Իշխանության անտրամաբանությունը
ՎԵՐԼՈՒԾՈՒԹՅՈՒՆՆԵՐ
Ներկայումս բավականին տուրբուլետ փուլ է, սակայն քաղաքացիական պատերազմի հավանականությունը մեծ չէ: Հնարավոր է լինեն բողոքի գործողություններ, բայց այս պահի դրությամբ քաղաքացիական պատերազմը դժվար իրականություն դառնա։ Սա չի նշանակում, թե վաղը դա տեղի չի ունենա, որովհետև գիտեք, որ Պաշտպանության բանակը Ղարաբաղում լուծարվում է, և շատ մարդիկ զենքերով կարող է գան Հայաստան։ Ըստ էության՝ Հայաստանին բավականին դաժան հարված է հասցվել, ստորագրվել է կապիտուլյացիոն համաձայնագիր, և այժմ Հայաստանում բարոյահոգեբանական շատ ծանր վիճակ է։ Նման երկիրը չի կարող զարգանալ, և այն հիմնավորումները, թե այդ պայմանագիրը ստորագրվեց, որ Հայաստանը զարգանա, տեղին չեն։ Բացառված է, որ Հայաստանն այս պայմաններում զարգանա։ Այս իշխանությունը կապիտուլյացիոն փաստաթուղթ է ստորագրել։
Քանի դեռ իշխանափոխություն կամ արտահերթ ընտրություններ չեն եղել, ոչ ոք ներդրում չի անելու։ Այո՛, տնտեսությունը կշարունակի ինչ-որ չափով աշխատել, բայց ներդրումներ չեն լինելու։ Արձանագրենք նաև, որ Հայաստանի ու Ռուսաստանի ղեկավարների միջև հարաբերությունները չեն նորմալացել, իսկ մենք գիտենք, որ Ռուսաստանը թույլ չի տալիս, որ ռուսաստանաբնակ հայ գործարարները Հայաստանում ներդրումներ անեն։ Միանշանակ կասկածելի է նաև, որ խոշոր ներդրումներ լինեն նաև ԱՄՆ-ից ու ԵՄ-ից, որովհետև շարունակվող հանրահավաքները ներդրումներին չեն նպաստելու։ Կարող է 1000 կամ 10000 հոգանոց հանրահավաք լինել, բայց երբ երկիրն այդ վիճակում է՝ խոշոր ներդրումներ չեն լինելու։ Հոգեբանական առկա իրավիճակը նույնպես չի նպաստելու ներդրումներին։
Ներկայիս իշխանությունը պատկերացում չունի, թե աշխարհն ինչպես է զարգանում, ուր է շարժվում։ Եվ եթե դու գաղափար չունես, թե աշխարհում ինչ է կատարվում, դու չես կարող Հայաստանը տանել դեպի զարգացում։ Երբ Հայաստանում իշխանափոխություն լինի, կգա ադեկվատ իշխանություն, որը շատ հարցերի վերաբերյալ պատկերացում կունենա՝ հնարավոր է Հայաստանի առջև տարբեր հնարավորություններ բացվեն։ Երբ նայում ես լրատվական դաշտը, այնպիսի տպավորություն է, թե հայ ժողովուրդն ամբողջությամբ մահացել է, գերեզմանի քարն է միայն մնացել, բայց այդպես չէ։ Ստացված հարվածը շատ ծանր ու դաժան էր, բայց դա մահացու չէ։ Իհարկե, հասկանում եմ, որ մարդիկ կորցրել են իրենց բնակավայրերը, բայց ներքաղաքական դաշտի այս լացուկոծը անհասկանալի է։ Պետք է հասկանալ, որ հայ ժողովուրդն իր գոյության ընթացքում նմանատիպ շատ հարվածներ է ստացել, պարզապես ստացվեց, որ 30 տարվա այս դժվարություններն անիմաստ կորան։
Անդրանիկ Կիրակոսյան
