Անգլերեն էս խոսում, որ ի՞նչ անես

Հանրության շրջանում և տարբեր քաղաքական շրջանակների կողմից առաջնային քննարկվող հարցերի շարքում շարունակում է իր ուրույն տեղն ունենալ նախորդ շաբաթ Նիկոլ Փաշինյանի BBC հեռուստաալիքի «Hardtalk» հաղորդաշարին տված հարցազրույցը։ Հարցազրույցի քաղաքական բաղադրիչից զատ, որն ինքնին առանցքային նշանակություն ունի հանրության շրջանում, շատ քննարկվեց հարցազրույցի այն հատվածը, որ Փաշինյանն այն տվել էր անգլերենով։ Դե տվյալ դեպքում հստակ վստահ չի կարելի նշել անգլերեն, քանզի, այն գավառական բարբառով, որով հարցազրույց տվեց Փաշինյանը, դժվար է անգլերեն անվանել։ Նիկոլի հարցազրույցը լսելուց հետո յուրաքանչյուր հայի մոտ միանգամից բնական հարց է առաջանում, թե ինչո՞ւ է իր երկրի վարչապետը հարցազրույցներ տալիս անգլերենով, այն պարագայում, երբ լեզվի իմացության փաստը «թեմա» է դառնալու, և անհարկի շահարկումների տեղիք հանդիսանա։ 

Ապացուցված ճշմարտություն է այն, որ ցանկացած ղեկավար փայլուն գիտի իր թույլ և խոցելի կետերը, և հնարավոր ամեն ինչ անում է դրանք շրջանցելու համար։ Համաձայնեք, որ պետության ղեկավարը միջազգային բարձր ամբիոններից պետք է խոսի իր մայրենի լեզվով, իսկ նախապես տարբեր լեզուներով թարգմանված ելույթի տեքստը, թարգմանիչները սինխրոն կներկայացնեն հանրությանը։ Ի դեպ՝ միջազգային այլ հարթակներից օտար լեզուներով են խոսել նաև մեր պետության այլ ղեկավարներ ևս։ Օտար լեզուներին տիրապետելն ինքնին չի նշանակում լինել ինտելեկտուալ, զարգացած, լուրջ քաղաքական գործիչ։ Իսկ մայրենի լեզվով խոսելը, գոնե և առաջին հերթին ազգային արժանապատվության հարց է։

Այնպես որ Փաշինյանի հարցազրույցն ի սկզբանե կարելի է ձախողված համարել՝ հենց բռնաբարված անգլերենով անցկացնելու համար։ Եթե անգամ Փաշինյանն ինքն է փորձել «լոթիանալ» և հարցազրույցն անգլերեն անել, նրա խորհրդականներն ու PR պատասխանատուները պետք է ամեն ինչ անեին նման խայտառակությունից խուսափելու համար։ Ինչ վերաբերվում է հարցազրույցի բովանդակային մասին, փաստ է այն, որ իրականում ոչնչով Փաշինյանը չկարողացավ հակադարձել սուր և բացասական հարցերին, այլ գավառական խուսափողականությամբ ստանձնեց բոլոր մեղադրանքներն ընդունողի դերը: Այն ինչ տեղի ուենցավ BBC –ի եթերում՝ ոչ այլ ինչ էր, քան չկայացած մարդու մարմաջ՝ շաղախված պոպուլիզմի սոուսով։

Արթուր Կիրակոսյան  1or.am