրկին, ադրբեջանական մամուլի համար պարարտ հող է ստեղծվում այդ ամեն ինչը իրենց մեդիահարթակներում օգտագործելու համար: Քաղաքական դաշտը բոլոր թնդանոթներն ուղղել են իրար դեմ, ինչքան գաղտնիք կա բերվում է մեդիադաշտ և Ադրբեջանին մնում է միայն նստել ու նայել այն ամենը, ինչն այսօր հայկական կողմից մատուցվում է համացանցով»,- ասաց Ս. Մարտիրոսյանը:
Փորձագետի խոսքով՝ քանի որ սկսել են նաև զինվորականները խոսել, ադրբեջանական մամուլի համար ևս մեկ, բավական պարարտ հող է ստեղծվել հայկական կողմի դեմ ուղղված նյութեր հրապարակելու համար:
«Հայկական լրատվական դաշտը պետք է փորձի բալանսավորված ինֆորմացիա տալ և հնչեցված կարծիքները համադրել այլ տեսակետների հետ: Բալանսավորված աշխատանքը մեզ մոտ լուրջ բացակայում է, քանի որ լրագրողները գրում են այն, ինչի մասին այդ պահին ասում են, բայց ջանք չեն թափում նաև նախապատմությունը ներկայացնելու համար, որպեսզի ընթերցողը կարողանա ինքնուրույն որոշում ընդունել կամ կարծիք կազմել»,- ասաց Ս. Մարտիրոսյանը:
Արմինե Գրիգորյան
