Արարատում տղամարդը «Օդնոկլասնիկի»-ով 10-ամյա աղջկան առաջարկել է սեռական օրգանները ցույց տալ ու ինքնաբավարարմամբ զբաղվել
ՊԱՏՄՈՒԹՅԱՆ ԱՅՍ ՕՐԸ
1in.am-ը գրում է.
Արարատի և Վայոց Ձորի մարզերի ընդհանուր իրավասության դատարանում Գրիգոր Հովհաննիսյանի նախագահությամբ ավարտվել է Գարիկ Ա.-ի գործի դատական քննությունը:
36-ամյա չամուսնացած երիտասարդը մեղադրվում էր ակնհայտ 12 տարին չբոլորած երեխայի նկատմամբ անառակաբարո գործողություններ կատարելու փորձի համար՝ ՀՀ քրեական օրենսգրքի 34-142 հոդվածի 3-րդ մասի 2-րդ կետով:
Ըստ մեղադրանքի՝ Գարիկ Ա.-ն 2015 թվականի դեկտեմբերի 1-ին իր տանից բջջային հեռախոսով մուտք է գործել համացանցի «Օդնոկլասնիկի» կայք:
Նա իր էջից «հյուր է գնացել» երեխայի նկարով մի էջի, ճշտել է, որ էջը պատկանում է 10 տարեկան աղջնակի:
Գարիկ Ա.-ն, կարծելով, թե իր հաղորդագրություններն ուղղում է տասնամյա աղջնակին, մանկահասակ երեխային դիմելու բնորոշ բառերով նամակագրություն է սկսել, «շոշափել է սեռական կյանքին վերաբերող թեմաներ, երեխային առաջարկել է լուսանկարել իր սեռական օրգանները, ուղարկել իրեն, զբաղվել ինքնաբավարարումով, ցույց տալ սեռական օրգանները»:
Բայց իր կամքից անկախ՝ Գարիկ Ա.-ն հանցավոր մտադրությունները ավարտին չի հասցրել, քանի որ իրականում էջը պատկանել է 2008 թվականի մայիսի 2-ին ծնված՝ 7-ամյա աղջնակի հայրիկին, երեխան Գարիկ Ա.-ի հաղորդագրությունները չի կարդացել, դրանք կարդացել ու Գարիկի հետ երեխայի անունից շփվել են նրա ծնողները՝ փորձելով պարզել իրենց երեխայի նկատմամբ հանցավոր դիտավորություններ ունեցող անձին:
Ընդհանուր իրավասության դատարանում Գարիկ Ա.-ն հրաժարվել է ցուցմունք տալուց: Նա իրեն լիովին մեղավոր է ճանաչել, պնդել է իր նախաքննական ցուցմունքները:
Նախաքննության ժամանակ նա հայտնել է, թե հեռախոսով մտել է «Օդնոկլասնիկի» կայքի իր էջը ու տարբեր աղջիկների նկարներ է նայել: Ընթացքում «հյուր է գնացել» մոտ տասը տարեկան մի աղջկա էջին, որտեղ նկարը երեխայի էր, իսկ տարիքը նշված էր՝ 90:
Ինքը մտածել է, որ դա երեխայի էջ է, որոշել է նրան հաղորդագրություններ գրել, շփվել նրա հետ:
Երեխային գրել է. «Բարև, կյանքս»: Իրեն պատասխանել են. «Բարև, ո՞վ է»:
Ինքն առաջարկել է շփվել, սկսել է սեռական կյանքի վերաբերյալ հաղորդագրություններ գրել, ապա առաջարկել է, որ աղջիկը լուսանկարի իր սեռական օրգանները, այդ նկարներն ուղարկի իրեն:
Ի պատասխան՝ իրեն գրել են. «Ո՞վ ես, որտեղի՞ց ես»:
Ինքը մտածել է, որ երեխայի հետ է շփվում, այդ պահին գտնվել է «գրգռված վիճակում, առաջարկել է ինքնաբավարարմամբ զբաղվել»: Աղջիկը հաղորդագրությամբ իրեն հեռախոսահամար է գրել: Ինքը զանգահարել է այդ համարով: Պատասխանողը մանկական բարակ ձայնով է եղել:
Ինքը նրան ասել է. «Բարև, կյանքս, ո՞նց ես»: Հարցրել է՝ նա մենա՞կ է, կողքին հո մարդ չկա, քանի որ չի ցանկացել, որ իրենց խոսակցության մասին որևէ մեկն իմանա:
Երեխան ասել է, թե մայրը խանութ է գնացել: Հետո էլ ասել է, թե մայրը եկավ, ու անջատել է հեռախոսը:
Դրանից հետո ինքը շարունակել է երեխային ինտիմ բնույթի հաղորդագրություններ գրել:
Առաջարկել է ինքնաբավարարմամբ զբաղվել՝ ասելով, թե ինքն էլ է ձեռնաշարժությամբ զբաղվում:
Հետո հասկացել է, որ սխալ է անում՝ մանկահասակ աղջկան նման հաղորդագրություններ ուղարկելով, իր էջից ջնջել է բոլոր հաղորդագրությունները, որոշել է այլևս չզանգել ու չգրել:
Հաջորդ օրը, առավոտյան ժամը 10-ի սահմաններում աղջկա հեռախոսահամարից իրեն զանգ է եկել ու անջատվել:
Ինքը հետ է զանգել: Նույն աղջիկն է եղել: Ինքը հարցրել է՝ նա որտե՞ղ է, ուզում է նրան տեսնել: Աղջիկն ասել է տեղը, բայց ասել է, թե հարմար չէ:
Ինքն իր գյուղից մեկնել է երեխայի ասած բնակավայր, զանգել է, հաղորդագրություններ է ուղարկել, իմացել է, որ նա երաժշտական դպրոցում է: Ինքը գրել է, թե գալիս է երաժշտական դպրոց՝ նրան տեսնելու:
Երբ հասել է երաժշտական դպրոցի մոտ, ոստիկանները բռնել են իրեն ու բերման են ենթարկել:
Ինքը նպատակ չի ունեցել երեխայի հետ սեռական հարաբերություններ ունենալու կամ նրա նկատմամբ որևէ սեռական ոտնձգություն կատարելու: Հանդիպելու դեպքում պարզապես պիտի զրուցեր ինտիմ կյանքի մասին…
Գարիկ Ա.-ն պնդել է, թե բացի այս երեխայից՝ ուրիշ անչափահասների ինտիմ թեմաներով հաղորդագրություններ չի ուղարկել: Նա զղջացել է կատարածի համար, խնդրել է իր նկատմամբ մեղմ վարվել:
Գործով տուժող ճանաչված յոթամյա երեխայի օրինական ներկայացուցիչը՝ մայրը, ցուցմունք է տվել, որ ամուսինը գտնվում է Ռուսաստանում՝ արտագնա աշխատանք է անում: Ինքը Հայաստանում ապրում է որդու և յոթ տարեկան դստեր հետ:
Ամուսինը «Օդնոկլասնիկի» կայքում էջ ուներ, որի գլխավոր լուսանկարը իրենց դստեր լուսանկարն էր, իսկ անունը երկու մեծատառերով էր նշված: Բացի գլխավոր լուսանկարից՝ էջում եղել են իրենց դստեր այլ լուսանկարները ևս: Աղջիկն ինքնուրույն այդ էջ չի մտել, դրանից օգտվել է ամուսինը, երբեմն էլ՝ ինքը:
2015 թվականի դեկտեմբերի 1-ին ամուսինը զանգահարել է իրեն ու ասել, որ մտնի «Օդնոկլասնիկի» իրենց էջ ու տեսնի, թե ով է «հյուր եկած» անձը:
Ինքը մտել է կայք, տեսել է այդ անձին, որի անունը Գարիկ Ա. էր, տարիքը՝ 35 տարեկան, իրենց մարզի բնակիչ: Լուսանկարում պատկերված տղամարդուն ինքը չի ճանաչել:
Մի քանի րոպեից ամուսնու պահանջով ինքը նորից մտել է իրենց էջ ու տեսել է, որ Գարիկ Ա.-ն անպարկեշտ արտահայտություններով ու առաջարկներով հաղորդագրություններ է գրել: Բովանդակությունից հասկանալի էր, որ այդ հաղորդագրություններն ուղղված էին էջի լուսանկարի երեխային՝ իրենց դստերը:
Մտածելով, որ իրենց երեխային կարող է վտանգ սպառնալ՝ ամուսինը պարբերաբար երեխայի անունից պատասխանել է Գարիկի գրած հաղորդագրություններին, որ պարզի, թե ով է նա:
Ամուսինն այդ Գարիկին ուղարկել է իրենց հեռախոսահամարներից մեկը և հատուկ գրել է այդ մարդուն՝ «Ես տասը տարեկան եմ»: Այդ մարդը շարունակել է անպարկեշտ բովանդակությամբ հաղորդագրություններ ուղարկել:
Ամուսինը պահանջել է, որ երբ իրենց տված հեռախոսահամարին զանգ գա, ինքը ֆիքսի այդ համարը, որպեսզի գտնեն այդ մարդուն: Երեկոյան զանգ է եկել, ինքը ֆիքսել է համարը:
Խոսողը տղամարդ է եղել: Ինքը պատասխանել է հատուկ բարակ, մանկականի նման ձայնով:
Այդ տղամարդը հարցրել է. «Ի՞նչ ես անում, բալես, հո կողքիդ մարդ չկա»: Ինքը պատասխանել է երեխայի անունից, թե մայրը խանութ է գնացել, ինքը մենակ է: Հետո ասել է, որ մայրը եկավ, ու անջատել է հեռախոսը: Այդ մարդը հաղորդագրություն է գրել. «Հո մամադ չիմացավ»: Ինքը ամուսնուն հայտնել է իրենց խոսակցության մասին:
Նույն օրը հիշյալ դեպքի մասին հայտնել է ոստիկանությանը: Իրենց հեռախոսը՝ հիշյալ համարով հանձնել է ոստիկաններին: Մնացած հաղորդագրությունները ինքը գրել երեխայի անունից՝ ոստիկանների թելադրանքով: Այդ մարդուն գրավել են հանդիպման երաժշտական դպրոցի մոտ ու բռնել են:
Երեխայի օրինական ներկայացուցիչը բողոքել է Գարիկ Ա.-ի դեմ, պահանջել է, որ նա ենթարկվի քրեական պատասխանատվության:
Երեխայի հայրը հայտնել է, որ իրենց էջին հաղորդագրություններ գրողին ինքը պատասխանել է երեխայի անունից՝ ցանկանալով բացահայտել, թե ով է նա՝ հնարավոր ոտնձգությունից երեխային պաշտպանելու համար: Այդ մարդը սկզբում գրել է՝ արի ընկերանանք, շփվենք: Ինքը գրել է, որ տասը տարեկան է: Հարցրել է, թե ով է իրեն գրողը, որտեղից է:
Այդ հարցերին նա չի պատասխանել, բայց գրել է՝ կարո՞ղ է ինտիմ հարց տալ: Ինքը սկզբում չի պատասխանել:
Այդ մարդը գրել է՝ նեղացե՞լ ես:
Ինքը հարցրել է. «Ինտիմն ի՞նչ է», որպեսզի այդ մարդը համոզվի, որ երեխայի հետ է խոսում, այլևս չշարունակի: Բայց նա գրել է սեռական օրգանների մասին, առաջարկել է, որ երեխան լուսանկարի իր սեռական օրգանները, լուսանկարներն ուղարկի իրեն, առաջարկել է ինքնաբավարարմամբ զբաղվել…
Ինքը վերջնականապես որոշելով բացահայտել նրան՝ իրենց հեռախոսահամարն է տվել, որ այդ մարդը զանգի, այդպես բացահայտի ինքն իրեն… Կնոջից պահանջել է անմիջապես դիմել ոստիկանություն…
Երեխայի հայրը նույնպես պահանջել է, որ Գարիկ Ա.-ն ենթարկվի քրեական պատասխանատվության:
Ըստ տեղականքի ու բնութագրի՝ Գարիկ Ա.-ն զբաղվել է գյուղատնտեսական աշխատանքներով, բնութագրվել է… դրական:
Դատարանը հաշվի է առել Գարիկ Ա.-ի արարքի հանրային վտանգավորության բարձր աստիճանը:
Գարիկ Ա.-ն մեղավոր է ճանաչվել ՀՀ քրեական օրենսգրքի 34-142 հոդվածի 3-րդ մասի 2-րդ կետով: Նա դատապարտվել է 4 տարի ազատազրկման:
Պատժի սկիզբը՝ 2015 թվականի դեկտեմբերի 14-ից:
Դատավճիռը չի բողոքարկվել և մտել է օրինական ուժի մեջ:
