«Իզմերի» բացակայությունն ու հայաստանյան իրականությունը
ՎԵՐԼՈՒԾՈՒԹՅՈՒՆՆԵՐ
Բոլորիս է հայտնի, որ Նիկոլ Փաշինյանի իշխանության գալուց հետո նրա իշխանությանը տարբեր պիտակներ են փակցվել, որոնցից ամենատարածվածը «սորոսական» լինելու պիտակն է։ Փաշինյանի իշխանությանը «սորոսական» են համարում այն պատճառով, որ նրա թիմում կան բազմաթիվ մարդիկ, ովքեր տարիներ շարունակ ու հսկայական քանակով դրամաշնորհներ են ստացել Սորոսի ստեղծած հիմնադրամի հայաստանյան մասնաճյուղից՝ «Բաց հասարակության հիմնադրամներից»։ Նիկոլի թիմում միայն Սորոսի հիմնադրամից չէ, որ դրամաշնորհ ստացածներ կան, բայց նրանց բոլորին տվել են «սորոսական» պիտակավորումը։ Ըստ այդմ՝ «սորոսականը» հավաքական ձևակերպում է։ Մարդը կարող է որևէ կազմակերպությունից դրամաշնորհ ստացած չլինել, բայց համարվել «սորոսական», և հակառակը։
Իրականում ասել, որ Փաշինյանը «սորոսական» է, պարզունակ մոտեցում է, քանզի նա փաստացի «ոչմիբանական» է, քանի որ յուրաքանչյուր իշխանություն, որը չունի գաղափարական հիմք կամ «իզմ», խոսում է այդ ոժի անբովանդակ ու դատարկ լինելու մասին։ Նիկոլը հայտարարել է, որ չունի «իզմեր»։ Փաշինյանի գաղափարական ու աշխարհայացքային դատարկությունն էլ փորձում են լցնել տարբեր շրջանակներ, այդ թվում՝ սորոսական։ Ու քանի որ վերջիններս ակտիվ են տեղեկատվական դաշտում ու հմուտ են չեղած տեղից աղմուկ բարձրացնելու գործում, ուստի դա պրոյեկտվում է Փաշինյանի վրա, ու նա դառնում է «սորոսական»՝ անկախ իր կամքից։
Միանշանակ է, որ Փաշինյանը չունի ՀՀ առնչվող ներքին ու արտաքին քաղաքական հարցերում կայուն տեսակետներ։ Չկան Արցախի հարցի լուծման պատկերացում, հայ–ռուսական հարաբերությունների մասին հստակ մոտեցում, Արևմուտքի հետ հարաբերությունների հայեցակարգ և այլն։ Փաշինյանը չունի կայուն սկզբունքներ, աշխարհայացք և պատկերացումներ, ավելին՝ նա պատրաստված չէ գաղափարապես և չունի պետության զարգացման տեսլական։
Անդրանիկ Կիրակոսյան
