Հայաստանում Ռուսաստանի դեսպանատունը հայտարարություն է տարածել

Այսօր դիվանագիտական ներկայացուցչության դիմաց տեղի ունեցած Լեռնային Ղարաբաղում պատերազմի անհապաղ դադարեցման օգտին հանդես եկող հայ կանանց հանրահավաքի կապակցությամբ դեսպանատունը ակցիան մեկնաբանելու խնդրանքով ԶԼՄ-ներից մի շարք հարցումներ է ստացել: Անմիջապես պատասխանում ենք բոլորին։

Իրոք, այդ միջոցառումն այսօր տեղի է ունեցել։ Հավաքվածների ներկայացուցիչների հետ հանդիպել է Ռուսաստանի Դեսպանը, որն իր խորին ցավակցությունն է հայտնել բոլոր այն մայրերին, որոնք կորցրել են իրենց որդիներին։ Դիվանագիտական ներկայացուցչության ղեկավարն ընդգծել է, որ Ռուսաստանում հայ և ադրբեջանցի ժողովուրդների ողբերգությունն ընդունում են որպես իրենցը։ Այդ իսկ պատճառով մեր երկիրն իսկապես տիտանական ջանքեր է գործադրում ռազմական գործողությունները դադարեցնելու և բանակցային գործընթացը վերսկսելու համար։

Ինչպես հայտնի է, վերջերս ազգին ուղղված իր ուղերձում Հայաստանի վարչապետ Ն․Վ․Փաշինյանը հատուկ շնորհակալություն է հայտնել Ռուսաստանին ձեռնարկվող քայլերի համար։ Դրանք ուղղված են նաև հակամարտության հետագա էսկալացիայի կանխարգելմանը, որը սպառնալիքի տակ կդնի խաղաղությունը ոչ միայն Հարավային Կովկասի տարածաշրջանում, այլև դրա սահմաններից դուրս:

Այս առումով կցանկանայինք ուշադրություն հրավիրել մի պարադոքսալ հանգամանքի վրա։ Հակամարտությունն անհապաղ դադարեցնելու պահանջը, որը հնչեց հավաքվածների կողմից, ընդ որում՝ վերջնագրային ձևով, չգիտես ինչու ուղղված է հենց այն երկրին, որն էլ այդ նպատակով ձեռնարկում է իրական, գործնական քայլեր։