Հայը պետք է իր երկրի շահը գերադասի օտարի շահից
ՎԵՐԼՈՒԾՈՒԹՅՈՒՆՆԵՐ
1or.am կայքի զրուցակիցը Իմ քայլը խմբակցության պատգամավոր Եղիշե Սողոմոնյանն է։
Պարոն Սողոմոնյան վերջերս ռուսական «Դոսյե» կենտրոն ոչ առևտրային կազմակերպությունը, որը կապվում է արտասահմանում գտնվող ռուս միլիոնատեր Միխայիլ Խոդորկովսկու անվան հետ, ներկայացրել է զեկույց, որտեղ անդրադարձ է եղել նաև Հայաստանում գործող ռուսամետ ազդեցության գործակալներին, հրապարակվել են մի քանի անուններ։ Հայաստանի իշխանությունների համար արդյո՞ք անակնկալ չէր նման բացահայտումները։
— Կարծում եմ, որ անակնկալ չէր, որովհետև ամեն երկիր ունի իր ԱԱԾ-ն, որոնք փորձում են տեղեկություններ ստանալ բոլոր այն երկրների մասին որոնց հետ ունեն համագործակցություն։ Մեզ հայտնի է եղել, որ Ռուսաստանը Հայաստանում բավականին շատ ինֆորմացիոն աղբյուրներ ունի և այդ հրապարակումը, կարծում եմ, բնական էր։ Բայց ես բացասական եմ վերաբերվում այն հային, ով առաջնորդվում է ոչ թե իր ազգային շահերով, այլ առաջնորդվում է օտար երկրի շահերով, և մենք պետք է փոխենք մտածողություն, այն, որ հայը պետք է իր երկրի շահը գերադասի օտարի շահից։ Եվ այն մարդկանց, ովքեր օտարին են գերադասում պետք է բացասական վերաբերվենք, և ըստ էության, պետք է այդ մարդիկ պախարակման ենթակա լինեն, որ մեր երկրում էլ ավելի քիչ լինեն նմանները։
- Կա այնպիսի տեսակետ, որ մեր ԱԱԾ-ն պետք է քրեական հետապնդում սկսի «Դոսյե»-ի հրապարակած հետաքննության հիմքով: Դուք կիսո՞ւմ եք այդ տեսակետը:
— Ոնց որ պահանջում է օրենքը՝ այդ ձևով էլ պետք է ընթանա։ Եթե այս դեպքը ենթադրում է որոշ գործողություններ, ապա, այո՛, պետք է քայլեր ձեռք առնվեն։ Օրենքի շրջանակներում ինչ պահանջվում է, այդպես էլ պետք է վարվեն։
- Այդ փաստաթղթերում հիշատակվում են Հայկ Բաբուխանյանի, Անդրանիկ Նիկողոսյանի, Գագիկ Ծառուկյանի անունները: Այդ ցանկում որևէ մեկի անունը ձեզ համար բացահայտո՞ւմ էր:
— Ինձ համար՝ ոչ։ Բաբուխանյանի մասին հատկապես շատ է խոսվել նաև մինչ հեղափոխությունը, և հասարակությանը հայտնի է եղել, որ այդ մարդը նման դիմագիծ ունի, և կարծում եմ՝ ոչ մեկի համար էլ անակնկալ չէր։
Սոնա Գիշյան
