Եթե նախկին նախարարը գործընթացը տապալեց, ապա նոր նախարարը չի հասկանում նախարարության դերը
ՎԵՐԼՈՒԾՈՒԹՅՈՒՆՆԵՐ
«ԷկոԼուր» տեղեկատվական ՀԿ-ի նախագահ, փորձագետ Ինգա Զարաֆյանի դիտարկմամբ, այն ինչ կատարվում է Ամուլսարի շուրջ վաղուց դուրս է եկել զուտ բնապահպանական խնդիր լինելու շրջանակներից և դարձել է հասարակական-քաղաքական խնդիր: Եվ քանի դեռ իշխանությունները հստակություն չեն մտցրել այս հարցում, խնդիրը գնալով կշարունակի բարդանալ: Փորձագետը 1or.am-ի հետ զրույցում նշեց նաև, որ օրենքով նախատեսված բոլոր լծակները կան նախկին իշխանությունների օրոք Ամուլսարի շահագործման դրական ՇՆԱԳ եզրակացությունն առոչինչ ճանաչելու համար, բայց պարզ չէ, թե իշխանություններն ինչու են հապաղում:
«Դրա հիմքերը շատ ստույգ են և հիմնավոր, որի մասին, ի դեպ նշված է «Էլարդ» կազմակերպության ոչ լիարժեք իրականացված եզրակացության մեջ: Այսինքն, կառավարությունը ստացել է նաև անկախ փորձագիտական կազմակերպության եզրակացությունը, համաձայն որի՝ ռիսկերը ճիշտ գնահատված չեն և դժվար է ասել, թե դրանք հնարավո՞ր է կառավարել, թե՞ ոչ: Դա նշանակում է, որ հարկավոր է նոր փորձաքննություն անցկացնել: Եվ սա առաջին քայլը պետք է լինի, որովհետև մենք հասկանում ենք, որ եթե նորմալ փորձաքննություն իրականացվի, ռիսկերը ճիշտ գնահատվեն, ապա նաև պարզ կլինի, որ դրանք կառավարելի չեն»,-ասաց Ի. Զարաֆյանը:
Փորձագետի դիտարկմամբ, երկու խոշոր կազմակերպություններ, որոնք հովանավորում էին «Լիդիան Արմենիա» կազմակերպության ծրագիրը, ևս հրաժարվել են ֆինանսավորել այն, որն, ի դեպ, կազմում էր ծրագրի հիմնական կապիտալը: Դրանք Եվրոպական բանկը և Համաշխարհային բանկի մասնաճյուղն էին: Սա ևս խոսում է ծրագրի կասկածելի լինելու մասին: Եվ այս պայմաններում Ի. Զարաֆյանի համար հասկանալի չէ, թե ինչու է Հայաստանի կառավարությունը շարունակում լռել:
«Այդ լությունը Լիդիանն ընդունում է որպես խրախուսում և, բնական է, որ անցանկալի զարգացումներ կարող են տեղի ունենալ, ինչը չի կարելի թույլ տալ»,-ասաց փորձագետը:
Խոսելով այս հարցի վերաբերյալ՝ Շրջակա միջավայրի նորանշանակ նախարար Ռոմանոս Պետրոսյանի դիրքորոշման մասին, համաձայն որի նա հայտարարել է, որ իր դիրքորոշումը չի կարող կառավարության դիրքորոշումից տարբերվել, ըստ փորձագետի, խոսում է այն մասին, որ նախարարը դեռևս չի հասկացել, թե որն է առհասարակ նախարարության դերը:
«Շրջակա միջավայրի նախարարությունը պետք է եզրակացություն ներկայացնի, որպեսզի կառավարությունը կողմնորոշվի, թե ինչ որոշում պետք է կայացնի: Եվ եթե նախորդ նախարարն ընդհանրապես տապալեց այդ ամբողջ գործընթացը, ապա նոր նախարարը դեռևս չի հասկացել, որ նախ իրենք պետք է նախաձեռնությամբ հանդես գան, ասեն, որ նախկինում սխալ որոշում է կայացվել, չեղյալ համարեն նախկին եզրակացությունը և նոր ՇՄԱԳ իրականացնեն: Հարց է ծագում, թե ումից են վախենում: Եվ եթե նախկինում գուցե միջազգային կազմակերպություններից էին կաշկանդված, քանի որ տարբեր ֆինանսական հարցեր ունեին, հիմա դա էլ չկա: Նշանակում է՝ կան այլ ուժեր, և հարկավոր է հասկանալ, թե ով է կանխում նախկին ՇՄԱԳ-եզրակացությունը չեղյալ հայտարարելու գործընթացը»,-ասաց Ի. Զարաֆյանը:
Արմինե Գրիգորյան
