Թուրքիան «սարքեց» ՆԱՏՕ-ի գլխին
ՎԵՐԼՈՒԾՈՒԹՅՈՒՆՆԵՐ
Ինչպես հայտնի է` հոկտեմբերի 21-ին ՀՀ նախագահ Արմեն Սարգսյանը մեկնել էր Բրյուսել, որտեղ հանդիպել էր ՆԱՏՕ-ի Գլխավոր քարտուղար Յենս Ստոլտենբերգին։ Ճեպազրույցի ժամանակ Ստոլտենբերգը նշել է, որ Արցախում ընթացող գործողություններում ՆԱՏՕ-ն հակամարտության կողմ չէ, ավելին՝ ՆԱՏՕ-ն խորապես մտահոգ ենք կրակի դադարեցման պայմանավորվածությունների խախտումներով, որոնք հանգեցնում են զոհերի:
Ըստ էության՝ Ստոլտենբերգի հայտարարությունը մի կողմից նորություն կամ անսպասելի չէ, մյուս կողմից այն ուշագրավ լույսի ներքո է հնչում դեռևս պատերազմ հրահրելուց առաջ Թուրքիայի պաշտպանության նախարար Աքարի հայտարարության ֆոնին: Աքարը հայտարարել էր, որ Թուրքիան հակամարտության կողմ է, քանի որ Ադրբեջանի անվերապահ աջակիցն է: Ի՞նչ է ստացվում. եթե ՆԱՏՕ-ն հակամարտության կողմ չէ, ինչպես հայտարարել է գլխավոր քարտուղարը, ապա Թուրքիան այլևս ՆԱՏՕ անդամ չէ՞: Բանն այն է, որ Թուրքիան հյուսիսատլանտյան դաշինքի անդամ (դեռևս 1952 թվականից) է, և երբ հայտարարում է, որ հակամարտության կողմ է, ապա այդ հակամարտության մեջ ներքաշում է փաստորեն նաև Հյուսիսատլանտյան դաշինքին:
Ընդ որում, այդ հանգամանքի մասին ակնարկել է նաև դաշինքի մեկ այլ անդամ` Ֆրանսիայի նախագահը: Թուրքիան, փաստորեն, ոչ միայն հակամարտության, այլ նաև միջազգային ահաբեկության հետ գործակցության մեջ է ներքաշել ՆԱՏՕ-ին, քանի որ հազարավոր ահաբեկիչներ է ներկրել Ադրբեջան և սկսել պատերազմ Արցախի դեմ․ այդ հանգամանքը միջազգայնորեն ապացուցված փաստ է: Հետևաբար, երբ ՆԱՏՕ-ի գլխավոր քարտուղարը հայտարարում է, որ դաշինքը հակամարտության կողմ չէ, և դա անշուշտ միանգամայն ողջունելի հայտարարություն է, այդուհանդերձ առաջանում է հարց՝ իսկ Թուրքիան դաշինքի անդա՞մ է, թե՞ անդամ չէ:
Ըստ այդմ՝ եթե անդամ չէ, ապա գուցե պետք է այդ մասին հայտարարել բարձրաձայն և ձեռնամուխ լինել Անկարայի հանդեպ դաշինքի որևէ պարտավորության չեղարկման: Եթե ոչ, ապա կողմ չլինելու մասին Ստոլտենբերգի հայտարարությունն ուղղակի հարվածում է հենց դաշինքի հեղինակությանը, որովհետև ստացվում է, որ ձախ ձեռքը չգիտի, թե ինչ է անում աջը: Այդ պարագայում, ՆԱՏՕ-ն հակամարտող կողմ է, թե ոչ, պարզ չէ, բայց որ դառնում է Արցախի ժողովրդի դեմ ահաբեկչական պատերազմ հայտարարած Թուրքիայի հանցակից, դառնում է ցավալիորեն ակնհայտ:
Անդրանիկ Կիրակոսյան
