Անչափահաս երեք երեխաների հետ դրսում հայտնված կինը ինքնահրկիզման փորձ է արել

34-ամյա Մանուշ Շահբազյանը սեպտեմբերի 13-ին, փորձել է ինքնահրկիզվել, երբ ոստիկանները գնացել են իրեն, ամուսնուն եւ երեք անչափահաս երեխաներին հանրակացարանի նկուղային հարկում գտնվող սենյակից վտարելու: NEWS.am-ի հետ զրույցում կինը պատմեց, որ այդ օրը ոստիկանները առանց նախազգուշացնելու մտել են տուն, որտեղ ժամանակավորապես բնակվում են իրենք եւ բռնի ուժով ցանկացել են դուրս հանել իրենց:

«Հիմա ինձ ասեք` ինչ անեմ ես, ուր տանեմ ես իմ հիվանդ երեխային, մյուս երեխաներիս: Եկան առանց նախազգուշացնելու եւ փորձում էին դուրս հանել մի տարածքից, որը երկար ժամանակ լքված տարածք էր, ոչ ոք չէր ապրում ու հենց անելանելիությունից սկսեցինք ապրել` միանգամից սեփականատերը հայտնվեց ու ուզում է դուրս հանել մեզ: Մեր շենքի բնակիչները բոլորն էլ ասումե ն, որ պատրաստ են մեզ պաշտպանել` հանուն մեր երեք անչափահաս երեխաների»,-ասաց նա:

Մանուշ Շահբազյանը նշեց, որ իրենց ժամանակ են տվել մինչեւ սեպտեմբերի 29-ը «բնակարանն» ազատելու. «Եթե գան, ես բենզին եմ լցնելու իմ, երեխաներիս ու մեզ դուրս հանել ցանկացողների վրա, թող այրվենք ու ընդհանրապես մոռանան մեր գոյության մասին, որ եղել ենք, ապրել ենք: Թե չէ ում է էլ պետք այսպես ապրելը»:

Մանուշ Շահբազյանի ամուսինը` Կարո Շահբազյանն էլ նշեց, որ արդեն չորս օր է`երեխաներին դպրոց չեն ուղարկում, քանի որ այս պահին հարցականի տակ է իրենց ապրելու տեղի հարցը. «Այնքան խդիրներ ունենք, որ չենք կարողանում երեխաներին ուղարկել դպրոց: Ոստիկաններն եկել էին տարածքից մեզ հանելու, վախեցել էին, փաթաթվել էին մեզ: Հիմա մենք ո՛չ գումար ենք խնդրում, ո՛չ հագուստ, ո՛չ էլ սնունդ, խնդրում ենք, որ մեզ թողնեն գոնե այդ նկուղում բնակվենք, մինչեւ հասկանանք`ինչպես է մեր հարցը լուծվելու: Ես շատ եմ աշխատում, ինչ գործ լինում է` անում եմ, որ իմ երեխաները սոված չմնան, բայց մենք ի վիճակի չենք տուն վարձելու»:

Ավելի վաղ տեղեկացրել էինք, որ Շահբազյան ամուսինները, իրենց երեք անչափահաս երեխաների հետ ապրելու տեղ չունեն: Մանուշ Շահբազյանը NEWS.am-ի հետ զրույցում պատմել էր, որ իրենց 10-ամյա տղայի` Սարգիսի մոտ 6 տարի առաջ հայտնաբերվել է Երեւանյան հիվանդություն եւ նրանք ստիպված են եղել նրա բուժման համար տոկոսով գումար վերցնել, ավելի ուշ` չեն կարողացել գումարը վճարել եւ զրկվել են Նոր Նորքում գտնվող հանրակացարանի մեկ սենյականոց բնակարանից: Նա նշել էր, որ այժմ ամուսնու եւ 8, 10 եւ 13 տարեկան երեխաների հետ բնակվում են հանրակացարանի շենքում գտնվող նկուղում, որտեղից իրենց նույնպես դուրս են հանում: