Ի՞նչ անել, որ սմարթֆոնը չհայտնվի գաղտնալսման վտանգի տակ
ՀԱՍԱՐԱԿՈՒԹՅՈՒՆ
«Ինտելեկտուալ պահուստ»-ի տնօրեն Պավել Մյասոյեդովը «Փրայմ» էլեկտրոնային գործակալության տեղեկացմամբ նշել է, թե սմարթֆոնների գաղտնալսման դեպքում որոնք են այն հուշումներն ու հիմնական նշանները, որից կարելի է հասկանալ, որ հեռախոսը գաղտնալսման տակ է: Ըստ Մյասոյեդովի, դրանք կարող են լինել մարտկոցի արագ լիցքաթափումը կամ հեռախոսի գերտաքացումը, ինչպես նաև սարքի ինքնաանջատման երևույթները: Խարդախների կողմից իրականացվող նման վերահսկողությունը կանխելու համար փորձագետը խորհուրդ է տվել կա՛մ փոխել սմարթֆոնը, SIM քարտը, գաղտնաբառերը, կա՛մ այն էլեկտրոնային փոստը, որին կցված է սարքը: Բացի այդ, հարկավոր է զերծ մնալ սմարթֆոնների մեջ անհայտ ծրագրեր տեղադրելուց:
Մեդիափորձագետ Սամվել Մարտիրոսյանը անդրադառնալով այս խնդրին, 1or.am-ի հետ զրույցում նշեց, որ բջջային կապը գաղտնալսելու դեպքում դժվար է հասկանալ, թե երբ են այն գաղտնալսում, քանի որ դա իրականացվում է օդային ռադիոալիքը որսալու միջոցով: Եվ դա որևէ կերպ չի անդրադառնում հեռախոսի վարքագծի վրա:
«Հեռախոսը կարող է տաքանալ այն դեպքում, երբ հեռախոսի մեջ գաղտնալսող վիրուս է հայտնվում, բայց դրանք ևս հեշտ չեն կարող հայտնվել հեռախոսի մեջ, եթե ժամանակին հեռախոսի թարմացումներ են արվում: Կարևորն այն է, որ պետք է ժամանակին կատարվեն սմարթֆոնների թարմացումները: Իսկ հասկանալու համար, թե իրականում հեռախոսի մեջ վիրուս կա, թե՝ ոչ, անհրաժեշտ է հետազոտել հեռախոսը»,- ասաց Ս. Մարտիրոսյանը:
Փորձագետը նշեց նաև, որ կան անդրոիդ համակարգի շատ հեռախոսներ, որոնք այլևս չեն թարմացվում: Ուստի, այս դեպքում կարող է հեռախոսը հայտնվել թիրախի տակ: Նման հեռախոս ունենալու դեպքում անհրաժեշտ է անհայտ բաժանորդներից ստացվող լուսանկարները կամ ինֆորմացիան չբացել:
«Այս ամենից բացի, հատկապես պատերազմական իրավիճակում, պետք է մշտապես հիշել, որ բաց կապը անընդհատ կարող է գտնվել գաղտնալսման տակ: Ուստի ավելի ճիշտ կլինի այս ընթացքում օգտագործել միայն Telegram WhatsApp համակարգերը»,- ասաց Ս. Մարտիրոսյանը:
Արմինե Գրիգորյան
