6 վտանգավոր ախտանշան, որոնք ոչ մի դեպքում չի կարելի անուշադրության մատնել
ՖՈՏՈ
Առողջական ցանկացած խնդրի դեպքում մարդու օրգանիզմը միշտ հուշում է դրանց մասին որոշակի ախտանշանների միջոցով, ինչն օգնում է ժամանակին հայտնաբերել խանգարումն ու միջոցներ ձեռնարկել, սակայն շատ հաճախ մարդիկ անտեսում են այդ հուշումները, ինչը հանգեցնում է լուրջ բարդությունների: Նման խնդիրներից խուսափելու համար հարկավոր է չանտեսել ախտանշաններն ու պարբերաբար պրոֆիլակտիկ բուժզննում անցնել:
MedikForum.ru պորտալը ներկայացրել է վեց ախտանշան, որոնք ոչ մի դեպքում չի կարելի անուշադրության մատնել, քանի որ դրանք կարող են պայմանավորված լինել առողջական լուրջ խնդիրներով:
Ծարավի զգացում
Եթե անհագ ծարավի զգացումն ուղեկցվում է հոգնածության զգացումով, հաճախակի միզազատությամբ և մեծ քանակությամբ ջրի գործածությամբ, ապա այն կարող է պայմանավորված լինել արյան մեջ շաքարի մակարդակի նվազմամբ: Այս դեպքում կարող են նկատվել նաև այնպիսի ախտանշաններ, ինչպիսին են հաճախակի վարակները, ֆուրունկուլներն ու քաշի կորուստը:
Արյունոտ մեզ
Շատ վտանգավոր ախտանշան է նաև մեզի մեջ արյան հետքերի առաջացումը: Ընդ որում՝ հարկավոր է դիմել մասնագետին անգամ մեկ անգամ մեզի մեջ արյուն նկատելու դեպքում: Այս ախտանշանը կարող է պայմանավորված լինել ինչպես ցիստիտով՝ միզապարկի բորբոքմամբ, այնպես էլ միզապարկի քաղցկեղով: Զարգացման վաղ փուլերում միզապարկի քաղցկեղը կարող է հազվադեպ դրսևորվել այս ախտանշանով, ուստի եթե արյունն ի հայտ է գալիս և անհետանում, ապա դեռ չի նշանակում, որ կարելի է անտեսել խնդիրը:
Անբացատրելի կապտուկներ
Առանց որևէ պատճառի կապտուկների առաջացման պատճառ կարող է դառնալ ասպիրինի կամ հակամակարդիչի (օրինակ՝ վարֆարինի) ընդունումը, սակայն այնուամենայնիվ անգամ այդ դեպքում հարկավոր է դիմել մասնագետին: Անբացատրելի կապտուկները կարող են լինել արյան մեջ թրոմբոցիտների պակասի կամ անգամ լեյկոզի ախտանշան, ուստի դրանք ոչ մի դեպքում չի կարելի անտեսել:
Ձայնի խռպոտություն
Ավելի քան 3 շաբաթ տևող ձայնի խռպոռությունն այն ախտանշաններից է, որոնք ոչ մի դեպքում չի կարելի անտեսել: Ընդ որում՝ սա հատկապես վտանգավոր ախտանշան է, եթե մարդը ծխում է:
Գիշերային առատ քրտնարտադրություն
Կանանց դեպքում գիշերային առատ քրտնարտադրությունը դաշտանադադարի մասին հուշող շատ տարածված ախտանշան է, սակայն այն այնուամենայնիվ չի կարելի անուշադրության մատնել: Ոչ շատ բարձր ջերմությամբ ուղեկցվող առատ քրտնարտադրությունը կարող է վկայել արյան քաղցկեղի մասին, ուստի ժամանակին բժշկին չդիմելը կարող է ճակատագրական լինել:
Փորափքանք
Մեծ քանակությամբ սննդի ընդունումից հետո փորափքանքի զարգացումը նորմալ երևույթ է, սակայն եթե տհաճ զգացողություններն առաջանում են սննդի յուրաքանչյուր ընդունումից հետո, ապա հարկավոր է դիմել մասնագետին: Հատկապես վտանգավոր է, եթե փորափքանքն ուղեկցվում է հագեցածության զգացումով, ինչպես նաև կոնքի կամ որովայնի հատվածի երկարատև ցավով: Նման դեպքերում պետք է անհապաղ բուժզննում անցնել, քանի որ խնդիրը կարող է պայմանավորված լինել ձվարանների քաղցկեղով:
