Ռազմաճակատի ողջ երկայնքով ակտիվ և ինտենսիվ ռազմական գործողություններ են
ՔԱՂԱՔԱԿԱՆՈՒԹՅՈՒՆ
1or.am կայքի զրուցակիցը ռազմական փորձագետ Տարոն Հովհաննիսյանն է։
- Պարոն Հովհաննիսյան, արդեն մի քանի օր է, որ Ադրբեջանը զինված հարձակում է իրականացնում: Խոսվում է լայնամասշտաբ պատերազմի մասին, ի՞նչ են ցույց տալիս ձեր գնահատականները:
— Սա բառից բուն իմաստով լայնամասշտաբ պատերազմ է, որտեղ Հայաստանի դեմ պատերազմում է ոչ միայն Ադրբեջանը այլ նաև Թուրքիան։ Փաստացի այս պահին Արցախը և Հայաստանը պատերազմ են մղում Թուրքիայի և Ադրբեջանի դեմ, որովհետև ինչպես նշվեց նաև պաշտպանության նախարարության ներկայացուցչի կողմից Ադրբեջանի օդուժը կառավարվում է Թուրքիայի ռազմաօդային ուժերի կողմից։ Ինչպես նաև Ադրբեջանի հիմնական հարվածային ուժը օդում ավելի ակտիվ հենց թուրքական արտադրության անօդաչու թռչող սարքերն են, որոնք կրկին ղեկավարվում են թուրքերի կողմից։ Փաստացի ռազմաճակատի ողջ երկայնքով ակտիվ և ինտենսիվ ռազմական գործողություններ են, ինչպես նաև եղել են ակտիվ գործողություններ Հայաստանի՝ Վարդենիսի հետ սահմանային հատվածում։
- ՀՀ ՊՆ-ն վերջերս զգուշացրել էր ադրբեջանական կողմին, որ հայկական զինված ուժերը ստիպված են օգտագործել մեծ մակերեսների վրա կրակային խոցման, շարժական և անշարժ գույքի ոչնչացման մեծ ազդեցություն ունեցող սպառազինության և ռազմական տեխնիկայի տեսակներ: Սա «Իսկանդերի» մասի՞ն է խոսքը, այսինքն՝ իրավիճակը դրա՞ն է տանում:
— Խոսքը ըստ անհրաժեշտության սպառազինությունում առկա բոլոր տեսակների մասին է՝ հակառակորդին զսպելու նպատակով։ Որևէ սահմանափակում չի կարող լինել, եթե ադրբեջանական կողմն է դիմում նման սպառազինությունների օգտագործմանը և հարվածում է նաև քաղաքացիական օբեկտներին և բնակավայրերին և շարունակում է իր հարձակվողական գործողությունները, ապա, բնականաբար հակառակորդի ագրեսիան զսպելու և հետ շպրտելու համար հայկական բանակը կարող է իրեն իրավունք վերապահել օգտագործել հայկական սպառազինության մեջ առկա բոլոր զինատեսակները և այստեղ ոչ մի սահմանափակում չի կարող լինել, եթե խոսքը վերաբերում է թշնամու ագրեսիան զսպելում և խաղաղ բնակչությանը պաշտպանելուն։
- Դուք որպես ռազմական փորձագետ ի՞նչ կանխատեսումներ ունեք։ Արդյո՞ք հնարավոր է հրադադար, թե՞ սա իսկապես կլինի վերջին պատերազմը։
— Այս պահին ոչ ոք որևէ կանխատեսում անել չի կարող, որովհետև ռազմական գործողությունները շատ ինտենսիվ շարունակվում են, և ամեն վայրկյանի լինում են փոփոխություններ։ Բայց վստահաբար կարող եմ ասել և պնդել, որ թեկուզ տևական խաղաղություն կարող է լինել միայն այն դեպքում, երբ որ մեր բանակը այդ խաղաղությունը կպարտադրի հակառակորդին։ Որևէ այլ տարբերակում չի լինելու խաղաղություն, կամ դա լինելու է այնպիսի գնով, որը խաղաղություն անվանել չի կարելի։ Միանշանակ է, որ խաղաղություն պարտադրողը լինելու է միայն Հայկական բանակը։ Եվ իրենց զգալի կորուստները տեսնելով իրենք ստիպված կլինեն խնդրել հրադադար, միայն այդ դեպքում կարող է լինել խաղաղություն։
- Դուք ինչպե՞ս եք գնահատում Հայաստանի ռազմաքաղաքական ղեկավարության աշխատանքն այս օրերին։ Դրանք ճիշտ ուղղությա՞մբ են իրականացվում։
— Այո, բայց այդ մասին ռազմական իրավիճակում խոսել պետք չէ, ամեն ինչ վերահսկվում է, իրականացվում է վերլուծություն և բոլոր գործողությունները մշակվում են ըստ դրա։ Ու իրականացվում են բոլոր անհրաժեշտ քայլերը։
Սոնա Գիշյան
