Ռուսաստանն այս պատերազմով մտահոգված է, քանի որ այս ամենը վաղը, մյուս օրը շրջվելու է իր դեմ. Ստեփան Սաֆարյան
ՔԱՂԱՔԱԿԱՆՈՒԹՅՈՒՆ
Հանրային խորհրդի նախագահ Ստեփան Սաֆարյանի դիտարկմամբ նկատի առնելով, որ Ռուսաստանը Հայաստանի ռազմավարական դաշնակիցն է և, բացի այդ, Ռուսաստանը ԵԱՀԿ Մինսկի խմբի համանախահագող երկիր է, դժվար է ասել, թե Ռուսաստանի քայլերն այս փուլում բավարար չէին, թե կարողություններն էին քիչ, քանի որ, եթե կարողությունները բավարարեին, ապա այս իրավիճակը չէր լինի, 1or.am-ի հետ զրույցում նշեց Ս. Սաֆարյանը:
«Եթե Ռուսաստանի, ինչպես նաև աշխարհի կարողությունները և հնարավորությունները բավարար լինեին, ապա այս իրավիճակն, ի սկզբանե, կանխած կլինեին և հարցը չէր հասնի պատերազմին: Ես կարծում եմ, դրա պատճառն այն է, որ և՛ աշխարհը, և՛ Ռուսաստանը թուլացել են, կամ նրանց շահագրգռվածություններն են պակասել՝ կանխելու պատերազմները: Եվ, բնականաբար, դրանից օգտվում են այն երկրները, որոնք ցանկանում են պատերազմներ սանձազերծել»,- ասաց Ս. Սաֆարյանը:
Հարցին, թե այդ դեպքում գերտերությունները ինչպես պետք է կարողանան սանձել Թուրքիայի պես տեռորիստական երկրի նկրտումները, երբ նրա ախորժակը գնալով բացվում է, Ս. Սաֆարյանը պատասխանեց.
«Ես կարծում եմ, որ աշխարհում փոխզսպումների մեխանիզմները բավականին թուլացել են, չնայած որ շատ երկրներ արդեն իսկ հայտնել են իրենց անհանգստությունը Արցախում արդեն 13 օր ընթացող պատերազմի առնչությամբ: Այդ ամենով հանդերձ, ես կարծում եմ, որ շուտով գերտերությունները Թուրքիային վտարելու քայլեր կիրականացվեն: Ինչ վերաբերում է Ռուսաստանին, ապա դժվար է ասել՝ այս ամենը Ռուսաստանի լուռ համաձայնության, թե մեկ այլ բանի հետևանք էր, առավել ևս այս պահին միանշանակ գնահատականներ տալ հնարավոր չէ: Բայց տեսանելի է, որ այնուամենայնիվ, Ռուսաստանն այս պատերազմով մտահոգված է, քանի որ այս ամենը վաղը, մյուս օրը շրջվելու է իր դեմ: Եվ եթե այդ մտահոգությունը չլիներ, Մոսկվան մեզ հաստատապես չէր հրավիրի բանակցությունների»:
Նրա կարծիքով, ակնհայտ է, որ Ալիևը և Էրդողանը մարտահրավեր են նետել ողջ աշխարհին և որի մասին, Ադրբեջանի առաջնորդը բացահայտ հայտարարում է: Ու, թեև աշխարհն այնքան է խճճվել տնտեսական և աշխարհաքաղաքական շահերի մեջ, որ դժվարանում է կողմնորոշվել, այնուամենայնիվ, պետք է կարողանա ուժ գտնել իր մեջ նման ահաբեկչությունը կանխելու համար:
«Մեկ բան ակնհայտ է: Այս կոնֆլիկտի լուծումը մեկն է: Հարկավոր է ուժեղանալ և հակառակորդին թույլ չտալ, որ պատերազմական քայլերի դիմի: Ակնհայտ է, որ Թուրքիան իրեն թույլ չի տալիս պատերազմական գործողություններն ավելի մեծ մասշտաբների հասցնել ԱՄՆ-ի, Ռուսատանի և մնացած երկրների շնորհիվ: Այսինքն, չի կարելի թերագնահատել ոչ մեկին, թեև պետք է հաշվի առնել, որ յուրաքանչյուր պետություն իր շահերն է առաջին հերթին հաշվի առնում: Իմ կարծիքով երեկ Մոսկվայում ձեռք բերված համաձայնությունը նաև այլ մակարդակի պայմանավորվածությունների արդյունք էր: Ու, թեև Ռուսաստանից մեզ հասնող մեսիջները բավականին խառն էին, բայց դրանք դեռ պետք է վերլուծվեն, որպեսզի ավելի պարզ լինի ինչպես մեր հետագա քայլերը, այնպես էլ մարտահրավերներին դիմակայելու հետագա ուղիները»,- ասաց Ս. Սաֆարյանը:
Արմինե Գրիգորյան
