«Խոպանչու» կինը «Օդնոկլասնիկի»-ով գտել ու հանդիպել է անծանոթի հետ, և այդ պահից ամեն ինչ խառնվել է իրար

Վերաքննիչ քրեական դատարանի վարույթում է Վիրաբ Միրանյանի և Վրեժ Մաթևոսյանի գործով բերված վերաքննիչ բողոքների քննությունը:

Գործը քննվել է Շենգավիթ վարչական շրջանի ընդհանուր իրավասության դատարանում Դավիթ Բալայանի նախագահությամբ:

24-ամյա Վիրաբն ու 22-ամյա Վրեժը պայմանագրային զինծառայողներ էին, կոչումով՝ շարքային:

Նրանց մեղադրանք էր առաջադրվել տուժողի առողջությանը դիտավորությամբ միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 2-րդ մասի 3-րդ կետով:

Վիրաբ Միրանյանն իրեն մեղավոր չի ճանաչել ու հայտնել է, թե 2015 թվականի մայիսի 10-ին ինքը տանն է եղել, երբ ժամը 17-ն անց 30-ի սահմաններում իրեն զանգահարել է ընկերուհին՝ Մարոն (անունը փոխված է): Մարոյի հետ ինքը ծանոթացել էր «Օդնոկլասնիկի« կայքի միջոցով:

Մարոն ասել է, թե ամուսինը վերադարձել է Ռուսաստանից ու պահանջում է, որ իրենք նորից միասին ապրեն, մինչդեռ ինքը չի ցանկանում ամուսնու հետ ապրել, ավելին, վախենում է նրանից:

Վիրաբը խոստացել է Երևան ժամանել ու խոսել ծանոթուհու ամուսնու հետ: Դրանից հետո նա զանգել է մորաքրոջ որդուն՝ Վրեժին, ու ընկերոջը՝ Արթուրին: Վերջինիս մեքենայով իրենց գյուղից ժամանել են Երևան:

Ըստ Վիրաբի՝ ճանապարհին ինքը ուղեկիցներին տեղյակ է պահել, թե ինչու են գնում մայրաքաղաք:

Հասել են Երևանի Մայիսի 9-ի փողոցում գտնվող շենքին, մեքենան կայանել են բակում, երեքով բարձրացել են այն բնակարան, որտեղ Մարոն ապրում էր ընկերուհու հետ:

Վրեժն ու Արթուրը Մարոյի ընկերուհու հետ են մնացել, իսկ ինքը Մարոյի հետ առանձնացել է մյուս սենյակում: Մարոն լաց է եղել ու պատմել, որ վիճել է ամուսնու՝ Մհերի հետ, քանի որ չի ուզում այլևս ապրել նրա հետ:

Ինքը Մարոյին հորդորել է, որ հանգիստ լուծի ընտանեկան հարցերը ու ցանկացել է դուրս գալ բնակարանից: Բայց մուտքի դռան մոտ՝ դրսում, նկատել է մի տղամարդու, ով նստած էր աթոռին: Ինքը հարցրել է՝ Մհերը դո՞ւ ես: Նա պատասխանել է՝ հա: Հետո ասել է. «Մտեք ներս, ծանոթանանք»:

Նորից մտել են բնակարան, մտել է նաև Մհերը՝ Վրեժի հետևից: Վրեժն էլ իր հետևից էր գալիս: Ինքը բնազդաբար շրջվել ու տեսել է, որ Մհերը ցանկանում է գարեջրի շշով հարվածել Վրեժին: Ինքը հրել է Մհերին, նա կորցրել է հավասարակշռությունը, բայց վայր չի ընկել, այլ նորից փորձել է հարվածել: Ինքը նրան մի քանի անգամ հարվածել է, ու Մհերը վայր է ընկել:

Այդ պահին Վրեժն ու Արթուրը բռնել են իրեն, թույլ չեն տվել, որ ինքը շարունակի հարվածել: Հետո բոլորը մտել են հյուրասենյակ: Այդ պահին դուռը թակել են: Ոստիկաններն էին, ովքեր տեսնելով Մհերի վնասվածքները, իրենց բերման են ենթարկել:

Բաժնում ինքն է Վրեժին ասել, որ հայտնի՝ իբր իրենք երկուսով են Մհերին ծեծել:

Դեպքից երկու օր հետո ինքն ու Արթուրը հանդիպել են Մհերին, որպես բուժման ծախսեր՝ նրան տվել են 160 հազար դրամ: Մհերը ստացական է գրել: Բայց նաև ասել է, որ եթե իրենք ոստիկաններին ասեն, թե ինքը փորձել է շշով հարվածել, ինքը կպնդի բողոքը: Այդ պատճառով նախաքննության ժամանակ չեն ասել, թե Մհերը ցանկանում էր գարեջրի շշով հարվածել Վրեժին:

Նախաքննության ժամանակ ինքն ասել է, թե Մհերին վնասվածքներ է պատճառել Վրեժի հետ, բայց իրականում բոլոր վնասվածքները միայն ինքն է պատճառել:

Նախաքննական ցուցմունքում Վիրաբն ասել է, թե բնակարանում ինքը Մհերին հորդորել է, որ նա այլևս «աղջիկներին չանհանգստացնի»: Բայց Մհերը կոպիտ պատասխան է տվել: Դրա պատճառով իրենք վիճել են, ինքն ու Վրեժը Մհերին հարվածներ են հասցրել, իսկ Արթուրը միայն բաժանողի դերում էր:

Վրեժ Մաթևոսյանը նույնպես իրեն մեղավոր չի ճանաչել: Նա հայտնել է, որ մորաքրոջ որդին զանգել ու ասել է, թե ընկերուհու ամուսինը Ռուսաստանից վերադարձել է, նեղացրել է Մարոյին, շենքում հայհոյանքներ է տվել, սպառնացել է:

Վիրաբն առաջարկել է գնալ Մարոյի ամուսնու հետ խոսելու՝ որպես Մարոյի ընկերուհու եղբայրներ:

Բնակարանում Վիրաբն առանձնազրույց է ունեցել Մարոյի հետ, իրենց ասել է՝ ամեն բան նորմալ է, իրենք ցանկացել են դուրս գալ ու վերադառնալ իրենց գյուղ: Շքամուտքում աթոռին նստած մի տղամարդու են տեսել: Պարզվել է՝ Մարոյի ամուսին Մհերն է:

Իրենք էլ ներկայացել են որպես Մարոյի հետ ապրող ընկերուհու եղբայրներ: Մհերն իրենց ներս է հրավիրել: Իրենք ներս են մտել, ու, ըստ Վիրաբի, Մհերը ցանկացել է գարեջրի շշով հարվածել իրեն:

Վիրաբը հարվածել է Մհերին, նա ընկել է, իսկ ինքն ու Արթուրը չեն թողել, որ Վիրաբը շարունակի հարվածներ հասցնել: Իրենք Մհերին բարձրացրել են գետնից, տարել են հյուրասենյակ, դեմքի արյունը մաքրել են: Այդ պահին դուռը թակել են, եկել են երկու ոստիկան: Ինքը նրանց ասել է, թե հարվածել է Մհերին, բայց իրականում ինքը չի հարվածել: Նախաքննության ժամանակ ճիշտ չի ասել՝ ցանկանալով մեղմել Վիրաբի վիճակը: Հիմա նոր է հասկանում, որ նման ցուցմունք տալով՝ հակառակը, բարդացրել է իրենց վիճակը, ստացվել է, որ Մհերի առողջությանը միջին ծանրության վնաս են հասցրել խմբով:

Տուժող Մհերի ներկայությունը դատարանում հնարավոր չի եղել ապահովել: Պարզվել է, որ նա 2015 թվականի օգոստոսին հատել է ՀՀ սահմանը ու մեկնել է երկրից:

Նախաքննական ցուցմունքում Մհերը հայտնել է, թե 2015 թվականի հունվարին մեկնել է Ռուսաստան՝ արտագնա աշխատանքի: Կինը խնդրել է, որ իր բացակայության ժամանակ մենակ չապրի, գնա ընկերուհու հետ բնակվի: Իր մեկնելու հաջորդ օրը կինը տեղափոխվել է ընկերուհու տուն:

Ռուսաստանից ինքը միշտ հեռախոսով խոսել է կնոջ հետ: Հայաստան է վերադարձել 2015 թվականի մայիսի 10-ին:
Օդանավակայանից միանգամից գնացել է կնոջ ընկերուհու տուն՝ կնոջն անակնկալ մատուցելու համար:

Հանդիպել է կնոջը, ասել է, որ բնակարան է վարձելու՝ իրենք միասին ապրեն, առաջարկել է, որ նա հավաքի իրերը: Բայց կինն ասել է, թե այլևս չի ցանկանում իր հետ ապրել:

Ինքը նրան խորհուրդ է տվել մտածել, ասել է՝ մի քանի ժամից կվերադառնա:

Մի քանի ժամ հետո վերադարձել, տեսել է բնակարան են մտնում երեք-չորս երիտասարդներ: Ինքը գնացել է ոստիկանություն, խնդրել է, որ իր ասած հասցեով գնան ու ճշտեն, թե անծանոթ երիտասարդները ինչո՞ւ են մտել այն բնակարան, որտեղ իր կինն ու երեխան են: Ոստիկանությունում ասել են, թե դա իրենց խնդիրը չէ: Ինքը վերադարձել է այդ բնակարան: Ճանապարհին երկու շիշ գարեջուր է գնել, խմելով հասել է բնակարանի դռան մոտ: Անհարմար է զգացել շիշը ձեռքին ներս մտնել, որոշել է դռան մոտ խմել ու նոր մտնել բնակարան:

Այդ ժամանակ բնակարանի դուռը բացվել է, երկու երիտասարդ է դուրս եկել: Նրանք պարզել են, որ ինքն է Մհերը, իրեն ներս են հրավիրել: Հենց ինքը ներս է մտել, նրանք սկսել են իրեն հարվածել: Ինքը վնասվածքներ է ստացել հիմնականում դեմքի շրջանում: Դուռը հանկարծ թակել են, եկել են ոստիկանները:

Գործով վկա Մարոն հայտնել է, թե տուժող Մհերն իր ամուսինն է, ինքը նրա ու իրենց երեխայի հետ ապրել է Երևանում:

Ամուսինը մեկնել է ՌԴ, ինքը նրա համաձայնությամբ տեղափոխվել է ընկերուհու վարձակալած բնակարան:

Ինքը «Օդնոկլասնիկի» կայքով ծանոթացել է Վիրաբ Միրանյանի հետ, սկսել են շփվել ու հանդիպել:

Մայիսին ամուսինը անակնկալ վերադարձել է Ռուսաստանից, ասել է, որ ինքը հավաքի իրերը, գնան միասին տուն վարձեն ու ապրեն: Բայց ինքը մերժել է, ասել է, որ նա ալկոհոլ է օգտագործում, ինքն այլևս չի ուզում նրա հետ ապրել: Մհերն ագրեսիվացել ու հեռացել է:

Մի քանի ժամ հետո նա խմած վերադարձել է, ուժեղ թակել է դուռը, հայհոյել է: Ինքը դուռը չի բացել, նա հեռացել է:

Դրանից հետո ինքը զանգել է Վիրաբին, լաց լինելով պատմել է տեղի ունեցածը: Կարճ ժամանակ անց Վիրաբը երկու տղաների հետ եկել է: Իրենք առանձնացել են, ինքը պատմել է կատարվածը: Նրանք Մհերին սպասել են մոտ քառասուն րոպե, հետո որոշել են հեռանալ: Երբ դուրս են եկել, մուտքի մոտ հանդիպել են Մհերին: Նա նստած էր մուտքում՝ գարեջրի շշերը կողքին…

Երբ նորից բնակարան են մտել, Մհերը ցանկացել է գարեջրի շշով հարվածել տղաներին: Վիրաբը հրել է, Մհերը վայր է ընկել ու ցանկացել է նորից հարվածել շշով: Վիրաբը մի քանի հարված էլ է հասցրել նրան: Մյուս երկու տղաները բաժանում էին: Հետո նրանք հանդարտվել են, ինքը ամուսնուն սրբիչ է տվել, որ մաքրի դեմքի արյունը:

Մարոն ասել է, թե հաշտվել է ամուսնու հետ:

Դատարանը Վիրաբ Միրանյանին ու Վրեժ Մաթևոսյանին մեղավոր է ճանաչել տուժողի առողջությանը խմբի կազմում դիտավորությամբ միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 2-րդ մասի 3-րդ կետով:

Վիրաբ Միրանյանը դատապարտվել է 6 ամիս ազատազրկման:

Վրեժ Մաթևոսյանը դատապարտվել է 4 ամիս ազատազրկման:

Դատավճիռը պատժի մասով բողոքարկել են ամբաստանյալները՝ խնդրելով իրենց նկատմամբ պայմանական դատապարտություն կիրառել, սահմանել փորձաշրջան, իրենց իրական, թեկուզ՝ մի քանի ամսով, ազատազրկման չդատապարտել: