Լուրեր են պտտվում, որ դպրոցները բացելուց մեկ-երկու շաբաթ հետո կրկին կփակվեն
ՎԵՐԼՈՒԾՈՒԹՅՈՒՆՆԵՐ
Թեև ԿԳՄՍ նախարարությունը շարունակում է իր կողմից մշակած ու հրապարակած որոշումներն անթերի համարել ու պարտադրել, որ դրանցով առաջնորդվեն, բայց ոլորտի փորձագետները և դպրոցների տնօրենները շարունակում են հարցեր բարձրացնել, որոնք մեծ հաշվով հաշվի չեն առնվում նախարարության մասնագետների կողմից: Եթե տնօրենները վախենում են բարձրաձայն այդ մասին հայտնել, որպեսզի սպիտակ ագռավի համբավի չարժանան և փորձում են ԿԳՄՍ-ի առաջադրած խնդիրը կոլիկտիվների անդամների ջանքերով լուծել, ապա փորձագետները, շարունակում են բարձրաձայնել հարցեր, որոնց պատասխանները ԿԳՄՍ-ի կողմից կրկին մնում են անպատասխան:
Միակ մխիթարող միտքը, որ նախարար Արայիկ Հարությունյանը մինչ այս պահը հնչեցրել է, ԿԳՄՍ-ի կողմից սահմանված արգելքները իրավիճակին համահունչ մեղմացնելու պատրաստակամությունն է: ԱԺ նախկին պատգամավոր կրթության ոլորտի փորձագետ, երկար տարիներ դպրոցի տնօրեն աշխատած Անահիտ Բախշյանը, ով բավական մոտիկից է ծանոթ այս ոլորտին 1or.am-ի հետ զրույցում նշեց, որ իր համար ևս հասկանալի չէ, թե ուղեցույցի հանձնարարականներն ինչպես պետք է տեղերում իրականացվեն:
«Մտահոգություններս բավական շատ են և այս ուղեցույցով, փաստորեն ոչ միայն շատ լուրջ խնդիր, այլև պատասխանատվություն է դրվում դպրոցների տնօրենների վրա, որն իրագործելը բավական բարդ է լինելու»,- ասաց Ա. Բախշյանը:
Ի դեպ, ուսուցիչների շրջանում լուրեր են պտտվում, որ դպրոցները բացելուց մեկ-երկու շաբաթ հետո կրկին կփակվեն և դասապրոցեսը կրկին օնլայն տարբերակով կշարունակվի: Հիմա պարզապես դասերը դպրոցներում սկսելու որոշում է կայացվել, որպեսզի հնարավորություն ունենան աշակերտներին դասագրքերով ապահովել: Եվ երբ դասագրքերը բաժանվեն, դպրոցները կրկին կանցնեն օնլայն ռեժիմի:
Սարգիս Ավետիսյան
