Ոոստիկանությունում պարգևատրումների վճարման խնդրի վերաբերյալ մամուլի հետեւությունները անհիմն են. Ոստիկանություն
ՀԱՍԱՐԱԿՈՒԹՅՈՒՆՈստիկանությունը «Իրավունք» թերթի հոկտեմբերի 26-ի համարում «Պարգևավճարները կրճատել են. ոստիկանությունում բողոքի ալիք է հասունանում» հրապարակման վերաբերյալ հանդես է եկել պարզաբանմամբ՝ թերթի հետեւությունները համարելով անհիմն համապատիրականությանը չհամապատասխանող:
Ինչպես «Արմենպրես»-ին տեղեկացրին ՀՀ ոստիկանության տեղեկատվության և հասարակայնության հետ կապերի վարչությունից, պարզաբանման մեջ ասվում է. «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքով (նախորդ տարիներին` «Պետական պաշտոն զբաղեցնող անձանց վարձատրության մասին» ՀՀ օրենքով) սահմանված կարգով ՀՀ ոստիկանության ծառայողներին յուրաքանչյուր տարի պարգևատրումներ վճարվել են (վճարվում են) աշխատավարձի ֆոնդի տնտեսված միջոցներից, հատուկ առաջադրանքների և (կամ) որակյալ աշխատանքի կատարման համար, յուրաքանչյուրին` տարեկան ոչ ավելի քան 3 անգամ, մինչև մեկ պաշտոնային դրույքաչափով:
Ըստ այդմ, 2014 թ.-ից սկսած` այդ նպատակով յուրաքանչյուր տարի օգտագործվել է շուրջ 2,3-ից 2,5 մլրդ. դրամ, որի սահմաններում տարեկան երկուսից երեք անգամ հատկացվել են պարգևատրումներ, պաշտոնային դրույքաչափը չգերազանցող չափերով (55,0 70,0 85,0 հազարական դրամ և այլն):
Ընթացիկ տարում այդ նպատակով արդեն իսկ ծախսվել է 1785,0 մլն. դրամ, իսկ տարբերությունը նախատեսվում է հատկացնել տարեվերջին:
Հարկ է նշել, որ ՀՀ 2019թ. պետական բյուջեի նախագծով վերոգրյալ տնտեսվող միջոցներից զատ լրացուցիչ նախատեսվել է շուրջ 3,1 մլրդ. դրամ, որը իրական հնարավորություն կընձեռի ավելի քան կրկնակի չափով ավելացնել ոստիկանության ծառայողների խրախուսմանն ուղղվող միջոցները:
Լրատվամիջոցներին կոչ ենք անում ոստիկանության վերաբերյալ հրապարակումներ պատրաստելիս համագործակցել կառույցի համապատասխան ծառայությունների հետ, ինչը ընթերցողին զերծ կպահի թյուրիմացությունից, իսկ լրատվամիջոցին անփաստարկ ու կեղծ տեղեկատվություն հրապարակելուց:
