ԿԳՄՍ նախարարությունը առաջարկում է ձևավորել նախադպրոցական այլընտրանքային կրթական հաստատություններ․ «Փաստ»
ՄԱՄՈՒԼԻ ՏԵՍՈՒԹՅՈՒՆ
«Փաստ» օրաթերթը գրում է
Կրթության, գիտության, մշակույթի և սպորտի նախարարությունը հանրային քննարկման է ներկայացրել «Նախադպրոցական կրթության այլընտրանքային, ծախսարդյունավետ մոդելները և դրանց ներդրման կարգը հաստատելու մասին» նախարարի հրամանը։ Նախագծի հիմնավորման մեջ նշվում է, որ վերջին տարիներին մի շարք օբյեկտիվ և սուբյեկտիվ գործոնների ազդեցության հետևանքով Հայաստանում նախադպրոցական համակարգը հայտնվել է անբարենպաստ պայմաններում, ինչի հետևանքով կրճատվել է նախադպրոցական հաստատությունների թիվը, գործող հաստատությունների կարողությունները, նվազել է դրանցում երեխաների ընդգրկվածությունը:
Հիշեցնենք, որ նախադպրոցական հաստատությունները համայնքային ենթակայության ներքո են, և դրանց գործունեության հետ կապված ցանկացած խնդիր անմիջականորեն կապված է տվյալ համայնքի բյուջետային միջոցների հետ: Հաշվի առնելով մի շարք խնդիրներ, ուսումնասիրելով վերջին տարիներին գործընկեր կազմակերպությունների (Հայաստանում ՅՈՒՆԻՍԵՖ-ի գրասենյակ, «Save the children international» կազմակերպության հայաստանյան ներկայացուցչություն և «Աստղացոլք» ՀԿ) ձեռնարկած միջոցառումները՝ առաջարկում է ծախսարդյունավետ մոդելներ, որոնց ներդրման արդյունքում հնարավոր է ընդլայնել նախադպրոցական կրթության մեջ երեխաների ընդգրկվածությունը, ինչպես նաև արդյունավետ մեխանիզմներ կիրառել կառավարման մեջ:
Նախարարությունը նշում է՝ մոդելների ներդրման հիմնական խնդիրները մի քանիսն են։ Նախ՝ հանրապետության բազմաբնակավայր համայնքներում ձևավորել այլընտրանքային նախադպրոցական կրթական հաստատություններ, որոնք հնարավորություն կընձեռեն մեծացնել երեխաների ընդգրկվածությունը նախադպրոցական ծառայություններում և ապահովել մատչելիություն հատկապես սոցիալապես անապահով ընտանիքների համար: Հաջորդիվ լուծվում է մեկ այլ խնդիր։ Առաջարկվող մոդելներից որևէ մեկի ներդրման արդյունքում հնարավոր է ընդլայնել նախադպրոցական կրթության մեջ երեխաների ընդգրկվածությունը, ինչպես նաև արդյունավետ մեխանիզմներ կիրառել նախադպրոցական կրթական ծառայությունների կառավարման համակարգում:
Նախարարությունը կարևորում է նաև այն, որ այլընտրանքային նախադպրոցական կրթություն կազմակերպող հաստատությունը, ձևավորվելով որպես համայնքահեն հաստատություն, կդառնա ցածր արժողությամբ նախադպրոցական կրթական ծրագրեր իրականացնող կառույց նախադպրոցական հաստատություն չունեցող բնակավայրերում: Մոդելների ներդրումն իրականացվելու է բացառապես այն բնակավայրերում, որտեղ նախադպրոցական կրթության որևէ ծառայություն չի իրականացվում:
Բացի դա, առաջնահերթություն է տրվում նաև այն բնակավայրերին, որոնք ընդգրկված են կառավարության կողմից հաստատված սոցիալական աջակցություն ստացող սահմանամերձ համայնքների ցանկում և իրավասու են ստանալ սոցիալական աջակցություն, համայնքներին, որոնք բնակեցված են հիմնականում ազգային փոքրամասնություններով, ինչպես նաև ունեն սոցիալ-տնտեսական ցածր մակարդակ:
Բնակավայրի սոցիալտնտեսական կարգավիճակը սահմանվում է մարզպետարանների տրամադրած վիճակագրության հիման վրա և ներառում է հետևյալ հիմնական չափանիշները՝ համայնքի բյուջեի չափը, համայնքի ընդհանուր բյուջեում կառավարության կողմից տրամադրվող սուբսիդիաների տոկոսը, գործազուրկների տոկոսը, նպաստառու ընտանիքների և հաշմանդամների տոկոսը, կենսաթոշակառուների տոկոսը, ինչպես նաև համայնքի աղքատության մակարդակը: Նախարարությունը սահմանում է կարգ, որի համաձայն, իրենց կարող են դիմել համայնքները՝ ներկայացնելով համապատասխան փաստաթղթեր: Դրանք ուսումնասիրելուց հետո էլ կրթական գերատեսչությունը դիմումի վերաբերյալ կկայացնի իր որոշումը:
Մանրամասները՝ «Փաստ» օրաթերթի այսօրվա համարում
