Հյուսիսային ուղղությամբ պատրաստ ենք հակահարձակման անցնել, սպասում ենք հրամանի
ՀԱՍԱՐԱԿՈՒԹՅՈՒՆՀյուսիսային ուղղությամբ՝ Մատաղիսի մոտակայքում, մենք չունենք որևէ զոհ, ոչ մի մետր չենք նահանջել, չնայած հրետանուց և օդից մեզ կարկտահարում են, շատ դեպքերում արկերը հենց մեր խրամատների մեջ են ընկնում, հրետակոծումը երբեմն երկու-երեք ժամ շարունակվում է: «Արմնյուզ» ՀԸ «#ՕրաԽնդիր» հաղորդման ժամանակ նման դրվագ է ներկայացրել ազատամարտիկ Գագիկ Սարուխանյանը:
«Այս պատերազմն արմատապես տարբերվում է 90-ականների պատերազմից, երբ որսորդական հրացաններով առերես դուրս էինք գալիս թշնամու դեմ: Չնայած այսօր մենք ինքնաձիգներ ու գնդացիրներ ունենք, բայց թշնամին օդից է «կարկուտ» թափում մեզ վրա, և քեզ մնում է սեփական կյանքդ պաշտպանել: Հնարավոր է կազմակերպվածության բարձր աստիճանով, գրագետ հրամանատարներով նախատեսել անելիքը, համագործակցել Պաշտպանության բանակի հետ»,- ասել է ազատամարտիկը:
Ըստ Սարուխանյանի՝ թշնամին անգամ հազար հոգով առաջ չի գալիս, եթե գիտի, որ դիմացը 15-20 հայ կա, փոխարենը հետախուզական ԱԹՍ-ներով ճշտում է տվյալները. «ՀՕՊ-ը ճիշտ կազմակերպելու, թռչող սարքերը բացառելու դեպքում թշնամու հրետանին ու հետևակը վերացնելը խնդիր չէ, կարող ենք անգամ խմբերով ներթափանցել Ադրբեջանի տարածք: Եթե օդը փակվի, մենք թշնամու խոր թիկունք կարող ենք գնալ: Թուրքը նույն վախկոտն է, նրանց դիվերսիոն խմբերի ներթափանցումը ևս մեր օդը չփակելու հետևանք է»:
Ազատամարտիկի կարծիքով՝ հրաշալի է, որ արցախցի տեղաբնակները միանում են կամավորական ջոկատներին և ՊԲ-ին, նրանք միայնակ չեն կարող խնդիր լուծել, քանի որ վատ են զինված, բայց լավ գիտեն ռազմական տեղագրությունը. «Եթե ուզում ես ապագա պատերազմում հաղթել, պետք է խաղաղ ժամանակ նախապատրաստվել: Մենք այսօր երկու-երեք օրում ստիպված ենք կրակային պատրաստության դասերը վերհիշել, մեկնելուց առաջ դա պարտադիր է: Կազմակերպվածությունը պետք է բարձրացնել, լավ է, որ մեր ՊՆ-ն էլ մարզում է աշխարհազորին՝ մինչև ճակատ ուղարկելը»:
Գագիկ Սարուխանյանի պնդմամբ՝ ռազմաճակատում տղաների ոգին ավելի բարձր է, քան թիկունքում, այստեղ մարդկանց դեմքերը փոքր-ինչ վախվորած են. «Այս մթնոլորտը հավանաբար ազդել էր նաև վարչապետի վրա, երբ նա խոսեց ցավոտ փոխզիջումների մասին: Ես դա կարող եմ վերագրել մարդկային թուլությանը, բայց խնդրում եմ այլևս նման բան չանել: Հարավում տարածքների կորուստը ժամանակավոր է, Արցախի ամբողջ տարածքն այսօր ռազմաճակատ է: Իրենք 3-4 օրում նախատեսում էին ամբողջ Արցախը բլից-կրիգով վերցնել, տապալել ենք և՛ նրանց տանկային հարձակումները, և՛ օդային մարտերը, և՛ դիվերսիոն խմբերին»:
Ազատամարտիկի պնդմամբ՝ պատերազմը պետք է մեզ համար հաղթարշավ դառնա, այլապես այս խնդիրը կթողնենք հաջորդ սերունդներին: «Կարևորագույն հարցը կարգապահությունն է, անվտանգության կանոնները պահելը, պետք է արգելվեն հեռախոսներն առաջնագծում: Մեր երիտասարդները հետևում են կանոններին, դա գալիս է հրամանատարության ճիշտ մոտեցումից: Մեր ուղղությամբ մենք պատրաստ ենք հակահարձակման անցնել և սպասում ենք հրամանի: Այսօր քաղաքական օրակարգ թելադրողը հայ զինվորն է»,- ամփոփել է Գագիկ Սարուխանյանը:
