Պատգամավոր Հրաչյա Հակոբյանի առանձնատան հետքերով
ՀԱՍԱՐԱԿՈՒԹՅՈՒՆ
Նիկոլ Փաշինյանի աներորդի, ԱԺ պատգամավոր Հրաչյա Հակոբյանի Ձորաղբյուրում գնած տունը դարձել է նոր ուսումնասիրության առարկա: Հիշեցնենք՝ մամուլում տեղեկություն էր տարածվել, որ պատգամավորը առաձնատուն է գնել, ինչին ի պատասխան նա ասել էր, որ այսօր Ձորաղբյուրում հնարավոր է անգամ 15 հազար դոլարով առանձնատուն գնել:
Պարզելու համար, թե Ձորաղբյուրի հայտնի առանձնատների վաճառքի գներն այսօրվա դրությամբ ի՞նչ սահմաններում են տատանվում, 1or.am-ը ուսումնասիրություն կատարեց և պարզեց, որ Ձորաղբյուրի ամառանոցների վաճառքի գները բավականին տարբեր են՝ կախված ամառանոցի տեղից, դիրքից և պայմաններից:
Մասնավորապես՝ Ձորաղբյուրի ամառանոցային տարածքում կիսակառույց ամառանոց կարելի է ձեռք բերել անգամ 7500 դոլարով: Մեկհարկանի ոչ շատ շքեղ առանձնատների արժեքը սկսվում է 18 հազար դոլարից, իսկ 25 հազար դոլարից սկսած կարելի է միջին վերանորոգում ունեցող մեկհարկանի կամ երկհարկանի ամառանոց ձեռք բերել: Դրանք հիմնականում գազաֆիկացված չեն, չունեն նաև խմելու ջուր, իսկ ընդհանուր հողատարածքը մոտ 500 քառակուսի մետր է: Գազաֆիկացված, խմելու և ոռոգման ջրով ապահովված, 1000 քառակուսի մետր հողատարածք ունեցող առանձնատների արժեքը սկսվում է 35-40 հազար դոլարից:
Ձորաղբյուրի կենտրոնական հատվածում 1000 քառակուսի մետր հողատարածք ունեցող կապիտալ վերանորոգված եռահարկ առանձնատան վաճառքի առաջարկ կա նաև 160 հազար դոլար արժեքով: Ուսումնասիրությունները ցույց տվեցին, որ Ձորաղբյուրի ամառանոցների գները բավականին խայտաբղետ են: Եվ յուրաքանչյուրը ցանկության դեպքում կարող է իր հնարավորությունների ներածին չափով առանձնատուն ձեռք բերել, որոնց գները մեծ հաշվով պայմանավորված են կոմունալ պայմաններից, շինության վիճակից և հողամասի չափից:
Արմինե Գրիգորյան
