Սա այն Թուրքիան չէ, որը համարվում էր ԱՄՆ-ի կրտսեր գործընկերը. Ռուբեն Մելքոնյան
ՔԱՂԱՔԱԿԱՆՈՒԹՅՈՒՆ
ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը 1or.am-ի հետ զրույցում անդրադառանալով օրեր առաջ Արցախա-ադրբեջանական սահմանին սկսված և շարունակվող պատերազմական գործողություններին, ինչպես նաև դրա հետևանքով տարածաշրջանային լարվածության հետագա հնարավոր զագացումերին՝ նշեց, որ հաշվի առնելով Թուրքիայի վերջին տարիների փոփոխված նկրտումներն ու պահվածքը, ինչպես նաև դրանից բխող կոնկրետ քայլերը տարբեր կոնֆլիկտներում ներգրավվելու առումով կարելի է ասել, որ Թուրքիայի ագրեսիվ քաղաքականությունը, միջազգային չափորոշիչները ոտնահարող քաղաքական ոճը կարող են ունենալ ամենածայրահեղական դրսևորումները:
«Հաշվի առնելով այս ամենը, մենք, ցավոք սրտի, պետք է ավելի շատ հակված լինենք վատատեսական սցենարների ու Թուրքիայից սպասել ամենաբասացական, ամենաագրեսիվ քայլերի, քանի որ սա այն Թուրքիան չէ, որը համարվում էր ԱՄՆ-ի կրտսեր գործընկերը: Այլ այդ երկիրը վերջին շրջանում հանդես է գալիս իսլամական աշխարհում որոշակի առաջնային դիրք զբաղեցնելու ցանկությամբ և նկրտումներով: Սրանք ոչ միայն խոսքեր են, այլև Թուրքիայի կողմից վերջին տարիներին հետևողականորեն իրականացված քաղաքական գծի ուսումնասիրության վրա հիմնված եզրակացություն։ Ուստի, պետք չէ այդ երկրից սպասել դրական քայլ կամ միջազգային տարբեր չափորոշիչները հարգելու փորձ, քանի որ Թուրքիան բացահայտ վարում է ահաբեկչական և ցեղասպան քաղաքականություն: Այսինքն՝ հստակ կարող ենք ասել, որ Թուրքիան իր բնույթով լինելով ցեղասպան երկիր, դրան գումարել է նաև ահաբեկչական մտածողությունը և դարձել վտանգավոր ոչ միայն տարածաշրջանի, այլև՝ ողջ գլոբալ աշխարհի համար»,- ասաց Ռ. Մելքոնյանը:
Արմինե Գրիգորյան
