Խաղաղ բնակչության շրջանում 4 զոհ կա․ Արման Թաթոյան

4 զոհ կա խաղաղ բնակչության շրջանում։ Այս մասին,  այսօր՝ սեպտեմբերի 28-ին, ճեպազրույցի ժամանակ նշեց ՀՀ մարդու իրավունքենրի պաշտպան Արման Թաթոյանը։ 

«Ակնհայտ է, որ վտանգված է երեխաների, կանանց, տարեցների կյանքն ու առողջությունը, որովհետև մահացած մարդկանց շրջանում և՛ կին կա, և՛ երեխա, և՛ տարեց։ Վիրավորների թվում էլ կան կանայք, երեխաներ, տարեց մարդիկ։ Խնդիրն այն է, որ այս գործողությունները ուղեկցվում են քաղաքացիական խաղաղ բնակչության համար կենսական նշանակություն ունեցող օբյեկտներին հարվածներ հասցնելու, կամ առհասարակ դրանք պարալիզացնելու ուղղությամբ, խոսքը վերաբերում է, օրինակ՝ կապի միջոցներին, խաղաղ բնակչության տեղաշարժման համար կենսական նշանակություն ունեցող ճանապարհներին և այլն»,- ասաց ՄԻՊ-ը։

Ըստ ՄԻՊ գրասենյակի մոնիթորինգի՝  պատերազմի առաջին իսկ օրվանից հայատյացության քարոզը համակարգված է դարձել։ Սոցիալական ցանցերում  տարատեսակ տեսնայութեր են տարածվում, որոնք միտված են  խաղաղ բնակչության շրջանում տագնապ առաջացնել։ Արման Թաթոյանը հայ մայրերին և երեխաներին կոչ արեց, որպեսզի զերծ մնան սոցիալական ցանցերից, հատկապես՝ TikTok-ից։

Անդրադառնալով Հայաստանի կողմից  Մարդու իրավունքների եվրոպական դատարան դիմելուն՝ Ադրբեջանի նկատմամբ միջանկյալ միջոց կիրառելու խնդրով, Արման Թաթոյանն ասաց, որ ՀՀ Մարդու իրավունքների պաշտպանի գրասենյակն իրավասություն չունի  միջամտելու, բայց գործի ընթացքից կախված՝ ՄԻՊ գրասենյակը կարող է դիտարկել 3-րդ կողմ ներգրավելու հարցը։