Սկզբում չեն գիտակցում, հետո, երբ ամեն ինչից զրկվում են, փոշմանում են. Գեղամ Ղազարյան
ՀԱՍԱՐԱԿՈՒԹՅՈՒՆ
Այս տարի մեկնարկեց գյուղատնտեսության ոլորտում ապահովագրական համակարգի ներդրման պետական աջակցության ծրագիրը: Կնքվել է շուրջ 1546 պայմանագիր՝ ընդհանուր առմամբ շուրջ 2500 հեկտարի համար: Հիմա արդեն ֆերմերները եղանակային պայմանների պատճառով կորցրած բերքի դիմաց սկսել են փոխհատուցումներ ստանալ:
1or.am-ի հետ զրույցում Արմավիրի մարզի Լենուղի համայնքի ղեկավար Գեղամ Ղազարյանը նշեց, որ այս տարի նախորդ տարիների համեմատ ծիրանի, դեղձի բերքը պակաս է եղել: Պատճառը եղանակային անբարենպաստ պայմաններն են եղել, բայց համայնքում կան ֆերմերներ որոնք հասցրել էին իրենց հողակտորը ապահովագրել և այնքան էլ չեն տուժել:
«Այս տարի համայքի ֆերմերների միայն10 տոկոսն էր իր բերքն ապահովագրել: Մնացածը, երևի չէին գիտակցում ապահովագրության լավ կողմերը, այդ պատճառով չապահովագրեցին: Միշտ այդպես է լինում սկզբում չեն գիտակցում, հետո, երբ ամեն ինչից զրկվում են, փոշմանում են»,- ասաց Գ. Ղազարյանը:
Նա նշեց, որ իրենց համայնքի բնակիչներից մեկը, սակայն, ով ապահովագրել էր իր ծիրանի այգին, եղանակային անմխիթար պայմանների պատճառով կորցնելով բերքի մեծ մասը, հիմա դրա դիմաց ապահովագրական ընկերությունից ստացել է փոխհատուցում:
«Իմ կարծիքով, մյուս տարի կավելանա ապահովագրելու ցանկություն հայտնողների թիվը, քանի որ մեր համայնքը ռիսկային գոտում է գտնվում, շատ խնդիրներ կան, որոնք մեզնից կախված չեն՝ կարկուտը, քամին, երկարատև անձրևների վտանգը, հրդեհները, այդ ամենը ազդում են բերքատվության վրա: Այնպես որ, կարծում եմ հաջորդ տարի գյուղացին եթե ապահովագրի իր տնտեսությունը իրեն ավելի պաշտպանված կզգա»,- ասաց Գ. Ղազարյանը:
Գայանե Մաթևոսյան
