Մահացած 2,5-ամյա Հովհաննեսի մայրը պնդում է, որ «Սուրբ Աստվածամայրում» վնասել էին որդու թոքը
ՊԱՏՄՈՒԹՅԱՆ ԱՅՍ ՕՐԸ
Երեւանի «Արաբկիր» բժշկական կենտրոնում սեպտեմբերի 8-ին մահացած 2,5-ամյա Հովհաննեսի մայրը` Հռիփսիմե Ղարիբյանը համոզված է, որ «Սուրբ Աստվածամայր» բժշկական կենտրոնում պունկցիա կատարելիս վնասել են որդու թոքը, ինչն էլ հանգեցրել է նրա վիճակի վատացման ու մահվան:
Հռիփսիմե Ղարիբյանը NEWS.am-ի հետ զրույցում պատմեց, որ սեպտեմբերի 5-ին նկատել են, որ որդին թույլ է, քնկոտ, տարել են «Արաբկիր» բժշկական կենտրոն: Այնտեղ, մոր խոսքով, չափել են փոքրիկի ջերմությունը, այն նորմայի մեջ է եղել, հետազոտել են, ասել, որ երեխայի մոտ թոքաբորբ է զարգացել ու տեղափոխել են «Սուրբ Աստվածամայր» բժշկական կենտրոն` պատճառաբանությամբ, որ այնտեղ կա համապատասխան մասնագետ:
««Շտապօգնության» մեքենայով տարան Ծերեթելիի հիվանդանոց, ռենտգենի թուղթը նայեցին, ասեցին` ահավոր ծայրահեղ ծանր է։ Ասեցին, տվեք մեզ, մենք մեր անելիքները կանենք, գնացեք տուն: Ես մտնում էի մոտը, նորմալ վիճակում էր, ճաշ եմ տարել, ճաշ է կերել, ասեցի` ջուր եմ տվել, խմել է, կոմպոտ ա խմել: Հետո երեխան բանան ուզեց, բժշկուհուն հարցրի` կարելի՞ ա, թե՞ չէ, ասեցին` այո: Գնացի, որ բանան բերեմ, եկա, տեսա` երեխան տեղում չի: Իմացա, որ պունկցիայի են տարել»,- պատմեց երեխայի մայրը` նշելով, որ իրեն բացատրել են, որ երեխայի թոքերում ջուր է եղել, այդ պատճառով էլ պունկցիայի անհրաժեշտություն է առաջացել:
Հռիփսիմե Ղարիբյանը պատմեց, որ դրանից հետո երեխայի վիճակում հետզհետե վատթարացում է նկատել:
«Ես կես ժամը մեկ մտնում էի մոտը: Սկզբում գիտակցությունը տեղն էր, ինձ ճանաչեց: Հետո վիճակը վատացավ, այտուցվեց, փորն ուռեց, արյուն էր կեղտոտում, ականջներից էր արյուն գնում, հետո քթերից: Քանի գնում էր, վատանում էր վիճակը, սկսեց չճանաչել ինձ»,- ասաց նա:
Մոր պատմելով 2 օր «Սուրբ Աստվածամայր» բժշկական կենտրոնում մնալուց հետո երեխային կրկին տեղափոխել են «Արաբկիր» բժշկական կենտրոն` ասելով, որ նրզ մոտ երիկամային անբավարարություն է առաջացել, դիալիզի կարիք կա:
«Արաբկիրում ասեցին` վիճակը ծայրահեղ ծանր են սարքել, նոր ուղարկել են մեզ մոտ: Հնարավոր ամեն ինչ արեցին, բայց երեխայի կյանքը փրկել չհաջողվեց»,- պատմեց մայրը:
Հռիփսիմե Ղարիբյանի խոսքով` «Արաբկիր» բժշկական կենտրոնում իրեն ասել են, որ թոքը վնասված է եղել:
«Սոնոգրաֆիա արեցին, ասացին` ձախ թոքը ճաքել է, վնասվել է, անփութության պատճառով կարող էր լինել: Բացի այդ` մեզ «Սուրբ Աստվածամայրում» ասել էին, թե երեխայի մոտ մի քանի տեսակի վիրուս կա, այստեղ ասացին, որ չկա վիրուս, պետք է իրեն պունկցիա չանեին, պետք է դեղորայքային բուժում անեին»,- ասաց մայրը:
Հիշեցնենք, որ «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանը NEWS.am-ի հետ զրույցում ասել էր, որ երեխան ընդունվել է ծանր թոքաբորբով, մոտը զարգացած է եղել երիկամային անբավարարություն, երեխան երկար ժամանակ է հիվանդ եղել, ծնողները չեն հասկացել:
2.5-ամյա Հովհաննեսը երկվորյակ եղբայր ունի: Ընտանիքը բնակվում է Կոտայքի մարզի Քասախ գյուղում:
