Համայնքերի խոշորացումը կնվազեցնի կոռուպցիոն ռիսկերի հնարավորությունը
ՎԵՐԼՈՒԾՈՒԹՅՈՒՆՆԵՐ
Ֆինանսիստների միավորման նախագահ, միջազգային փորձագետ Վահան Մովսիսյանը 1or.am-ի հետ զրույցում նշեց, որ Տավուշի մարզում միայն մեկ համայնք է մնացել, որը պետք է խոշորացվի, քանի որ դրան այլըտրանք չկա: Նախկինում խոշորացված համայքների աշխատանքը ցույց է տալիս, որ այն արդարացված քայլ է: Գործընթացի ավարտից հետո, սակայն, հարկ կլինի կրկին վերանայել, թե դրանցից որոնք են առավել արդյունավետ աշխատում, որոնք՝ ոչ:
«Խոշորացման ժամանակ համայնքների ընտրությունը կարող էր ավելի արդյունավետ լինել, բայց այսօր ունենք այն՝ ինչ ունենք: Դրանով համայքները ուժեղացան և կստանան նոր լիազորություններ, որոնք ներկայումս իրականացվում են կա՛մ մարզպետարանների կա՛մ նախարարությունների կողմից: Մինչդեռ, համայնքները պետք է կարողանան ստանձնել այդ լիազորությունների փաթեթները, որպեսզի ընտրությունների ժամանակ ընտրողների քվեի միջոցով իրենց արտահայտությունը ստանան»,- ասաց Վ. Մովսիսյանը:
Նա վստահ է, որ ժամանակի ընթացքում ոչ արդյունավետ ձևավորված փնջերը կարող են վերամիավորվել կամ առանձնացվել, բայց կարևորը գործընթացն արագ ավարտելն ու ապակենտրոնացված կառավարման անցնելն է, քանի որ այդ երկու գործընթացները հնարավոր չէ զուգահեռ իրականացնել:
«Չի կարող այնպիսի իրավիճակ լինել, որ, օրինակ, համայնքների մի մասի կրթության հարցերով զբաղվեն մարզպետարանները, մյուս մասինով՝ համայնքապետարանները: Ի դեպ, ներկայում իրականացվող սուբվենցիոն ծրագրերի գերակշիռ մասը բազմաբնակավայր համայնքներում են իրականացվում, քանի որ այնտեղ է գումարների կենտրոնացում եղել: Այդկերպ հնարավոր է դարձել պետության հետ համագործակցելով խոշոր ծրագրեր իրականացնել»,- ասաց Վ. Մովսիսյանը:
Հարցին, թե ապակենտրոնացման արդյունքում մեծ չէ՞ արդյոք հավանականությունը, որ տեղերում կաճեն կոռուպցիոն ռիսկերը, փորձագետը նշեց, որ ավելի մեծ է կոռուպցիոն ռիսկերի հավանականությունը, երբ ծրագրերն իրականացվում են պետական վերահսկողության ներքո, իսկ համայնքների դեպքում բնակիչների վերահսկողության ներքո են իրականացվում գործողությունները և ավելի վերահսկելի են:
«Բազմաբնակավայր համայնքները մեկ գյուղի ապրողներ չեն, որ ամեն ինչի վրա աչք փակեն: Մյուս համայնքները ևս հետևելու են, որ ընդհանուր գումարից իրենք էլ մաս ունենան: Այսինքն՝ այս դեպքում և՛ մասնակցայնությունն է բարձր, և՛ վերահսկողությունը, ինչն այսօր արդեն տեսանելի է որոշ խոշորացված համայնքներում»,- ասաց Վ. Մովսիսյանը:
Արմինե Գրիգորյան
