Ադրբեջանի համար արտադրված սփրեդը՝ Երևանում
ՀԱՍԱՐԱԿՈՒԹՅՈՒՆ
Ուշագրավ բացահայտում է գրանցվել վաճառքի շղթայում, որը բավական լուրջ ուսումնասիրության առիթ է դարձել ոչ միայն պետական կառույցներում, այլև մեծ աղմուկ է բարձրացրել հասարակության շրջանում: Օրերս ՀՀ սննդամթերքի անվտանգության տեսչական մարմնի մասնագետները, սննդի շղթայի կազմակերպություններում վերահսկողական գործունեություն իրականացնելիս, Երևանի «Սուրմալու» մանրամեծածախ շուկայում հայտնաբերել են Ադրբեջանի համար արտադրված սննդամթերք: Ուսումնասիրությամբ պարզվել է, որ ՌԴ Տուլչինկա ՍՊԸ-ի կողմից արտադրված 82,5 տոկոսանոց բուսայուղային սփրեդի խմբաքանակը նախատեսված է եղել հարևան երկիր ներմուծելու համար, որը երևում է մակնշումից, իսկ մի մասի վրա հայերեն մակնշում ընդհանրապես չի եղել: Որոշ ապրանքատեսակների վրա եղել է հայերեն մակնշում, որից պարզ է դարձել, որ խմբաքանակը Հայաստան է ներմուծվել «ԱրտԻմպորտ» ՍՊԸ-ի կողմից:
Հայտնաբերված ողջ խմբաքանակի իրացումը կասեցվել է: ՍԱՏՄ-ից քաղաքացիներին խնդրում են լինել ուշադիր և իրացման կետերում ուշադիր զննել ապրանքների պիտակները: Մակնշման կասկածի դեպքում զանգահարել տեսչական մարմնի թեժ գծի հեռախոսահամարներով՝ 010 206040 կամ 0120906090 : ՍԱՏՄ-ից 1or.am-ին տեղեկացրեցին նաև, որ այս պահին տեսուչները վերահսկողական միջոցառումներ են իրականացնում «ԱրտԻմպորտ» ՍՊԸ-ում, պարզելու համար, թե տվյալ ընկերությունն առհասարակ ինչ սննդամթերքի նեմուծմամբ է զբաղվում և ինչ պայմաններում է Ադրբեջան ներմուծելու համար նախատեսված սննդամթերքը հայտնվել մեր երկրում և այլն:
Ուշագրավ է, որ որոնման համակարգերում «ԱրտԻմպորտ» ՍՊԸ-ի մասին որևէ տեղեկություն չկա: Այսինքն՝ չի բացառվում նաև, որ հայտնաբերված խմբաքանակի բացահայտումները դառնան այլ բացահայտումների պատճառ, որի մասին կտեղեկացնենք լրացուցիչ:
Արմինե Գրիգորյան
