Կարող է ուշանալ, բայց երբեք էլ չի կարող անտեսվել
ՀԱՍԱՐԱԿՈՒԹՅՈՒՆ
Օրերս լրացավ աշխարհահռչակ մուլտիպլիկատոր Ռոբերտ Սահակյանցի 70-ամյակը: Այդ օրը, սակայն, պետական մակարդակով պաշտոնական որևէ միջոցառում չիրականացվեց:
1or.am-ը ԿԳՄՍ նախարությունից փորձեց ճշտել, թե ինչու առանձնակի շուքով չի նշվել հայ հայտնի գործչի հոբելյանը, քանի որ նրա ներդրումը հայրենական մուլտֆիլմերի արտադրության ոլորտում անգնահատելի է:
Հարցի կապակցությամբ, ՀՀ կրթության, գիտության, մշակույթի և սպորտի նախարարության լրատվական ծառայությունից 1or.am-ին տեղեկացրեցին, որ իրենց աջակցությամբ, աշնանը իրականացվող կինոփառատոններում՝ Երևանի «Ոսկե Ծիրան» 17-րդ միջազգային, «ՌեԱնիմանիա» միջազգային անիմացիոն կինոյի և պատկերապատման արվեստի փառատոնների ժամանակ կանցկացվեն հոբելյանական միջոցառումներ՝ հետահայաց ցուցադրություններ և վարպետաց դասեր՝ նվիրված անվանի մուլտիպլիկատոր Ռոբերտ Սահակյանցի հոբելյանին:
Բացի այդ, «Հայաստանի ազգային կինոկենտրոն» ՊՈԱԿ-ի կողմից սեպտեմբեր և հոկտեմբեր ամիսներին նախատեսվող մարզային բացօթյա ցուցադրությունների շրջանակներում ևս անցկացվելու են միջոցառումներ՝ նվիրված Ռոբերտ Սահակյանցի հոբելյանին, որտեղ կցուցադրվեն վարպետի ստեղծած մուլտիպլիկացիոն կինոնկարները:
Ինչ վերաբերում է մինչ օրս անվանի գործչի ծննդյան օրը նախարարության կողմից միջոցառումներ չիրականացնելուն, ապա դա պայմանվորված է եղել COVID-19-ի պատճառով բազմամարդ միջոցառումների սահմանփակումներով: Այնպես որ, կարող ենք վստահ լինել, որ ինչպես Սահակյանցի արվեստն է մնայուն արժեք, այնպես էլ մեծանուն հայի հիշատակն է հավերժ, որը, թեև հանգամանքների բերումով կարող է ուշանալ, բայց երբեք էլ չի կարող անտեսվել:
Կարինե Մարտիրոսյան
