«Սևի» և «սպի­տա­կի» արան­քում.իշ­խա­նու­թյու­նը Վա­նե­ցյա­նին այլ ելք չի թող­նում․ «Փաստ»

«Փաստ» օրաթերթը գրում է

Արդեն տևական ժամանակ է, ինչ Արթուր Վանեցյանը հեռացել է ազգային անվտանգության ծառայության տնօրենի պաշտոնից: 

Դրանից գրեթե անմիջապես հետո, երբ հայտնի դարձավ Վանեցյանի հրաժարականի տեքստի բովանդակությունը, իշխանական քարոզչամեքենան սկսեց թիրախավորել վերջինիս: 

Այնպես չէ, որ ԱԱԾ տնօրենի պաշտոնում իշխանության մեջ եղած առանձին խմբեր նրան չէին թիրախավորում, բայց հրաժարականից հետո տեղեկատվականքարոզչական հարձակումներն ակնհայտ ագրեսիվ ու համակարգված բնույթ ստացան։ 

Իշխանությունը փորձում է Վանեցյանին սևացնել, ինչն առայժմ չի ստացվում։ Իշխանության գալով` Նիկոլ Փաշինյանը հենց սկզբից ընտրեց իր իշխանության պահպանման հիմնական ռազմավարությունը՝ «նախկիններից հասարակությանը փրկելու» առաքելությունը: 

Այս համատեքստում դաշտ նետվեց այդ ռազմավարությանը միս ու արյուն տվող թեզը` դաշտը «սևերի» և «սպիտակների» բաժանելը: 

Տրամաբանությունն այստեղ պարզից էլ պարզ է` ով մեզ դեմ է, ուրեմն սև է, և հենց այս տրամաբանության մարտավարությունն էր, որ իշխող ուժը հնչեցրեց Երևանի քաղաքապետի իրենց թեկնածուի շուրթերով ԱԺ ընտրություններից ոչ շատ առաջ: 

Այս մարտավարությամբ Նիկոլ Փաշինյանը կարծում էր, որ հեշտությամբ կկարողանա պահել իշխանությունը և ամեն ձախողում, ցանկացած ընդդիմադիր ակտիվություն կարող է վերագրել նախկին իշխանություններին, այսինքն` «սևերին», և այդպիսով ժողովրդին վախեցնելով սևերի հնարավոր վերադարձով` կկարողանա պահել իշխանությունը: 

Սակայն արդեն այսօր հասարակության մեջ հեղափոխական իշխանություններից հիասթափվողների թիվը գնալով մեծանում է, և Նիկոլ Փաշինյանը սկսում է մտածել ոչ թե «սևերի» կոնսոլիդացման մասին, այլ սարսափում է արդեն որպես երրորդ ուժ ձևավորվող այն մարմիններից, որոնք, չլինելով նախկինների ազդեցության տիրույթում գործող քաղաքական սուբյեկտներ, հնարավորություն կունենան ստանալ ժողովրդի աջակցությունը: 

Այդպիսի սուբյեկտներից է Արթուր Վանեցյանը, որը, լինելով ազգային անվտանգության ծառայության տնօրեն, հրաժարական տվեց և Նիկոլ Փաշինյանին կանգ առնելու կոչ արեց: 

Նիկոլ Փաշինյանն իր գործողություններով Արթուր Վանեցյանին այլ ելք չի թողնում, քան մտնել քաղաքականություն: Մինչև հրաժարականը քաղաքացիական հասարակության՝ «Բաց հասարակության հիմնադրամներ - Հայաստան» գրասենյակից գումարներ ստացող ներկայացուցիչները հարձակվել էին վերջինիս վրա` մեղադրելով նաև Դավիթ Սանասարյանի գործով. Դավիթ Սանասարյանը փորձում էր ապացուցել, որ «գործ է կարվում» նախկինների նման, այսինքն՝ Վանեցյանը, ըստ էության, ոչնչով չի տարբերվում նախկիններից: 

ԱԱԾ պետի պաշտոնից հրաժարական տալուց հետո ստուգվեցին իր հոր բիզնեսները, ինչի արդյունքում ևս չհայտնաբերվեցին «սևերի» հետ ասոցացնելու այդքան կարևոր փաստարկները, և հետագայում Արթուր Վանեցյանի դեմ արշավը տեղափոխվեց Հայաստանի ֆուտբոլի ֆեդերացիա: 

Այստեղ ևս այս սաբոտաժն ակնհայտորեն միտված էր հանրային ընկալման մեջ Արթուր Վանեցյանին «սևացնելուն» և վերջնականորեն ֆուտբոլից հեռացնելուն:

Այս քայլերի հաջորդականությունը ևս այլ ելք չի թողնում Արթուր Վանեցյանին, քան քաղաքական հայտ ներկայացնելու մասին մտածելը: Այսինքն, ունենք մի իրավիճակ, երբ մի կողմից՝ իշխանությունը դրդում է Արթուր Վանեցյանին քաղաքականությամբ զբաղվել, մյուս կողմից՝ իր ողջ քարոզչամեքենայով լծվում է վերջինիս վարկաբեկման գործընթացին: 

Այս արշավի ընթացքում շատ դեպքերում իշխանականներն անցնում են բացահայտ սպառնալիքների, թե` Արթուր Վանեցյանի համար վատ կլինի, եթե քաղաքականություն մտնի: Մի կողմից՝ պարզ է, որ իշխանությունը վախենում է Արթուր Վանեցյանի քաղաքականությամբ զբաղվելուց, մյուս կողմից` նրան այլ ելք չի թողնում: 

Հետևաբար, այսօր Վանեցյանը քաղաքական դաշտում դիրքավորվելու բավականին լավ հնարավորություն ունի, որի հիմնական ուղղությունը քաղաքական դաշտի հեղափոխական հատվածի հիասթափված ձայների առաջնորդությունը ստանձնելն է: 

Մանրամասները՝ «Փաստ» օրաթերթի այսօրվա համարում