Արագածոտնի մարզում 40-ամյա կինը բողոքել է, որ իր ծանոթը 6 ամիսը մեկ իրեն դաժան ծեծել ու բռնաբարել է

1in.am-ը գրում է.

Արագածոտնի մարզի ընդհանուր իրավասության դատարանում Սուրեն Մնոյանի նախագահությամբ ավարտվել է Նունե Տ.-ի գործի դատական քննությունը :

40-ամյա Նունեն մեղադրվում էր սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:

Նա 2016 թվականի ապրիլի 3-ին հաղորդում է տվել ոստիկանությունում, որ 2013 թվականից մինչև 2015 թվականի մայիս ամիսը իր ծանոթ Արմենը դանակի սպառնալիքով 3 ամիսը մեկ անգամ բռնաբարել է իրեն, ինչպես նաև իրենից հափշտակել է տարբեր ապրանքներ, 100 հազար դրամ գումար, իսկ հերթական բռնաբարության ընթացքում էլ գաղտնի հափշտակել է իր «Սամսունգ» բջջային հեռախոսը՝ իրեն պատճառելով 30 հազար դրամի նյութական վնաս:

Դատարանում Նունե Տ.-ն իրեն մեղավոր չի ճանաչել: Հայտնել է, թե ամուսնալուծված է, ունի երկու չափահաս երեխա:
Լոռեցի Արմենին մինչև գործի քննությունը գիտեր, նրա հետ համարյա չէր շփվում, նա էր իրեն պարբերաբար զանգահարում: 2013 թվականից մինչև 2015 թվականի մայիսը Արմենը 6 ամիսը մեկ անգամ տարբեր պատրվակներով ներխուժել է իր բնակարան, իր նկատմամբ բռնություն է գործադրել, դաժան ծեծի է ենթարկել ու բռնաբարել է իրեն:

Ամեն անգամ ինքը փորձել է դիմադրել, բղավել, օգնության կանչել, բայց ամեն անգամ կորցրել է գիտակցությունը:

2015 թվականի մայիսին իրեն հերթական անգամ բռնաբարելուց հետո Արմենը գաղտնի հափշտակել է իր 30 հազար դրամ արժողության բջջային հեռախոսը, ինչպես նաև մոտ 100 հազար դրամ:

Ամբաստանյալ Նունեն հայտնել է, թե ինքը երբեք այդ Արմենի հետ սիրային կապի մեջ չի եղել, ինքը նրան չի զանգել, իսկ նրա զանգերին էլ պատասխանել է միմիայն «կոպտելու համար»:

Ինքն այդ Արմենին երբեք իր տուն չի հրավիրել, թույլ էլ չի տվել, որ նա մուտք գործի իր բնակարան: Բայց նա ամեն անգամ «ներխուժել է գաղտնի՝ կամ կողպեքը բացելու միջոցով, կամ օգտվելով դուռը բաց լինելու հանգամանքից»:

Մի անգամ Արմենը թակել է իր տան մուտքի դուռը, ինքը չի բացել, բայց տեսել ու լսել է, որ Արմենն իր մասին խոսում է հարևանուհու հետ:

Ամբաստանյալը հայտնել է, թե իրեն հայտնի է, որ 2015 թվականին երբ Արմենը «ներխուժել է» իր տուն, իրեն տեսանկարահանել է բջջային հեռախոսով: Ինքը նրա հետ այդ ժամանակ որևէ հարաբեություն չի ունեցել, բայց ձևացրել է, թե լավ է վերաբերվում, իրենք ընկերներ են: Ձևացրել է մի պայմանով, որ նա վերադարձնի իր հեռախոսը…

Դատաքննության ավարտին ամբաստանյալ Նունե Տ.-ն ուղղում է մտցրել իր ցուցմունքում: Նա հայտնել է, թե Արմենը 2012 թվականից մինչև 2015 թվականի մայիսը տարբեր պատրվակներով ներխուժելով իր բնակարան՝ իրեն դաժան ծեծի է ենթարկել ու բռնաբարել ոչ թե 6 ամիսը, այլ՝ տարին մեկ անգամ…

Տուժող Արմենը հայտնել է, թե 2013 թվականին է ծանոթացել Արագածոտնի մարզի բնակչուհի Նունեի հետ: Միմյանց հեռախոսահամարներ են փոխանցել՝ հետագայում շփումը շարունակելու համար: Սկզբում շփվել են հեռախոսազանգերով, հետո սկսել են հանդիպել ու սեռական հարաբերություն են ունեցել փոխադարձ համաձայնությամբ:

2015 թվականին ինքն իմացել է, որ Նունեն «վիրահատություն է տարել սեռական օրգանների շրջանում», վախեցել է, թե կարող է նրանից ինչ-որ հիվանդությամբ վարակվել ու որոշել է դադարեցնել նրա հետ շփումը… Նրան ասել է, թե Հայաստանից մեկնելու է: Բայց Նունեն նախատել է իրեն ու ասել է՝ եթե փորձի մեկնել Հայաստանից, ինքը ոստիկանություն կդիմի ու կբողոքի:

Իրականում ինքը երբեք այդ կնոջը չի բռնաբարել ու չի ծեծել, նրա կամքին հակառակ նրա տուն չի ներխուժել: Նրա բնակարանից երբևէ գողություն չի կատարել: Ինչ վերաբերում է անսարք «Սամսունգ» հեռախոսին, ապա այն իրեն էր տվել Նունեն, որ տանի նորոգողի մոտ: Ինքը տարել է, նորոգողը 6 հազար դրամ է ուզել, որ հեռախոսի մարտկոցը փոխի: Ինքն այդ մասին հայտնել է Նունեին, նա էլ իմանալով արհեստավորի ուզած գումարը, ասել է, թե հեռախոսը նորոգել պետք չի:

Իր և Նունեի հերթական հանդիպման ժամանակ, երբ փոխադարձ համաձայնությամբ սեռական հարաբերություն են ունեցել, ինքը նրան նկարահանել է նրա իսկ համաձայնությամբ: Տեսանկարահանած նյութն ինքը ներկայացրել է քննիչին…

Լազերային սկավառակի զննության արձանագրության համաձայն՝ «բնակարանի մեջ, լուսավորությունը՝ պարզ, երևում է, որ կնոջ հագին կա դեղին բրդյա սվիտեր, որը ծածկում է միայն նրա պարանոցից մինչև կոնքերը…»: Արձանագրության մեջ առկա է կնոջ և տղամարդու զրույցի վերծանումը՝ փոխադարձ համաձայնությամբ սեռական հարաբերություն ունենալու մասին…

Դատարանը հետազոտել է հեռախոսային խոսակցությունների վերծանումները, համաձայն որոնց՝ ինչպես կինը, այնպես էլ տղամարդը զանգահարել են իրար, որոշակի տևողությամբ զրույցներ ունեցել, իրար ուղարկել են նաև հաղորդագրություններ:

Դատարանը Նունե Տ.-ին մեղավոր է ճանաչել սուտ մատնության համար՝ ՀՀ քրեական օրենսգրքի 333 հոդվածի 2-րդ մասի 1-ին կետով, դատապարտել է 1տարի ազատազրկման, նրա նկատմամբ պայմանական դատապարտություն է կիրառել ու սահմանել է 1 տարի փորձաշրջան:

Դատավճիռը չի բողոքարկվել և մտել է օրինական ուժի մեջ: