Ընտրողների մասնակցությունը՝ ՏԻՄ ընտրություններում. այդ թվում 4 քաղաքներում. Ամենաակտիվը Կապանն է, պասիվը՝ Էջմիածինը
ՀԱՍԱՐԱԿՈՒԹՅՈՒՆՀայաստանի 49 համայնքներում ՏԻՄ ընտրությունները պասիվ են անցնում: Մասնավորապես, ժամը 11.00-ի դրությամբ Արմավիր քաղաքում քվեարկությանը մասնակցել է ընտրողների 6,44 տոկոսը (28699 ընտրողից՝ 1849-ը):
Էջմիածնում քվեարկությանը մասնակցել է ընտրողների 6,15 տոկոս (45278 ընտրողից 2784-ը):
Հրազդանում քվեարկությանը մասնակցել է 7,34 տոկոսը (44154 ընտրողից 3240-ը):
Համեմատաբար ակտիվ է Կապան քաղաքում, որտեղ ժամը 11-ի դրությամբ ընտրություններին մասնակցել է ընտրողների 15,44 տոկոսը (34969 ընտրողից 5400-ը):
Նշենք, որ այս 4 քաղաքներում քաղաքապետները հրաժարական տվեցին թավշյա հեղափոխությունից հետո:
Էջմիածնում առաջադրվել է քաղաքապետի 12 թեկնածու, իշխող ուժի թեկնածուն քաղաքապետի պաշտոնակատար Դիանա Գասպարյանն է: Թեկնածուներ են նաեւ Էջմիածնի նախկին փոխքաղաքապետ Վազրիկ Գրիգորյանը եւ «Յունիբանկի» տեղի մասնաճյուղի ղեկավար, ԲՀԿ-ական Վահե Մովսիսյանը:
Նշենք, որ քարոզարշավի ընթացքում Դիանա Գասպարյանի հետ կապված պատմություն էր գրանցվել. Նրա հայրը զանգահարել էր դստեր հասցեին սոցիալական ցանցում բացասական գրառումներ կատարած, մարտի 1-ի գործով դատապարտված Գեւորգ Մանուկյանին, որն այժմ բնակվում է Ստրասբուրգում, եւ սպառնացել ու վիրավորել: Գեւորգ Մանուկյանի գրառումները վերաբերել էին այդ ժամանակ դատավորի օգնական Դիանա Գասպարյանի կեցվածքին: Ավելի ուշ Դիանա Գասպարյանը հրապարակավ ներողություն էր խնդրել հոր պահվածքի համար՝ նշելով, որ նյարդերը տեղի են տվել:
Հրազդանում թեկնածուները ընդամենը երկուսն են՝ ԱԺ «Ելք» խմբակցության պատգամավոր Սասուն Միքայելյանի որդին՝ Սեւակ Միքայելյանը եւ հեղափոխական ակտիվիստ Լեւոն Ստեփանյանը:
Այստեղ քարոզարշավի ժամանակ սկանդալային ձայնագրություն հրապարակեց «Իրազեկ քաղաքացիների միավորման» «Փաստերի ստուգման հարթակը», ըստ որի, Հրազդանի քաղաքապետի թեկնածու Սեւակ Միքայելյանի նախընտրական քարոզչության մեջ ներգրավված են նաեւ դպրոցների տնօրենները, ուսուցիչներն ու աշակերտները: Մասնավորապես, թիվ 5 դպրոցի տնօրենը ձայնագրության մեջ համաձայնում է 100 հոգի ուղարկել Սեւակ Միքայելյանի նախընտրական հանրահավաքին: Թեկնածուի նախընտրական շտաբը սա սադրանք՝ էր որակել եւ նշել, որ պետք է պատասխանատվության ենթարկվի այն անձը, որը զանգահարել է տնօրենին և ներկայացել որպես Սասուն Միքայելյանի օգնական։
Ի վերջո, այդ դպրոցի տնօրենը Կոտայքի մարզպետարանի կողմից «խիստ նկատողություն» էր ստացել:
Հատկանշական է, որ Հրազդանում ՔՊ-ն հայտարարել էր, որ Սասուն Միքայելյանի որդուն չի պաշտպանելու: Անգամ Սասուն Միքայելյանն էր հայտարարել, որ չի մասնակցելուի քարոզարշավին, սակայն այսօր նրան տեսել են որդու նախընտրական շտաբում:
Արմավիրում թեկնածուները 4-ն են, այդ թվում քաղաքապետի պաշտոնակատար, ՔՊ-ական Դավիթ Խուդաթյանը: Նախկին քաղաքապետի մտերիմ, Արմավիրի ավագանու անդամ Օհան Հարությունյանը եւ 2011 թվականից քաղաքապետի պաշտոնի համար պայքարող անկուսակցական Սեւակ Մինասյանը:
Կապանքաղաքում առաջադրվել է երեք թեկնածու՝ քաղաքապետի պաշտոնակատար, ՔՊ անդամ Նարեկ Բաբայանը, Էդգար Հովհաննիսյանը եւ Գեւորգ Փարսյանը:
Եւս մեկ ուշագրավ փաստ. Նիկոլ Փաշինյանը նախընտրական քարոզարշավի ընթացքում այցելել է Կապան, Արմավիր եւ Էջմիածին, իսկ Հրազդան չի այցելել:
Նշենք, որ ժամը 11.00-ի դրությամբ ՏԻՄ ընտրություններում ընդհանուր մասնակցությունը կազմում է 9,33 տոկոս:
