ՊՆ-ն խոստացել է, որ 3 օրում կտա զոհվածների գերեզմանների փողը

Քառօրյա պատերազմում ընկած զինծառայողների Գյումրիի պանթեոնի շուրջ իրավիճակը սրվել է։ Պետական միջամտության շրջանակներում Գյումրիից դուրս, «Շիրակ» գերեզմանոցում տարածք էր հատկացվել՝ եղբայրական գերեզման-պանթեոն կառուցելու համար։ Բայց անցել է 5 ամիս, եւ անգամ գերեզմանները հարակից մայրուղուց անջատող բետոնե պատը չի կառուցվել։

Հարազատները գալիս էին ու տեսնում, որ հողի թմբերի վրայով ավտոմեքենաներ են անցել-դարձել, ու բարկանում էին։ Մի քանի օր առաջ նրանք հայտարարեցին, որ հրաժարվում են պաշտպանության նախարարության աջակցությունից եւ սեփական միջոցներով բետոնային աշխատանքները կանեն։

Վիկտոր Յուզիխովիչի մորաքրոջ ամուսինն էլ՝ Անդրանիկ Ազոյանը, որը բետոնային աշխատանքների մասնագետ է, արագ գործի գլուխ է անցել։ «Բոլորն էլ համաձայն են, որ ավելի լավ է, մեզ քիչըմ նեղություն տանք, որակով շինարարություն լինի, քան ոչինչ չլինի, հասնի սեպտեմբերը, անձրեւային եղանակին գործը կիսատ-պռատ մնա»,- ասում է նա։

Որպես բետոնի մասնագետ, վստահեցնում է․ գերեզմանները ճանապարհից առանձնացնելու, բետոն լցնելու համար ամենաշատը 10-15 օր էր պետք, բայց գործը ձգվեց 4 ամիս։ Խայտառակ դրվագներից այս օրերին խուսափել չհաջողվեց։

Զոհված սպա Վիկտոր Յուզիխովիչի հայրը՝ Ալեքսանդր Յուզիխովիչը, քիչ էր մնում գետնի տակ թաղեր ՊՆ-ի մրցույթում հաղթող շինարարական կազմակերպության տնօրեն Սարգիսին, երբ տեսավ, որ որդու գերեզմանի վրայով մեքենա է անցել։ «Փոսն եմ գցել, ուզել եմ թաղել, տղերքը պահեցին»,- ասաց նա։ Մինչ այդ «Ախուրյանում» գրանցված այդ կազմակերպության տնօրենը զոհվածների հարազատներին հայտնել էր, որ ՊՆ-ն իրենց գումարները չի տրամադրում, եւ հենց դա է պատճառը, որ աշխատանքները ժամանակին չեն արվում։

Երկու օր առաջ պանթեոն էին գնացել Շիրակի զինկոմ Գագիկ Խաչատրյանը եւ ՊՆ-ից մի պաշտոնյա։ Նրանք խոստացել էին, որ երեք օրում գումարները կտրամադրվեն, եւ աշխատանքները կվերսկսվեն։

«3 օր ժամանակ են տվել, իրենք արդեն սկսել են աշխատել,- ասում է Թալիշում զոհված Տիգրան Աբգարյանի հայրը՝ Արամ Աբգարյանը։- Մենք լցնում էինք բետոնը, իրենք էլ եկան, որոշեցին, որ երեք օրում գումարները կփոխանցեն»։ Դիմեցինք ՊՆ մամուլի խոսնակ Արծրուն Հովհաննիսյանին՝ պարզելու, թե ինչպես է ընտրվել կապալառու կազմակերպությունը, եւ ինչու վերջինիս գումարներ չեն տրամադրվում։ Սակայն նա ոչ զանգերին էր պատասխանում, ոչ հաղորդագրություններին։
ՊՆ հերթական մութ մրցույթը՝ մութ ֆինանսական պատկերով։

Սյուզան ՍԻՄՈՆՅԱՆ

Նյութի աղբյուրը ` hraparak.am