Ձեռքերս կապել են ու փորս սկսել են առանց նարկոզի ծակել. պատմում է Մոսկվա-Երեւան վթարված ավտոբուսից տուժած վարորդը (Ֆոտո, Տեսանյութ)
ՎԻԴԵՈ
News.am-ը գրում է.
Ռուսաստանում Մոսկվա-Երեւան երթուղու վթարված ավտոբուսի երկրորդ վարորդին Վլադիկավկազի հիվանդանոցում պատշաճ բուժօգնություն չի ցուցաբերվել: NEWS.am-ի հետ զրույցում 31-ամյա Ավագ Ծատինյանը պատմեց, որ վթարից հետո 4 օր հիվանդանոցում անօգնական պառկած է եղել, իսկ սնունդով եւ հագուստով օգնել են միայն նույն հիվանդասենյակում գտնվող ազգությամբ օս հիվանդները, մինչեւ օգնության է հասել Հայաստանից մեկնած նրա կինը։
«Վլադիկավկազի հիվանդանոցում ինձ բուժօգնություն չի ցուցաբերվել, ես 4 օր պառկած եմ եղել՝ անօգնական, ինձ ուրիշներն են հաց տվել, հագուստ տվել, հիվանդասենյակի ժողովուրդն է օգնել ինձ: Եթե կինս չգար, կարող է վիճակս ավելի վատանար: Երեք օր աչքիս վիրակապը չի փոխվել, արյունս չորացել էր, չէի կարողանում աչքս բացել, դեղ էր պետք, որ աչքիս կաթեցնեմ, մեկը չկար բերեր, որ կաթեցնեմ, դեղորայքային օգնություն էլ չի ցուցաբերվել: Գալիս էին միայն սիստեմա էին միացնում, սրսկում, գնում էին, ոչ մի բան չէին անում»,-պատմեց ավտովթարից տուժածը:
Ավագ Ծատինյանի խոսքով, Վլադիկավկազի հիվանդանոցում իրեն էնդոսկոպիկ հետազոտության են ենթարկել առանց անզգայացման. «Իմ ձեռքերը կապել են, տարել են, փորս սկսել են առանց նարկոզի երեք տեղից ծակել: Գոռում եմ, ասում եմ՝ ես միայն աչքիս հետ խնդիր ունեմ, ոչ ոք չէր լսում: Հետո տեսան, որ վատանում եմ, գոռում, ճչում եմ՝ սրսկեցին, թե նարկոզ տվեցին, լավ չեմ հիշում: Անիմաստ տեղը երեք տեղից ծակել են՝ ուզում էին տեսնել՝ արյունահոսություն կա, թե ոչ»:
Տուժած վարորդին 4 օր անց հիվանդանոցում կինն է օգնության հասել, գնել անհրաժեշտ դեղորայքը, սնունդն ու պահանջել՝ ամուսնուն պատշաճ բուժօգնություն ցուցաբերել: Սակայն, պարզվել է, որ Վլադիկավկազի հիվանդանոցում չի եղել ոչ ռենտգենի սարք, ոչ էլ համապատասխան մասնագետներ: Ծատինյանները ստիպված են եղել սպասել այնքան, մինչեւ իրենց տեղափոխել են Հայաստան:
Նշենք, որ դեպքից հետո ՀՀ առողջապահության նախարարությունն ամեն օր հաղորդագրություն էր տարածում՝ նշելով, որ Վլադիկավկազի եւ Բեսլանի հիվանդանոցներում բուժվող բոլոր հայ տուժածներին պատշաճ բուժօգնություն է ցուցաբերվում։
31-ամյա վարորդը պատմեց, որ տեղի ունեցած վթարից մանրամասներ չի հիշում, քանի որ այդ պահին քնած է եղել: Ավագ Ծատինյանի կարծիքով՝ ավտոբուսը վարող իր գործընկեր Յուրա Պողոսյանը մեղավոր չէ կատարվածի մեջ. նա վթարից ընդամենը 20 րոպե առաջ էր իրենից ղեկը վերցրել։
«Ես այդ գիշեր ավտոբուսը վարել, հանձնել եմ իրեն, ինձնից հետո ինքն ընդամենը 30 կմ է քշել: Յուրան ղեկին չէր կարող քնել, որովհետեւ լավ քնել էր, վեր էր կացել: Ընդամենը ղեկն իրեն հանձնելուց 20 րոպե է անցել, եւ այդ ընթացքում հնարավոր չէ, որ քնած լիներ: Մեղավորությունը եղել է ճանապարհի մեջտեղում կանգնած բեռնատարինը, որին ավտոբուսը հարվածել է, այլ տարբերակ, կարծում եմ, որ չի կարող լինել: Յուրան 40 տարվա փորձ ուներ, շատ լավ վարորդ էր, անընդհատ տարբեր ուղղություններով քշել է, մեքենայի անսարքություն եւս չի եղել»,– ասաց նա։
Ավագ Ծատինյանին կինը ավտովթարից միայն մի քանի օր անց է կարողացել գտնել ամուսնուն, քանի որ նրա անունը չի եղել ԱԻՆ–ի հրապարակած ոչ վիրավորների, ոչ մահացածների, ոչ էլ զոհվածների ցուցակում: Ավելի ուշ պարզվել է, որ վարորդի անունը եւ ռուսական կողմը, եւ հայկական կողմը սխալ են հրապարակել՝ Ավագ Ծատինյանի փոխարեն Արեն Սաինյան։
Ի դեպ, հոկտեմբերի 19-ին լրագրողների հետ հանդիպմանը ՀՀ առողջապահության նախարարության ներկայացուցիչը տուժած վարորդի անունը կրկին սխալ էր հաղորդել լրագրողներին՝ նշելով, որ հոկտեմբերի 20-ին Երեւան կտեղափոխվի վթարից տուժած ավտոբուսի երկրորդ վարորդ՝ Նոյեմբերյանի բնակիչ Արեն Սաինյանը:
Ավելի վաղ հայտնել էինք, որ հոկտեմբերի 14-ին, Ռուսաստանում Մոսկվա-Երեւան երթուղու «Մերսեդես Բենց-0404-15R» մակնիշի 50 AA 515 համարանիշի ավտոբուսը բախվել է «Սկանիա» բեռնատարին: Ավտովթարից տուժել է 27 մարդ, մահացել է 5-ը, այդ թվում՝ վարորդը: Մահացածներից 2-ը ՀՀ քաղաքացիներ են, 3-ը՝ ՌԴ-ի: Տուժածների թվում 4-ը երեխաներ են. նրանցից մեկի վիճակը ծանր է:
Այս պահին Ռուսաստանի հիվանդանոցներում եւս երկու հայ տուժած է բուժվում։ Հայաստան տեղափոխվածները բոլորը դուրս են գրվել հիվանդանոցից:
