Ադրբեջանը չի կարողանում մարսել տավուշյան դասերը

Ադրբեջանական քարոզչամեքենան անխափան աշխատելով շարունակում է սեփական լսարանին համոզել, թե հայ-ադրբեջանական հակամարտության կարգավորման հարցում մեջ իրենք են գերակա դիրք գրավում: Նման մոտեցում գեներացնելով փորձում են ներքին սպառողին համոզել, որ մածունը սև է, չնայած, որ Ադրբեջանում ևս լավ են հասկանում, որ այդ ամենը միայն մեկ նպատակ է հետապնդում՝ թաքցնել ալիևյան վարչակազմի ֆիասկոները:

Աջից-ձախից տարբեր տեղեկություններ իրար կցելով ադրբեջանական մամուլը փորձում է իր ներքին սպառողին չեղած իրականությունը հրամցնելուց բացի, Հայաստանին ներքաշել նոր ինտրիգի մեջ, բայց, համաձայնեք, որ այս մոտեցումն այնքան հին ու մաշված մեթոդ է, որ այլևս որևէ մեկին չի զարմացնում կամ՝ զայրացնում:

Ադրբեջանական կողմի վերջին տեղեկությունների համաձայն ՀՀ վարչապետի նախկին խորհրդական Արսեն Խառատյանը ուղիղ բանակցություններ  սկսելու առաջարկով դիմել է Ադրբեջանի կառավարության աղբյուրներին և իր պաշտոնավարման ընթացքում հասցրել է մի քանի անգամ հանդիպել ադրբեջանական կողմի ներկայացուցչի հետ, ինչ-ինչ հարցեր քննարկել:

Սա ադրբեջանական քարոզչամեքենայի սովորական դարձած, հայտնի ձեռագիրն է, երբ սեփական ձախողումներից հասրակության ուշադրությունը շեղելու համար փորձ է արվում այլ թեմաներ շրջանառել: Բայց հարց է ծագում, թե ինչո՞ւ է հակառակորդը հիմա որոշել այս ամենի մասին բարձրաձայնել:

Խնդիրն այն է, որ պաշտոնական Բաքուն չի կարողանում մարսել տավուշյան դեպքերից իրենց բաժին հասած դասերը և, բնական է, ներքին լսարանին ստի հերթական չափաբաժնով կերակրելու համար շրջանառության մեջ է դրել մի վարկած, որպեսզի իրեն ու մյուսներին համոզի, թե իր դիրքները ոչ թե խարխուլ են, այլ՝ հակառակը:

Մինչդեռ ճիշտ հակառակ պատկերն է: Ուստի, այդ ամենը կոծկելու համար ադրբեջանական կողմը որոշել է հերթական անգամ դիմել հին հնարքներին, ձեռքի հետ էլ փորձելով կռիվ գցել Հայաստանի ու Ռուսաստանի միջև:

Արմինե Գրիգորյան