Երեք մթերք, որոնք կարող են դառնալ տագնապի ու անհանգստության պատճառ
ՀԱՍԱՐԱԿՈՒԹՅՈՒՆ
Տագնապային խանգարումները բավական տարածված են և հանդիպում են շատ ավելի հաճախ, քան շատերն են կարծում, սակայն քչերին է հայտնի, որ նման խանգարումների զարգացման հավանականության վրա ազդում են ոչ միայն որոշակի իրադարձությունները, այլև սննդային նախասիրությունները։ Բանն այն է, որ կան սննդամթերքի տեսակներ, որոնք բարձրացնում են տագնապի ու անհանգստության մակարդակը, ուստի նման խնդիրների առկայության դեպքում դրանցից խորհուրդ է տրվում խուսափել։
Պարզ ածխաջրեր
Սպիտակ հացը, բրինձը, ինչպես նաև մակարոնեղենը, որը պատրաստված չէ ամբողջական հացահատիկից, պարունակում են ռաֆինացված շաքար, որը վնասակար է ոչ միայն առողջության համար, այլև տրամադրության։ Ռաֆինացված շաքարի գործածությունը հանգեցնում է արյան մեջ շաքարի մակարդակի կտրուկ բարձրացման, իսկ որոշ ժամանակ անց նույնքան կտրուկ անկման, իսկ նման կտրուկ տատանումներն ուղեկցվում են անհանգստության ու տագնապի զգացումով։
Շոկոլադ
Սովորաբար մարդիկ շոկոլադն օգտագործում են վատ տրամադրության դեմ պայքարի համար, սակայն իրականում այն կարող է հակառակ ազդեցությունն ունենալ, քանի որ պարունակում է շաքար ու կոֆեին, որոնց համադրությունը խիստ բացասաբար է անդրադառնում օրգանիզմի վրա։ Գիտնականները խորհուրդ են տալիս փոխարինել շոկոլադը որևէ սպիտակուցային մթերքով, որն ունի ցածր յուղայնություն։ Հիանալի տարբերակ կարող է լինել հունական յոգուրտը, որը կարելի է քաղցրացնել մրգերի ու հատապտուղների միջոցով։
Տարատեսակ պատրաստի սոուսներ
Պատրաստի սոուսները թույլ են տալիս զգալիորեն խնայել ժամանակը տարատեսակ ուտեստների պատրաստման ժամանակ, սակայն դրանք կարող են բավական վատ անդրադառնալ օրգանիզմի վրա։ Բանն այն է, որ նման սոուսները պարունակում են մեծ քանակությամբ շաքար, որն էլ հանգեցնում է անհանգստության ու տագնապի մակարդակի բարձրացման։
